လၢဟီၣ်ခိၣ်ဒီဘ့ၣ်တၢ်ဒုးတၢ်ယၤ ခံဘျီတဘျီအကတီၢ်န့ၣ်, လၢကီၢ်မိၢ်ပှၢ်ယူရပၤအပူၤ သုးမုၢ်သူၣ်ဒဲအလီၢ် တနီၤနီၤန့ၣ်, တၢ်မၤစၢၤလၢအတညီနုၢ်မၤအသး အိၣ်ဝဲဒၣ်န့ၣ်လီၤ. ပှၤသုးဖိတဖၣ်လၢသးသယုၢ် အဟံၣ်အဃီတဖၣ်အဂီၢ် တနၢ်ပှီၢ်စုတဖၣ် ဘၣ်တၢ်ဆှၢတ့ၢ်လီၤလၢ ကဘီယူၤန့ၣ်လီၤ. တနၢ်တဖၣ်အံၤ ဘၣ်တၢ်တ့လီၤဆီ, ပှၤစူးကါဂာ်ထး ထဲအမျးကယၤ တဆံ လၢပှၤညီနုၢ်ပှၤမၤဝဲ, ထံဒီး ပအူးတၢ်ဖိဃၢ် အသု တမၤဟးဂီၤအဂီၢ် ပှၤစူးကါ မ့ၤစဲ (glue) လီၤဆီန့ၣ်လီၤ. တနၢ်ပှီၢ်စုတဖၣ်အံၤ ကိၤဝဲကျၢၤဝဲ, ဖျါတဘျ့တဆှီ ဘၣ်ဆၣ်, ဟ့ၣ်ထီၣ် တၢ်သးဖှံသးမုာ် ဒီးသးဂံၢ်ဘါ ဒိၣ်ဒိၣ်မုၢ်မုၢ်ဆူ ပှၤသုးဖိတဖၣ်လၢအပာ်ဖှိၣ်ထီၣ်သး ဒ်သိးကသးဝံၣ်သကိးတၢ်သးဝံၣ် လၢအညီနုၢ်သးဝံၣ်ဝဲဒၣ် လၢအဟံၣ်အဃီန့ၣ်လီၤ.
တၢ်သူၣ်ဝံၣ်သးဆၢ, လီၤဆီဒၣ် ထါသးဝံၣ်စံးထီၣ်ပတြၢၤယွၤတဖၣ်, မ့ၢ်စ့ၢ်ကီးကျိၤကျဲတဘိလၢ ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် ဃုထံၣ်န့ၢ် သးအတၢ်မုာ်တၢ်ဖိး လၢတၢ်ဒုးတၢ်ယၤအဆၢကတီၢ်န့ၣ်လီၤ. ၂ကွဲး ၂၀ အပူၤ ပကထံၣ်ဘၣ် စီၤပၤယဟိရှၤဖး ထံၣ်န့ၢ်တၢ်မ့ၢ်တၢ်တီတမံၤအံၤ ဖဲလၢအဘၣ် ကွၢ်ဆၢၣ်မဲာ်ဒီးဒုၣ်ဒါ အါအါဂီၢ်ဂီၢ်အကတီၢ်န့ၣ်လီၤ. လၢတၢ်ပျံၤတၢ်ဖုးအပူၤ, အဆၢဖိ ၃-၄ ပာ်ဖျါဝဲ စီၤပၤကိးထီၣ်ပှၤဂီၢ်မုၢ်ခဲလၢာ် ဒ်သိးကဃ့ဘါထုကဖၣ်, ဒီးဒုၣ်တၢ်အီၣ် လၢတၢ်သးတဖျၢၣ်ဃီအဂီၢ်န့ၣ်လီၤ. အဆၢဖိ ၁၇ အပူၤ ကစၢ်ယွၤစံးဘၣ်အီၤလၢ ကဘၣ်နဲၣ်ဆှၢအပှၤသုးဖိတဖၣ်, ဒ်သိးကလဲၤသဂၢၢ်ဒုၣ်ဒါ, ဒီးအၢၣ်လီၤထွဲဝဲ, “သုတဒုးသုးဘၣ်လၢ တၢ်အံၤအပူၤဘၣ်” န့ၣ်လီၤ. စီၤယဟိရှၤဖးနာ်ယွၤ ဒီးမၤထွဲဝဲလၢ တၢ်နာ်သန့ၤသးအပူၤန့ၣ်လီၤ. အဆၢဖိ ၂၁ န့ၣ် ပကထံၣ်ဘၣ် အဝဲဒုးလဲၤပှၤသးဝံၣ်တၢ်ဖိတဖၣ် ကလဲၤလၢ ပှၤသုးဖိတဖၣ်အမဲာ်ညါ, ဒီးသးဝံၣ်စံးထီၣ်ပတြၢၤကစၢ်ယွၤ, မ့ၢ်လၢအအိၣ်ဒီးတၢ်နာ်, လၢကထံၣ်ဘၣ်တၢ်မၤနၢၤအဃိန့ၣ်လီၤ. အဆၢဖိ ၂၂ ပာ်ဖျါထီၣ် ဖဲအဝဲသ့ၣ်စးထီၣ်သးဝံၣ်တၢ်န့ၣ်, လၢတၢ်လီၤလိၣ်လီၤလးအပူၤ, ကစၢ်ယွၤမၤနၢၤကွံာ် အဒုၣ်အဒါတဖၣ်, ဒီးအုၣ်က့ၤခီၣ်က့ၤအပှၤဂီၢ်မုၢ် န့ၣ်လီၤ.
တၢ်မၤနၢၤတဟဲဝဲ လၢတၢ်ဆၢကတီၢ်, ဒီးကျိၤကျဲလၢပအဲၣ်ဒိးအသိး ထီဘိန့ၣ်ဘၣ်. ဘၣ်ဆၣ် ကစၢ်ယ့ၣ်ရှူး အတၢ်မၤနၢၤ အဒိၣ်အထီကတၢၢ် လၢအမၤနၢၤတၢ်ဒဲးဘး, ဒီးတၢ်သံ- လၢအမၤနၢၤတ့ၢ်လံဝဲ လၢပဂီၢ်အဂ့ၢ်န့ၣ် ပကိးသတြီဘိးဘၣ်သ့ၣ်ညါသ့ဝဲဒၣ်န့ၣ်လီၤ. လၢတၢ်ဒုးတၢ်ယၤပျီ အသးကံၢ်ပူၤဒၣ်လဲာ် ပဃုထၢအိၣ်ဘှံးအိၣ်သါ ခီဖျိသးလၢအဲၣ်ဘူၣ်ထီၣ်ဘါထီၣ်ယွၤအပူၤသ့ဝဲန့ၣ်လီၤ.
