ဖဲ ရှါမဲ စမ့း(သ) (Sherman Smith) ဃုထၢဝဲ ဒံၢ်လဲ မဲးကီလၣ် (Deland McCullough) ဒ်သိးကလိာ်ကွဲ အမဲရကၤဖျၢၣ်ထူ လၢမဲၣ်ယၣ်မံၣ် (Miami) ဖၠၣ်စိမိၤအဂီၢ် ဝံၤအလီၢ်ခံန့ၣ်, အဝဲအဲၣ်ဘၣ်အီၤအါထီၣ်, ဒီးကဲထီၣ် ဒ်ပၢ်တဂၤလၢ ဒံၢ်လဲ တဒိးန့ၢ်ဝဲနီတဘျီဘၣ်န့ၣ်လီၤ. ဒံၢ်လဲ စ့ၢ်ကီး အိၣ်ဒီး တၢ်ယူးယီၣ်ပာ်ကဲ ဒိၣ်ဒိၣ်အါအါ လၢရှါမဲအလိၤ, ဒီးတိာ်ပာ်ဝဲဒ်သိးကကဲထီၣ် ပှၤလၢအလီၤဂာ်ဒီး ရှါမဲန့ၣ်လီၤ. နံၣ်တဖၣ် လဲၤပူၤကွံာ်လၢအဆံ, ဒီးဖဲ ဒံၢ်လဲ သ့ၣ်ညါဘၣ်ဝဲ မိၢ်လၢအဆံးစၢ်တ့ၢ်အီၤဒီး, ဖဲအမိၢ်စံးဘၣ်အီၤလၢ “နပၢ် အမံၤ မ့ၢ်ဝဲ ရှါမဲ စမ့း(သ)လီၤ” န့ၣ် ကဲထီၣ်တၢ်ဖုးသံပျီၢ်သံ လၢအဂီၢ်န့ၣ်လီၤ. မ့ၢ်ဝဲလီၤ, မ့ၢ်ဒၣ် ရှါမဲ စမ့း(သ) အဝဲန့ၣ်လီၤ. ဖဲအသ့ၣ်ညါဝဲလၢ အဖိခွါအိၣ်တဂၤအဃိ, ပှၤနဲၣ်လိတၢ် ရှါမဲၣ်စမ့း(သ) ကမၢကမၣ် တုၤဒၣ်လဲာ်ကတိၤက့ၤတၢ် တထီၣ်လၢၤဘၣ်. ဒံၢ်လဲၣ် စ့ၢ်ကီး ကမၢကမၣ်ဝဲဒိၣ်မး, တုၤဒၣ်လဲာ်ကတိၤက့ၤ တၢ်တထီၣ်လၢၤဘၣ်, မ့ၢ်လၢက့ၢ်ဂီၤ လၢအထံၣ်တ့ၢ်ဝဲ ဒ်အပၢ်တဂၤန့ၣ်, မ့ၢ်ဝဲ အပၢ်နီၢ်နီၢ်အဃိန့ၣ်လီၤ.
လၢခံဖဲအဝဲသ့ၣ် ထံၣ်လိာ်ကဒီးအသးအဘျီန့ၣ်, ရှါမဲ ဖိးဟု ဒံၢ်လဲ ဒီးကိးအီၤလၢ “ယဖိခွါ” န့ၣ်လီၤ. ပှၤကိးအီၤဒ်သိးအံၤန့ၣ် ဒံၢ်လဲ တနၢ်ဟူတ့ၢ်ဘၣ်ဝဲနီတဘျီ လၢအပၢ်အအိၣ်ဘၣ်. ဒံၢ်လဲ သ့ၣ်ညါဝဲလၢ ရှါမဲ စံးကတိၤ “အဝဲမ့ၢ်ယဖိခွါ. ယပာ်သးကဖၢလၢဒိၣ်မးလီၤ” အံၤ လၢပၢ်အလီၢ်အဃိဒီး ဒံၢ်လဲ စ့ၢ်ကီး အသးပူၤ ပှဲၤလုာ်ကွံာ်ဝဲဒီးတၢ်သးမံသးမုာ် လၢတၢ်မၤအသးဒ်သိးအံၤအဂီၢ်န့ၣ်လီၤ.
ပပၢ်အိၣ်လၢမူခိၣ် အတၢ်အဲၣ်အလၢအပှဲၤအဃိ ပသးပူၤ ကြၢးလၢ တၢ်သးမံသးမုာ် ပှဲၤလုာ်ကွံာ်ဝဲဒၣ် စ့ၢ်ကီးန့ၣ်လီၤ. ၁ ယိၤ ၃:၁ အပူၤ တၢ်မၢဖိစီၤယိၤဟၣ် ကွဲးဝဲ “ကွၢ်တက့ၢ်, ပၢ်ဟ့ၣ်လံပှၤလၢ တၢ်အဲၣ်တၢ်ကွံ ဒ်လဲၣ်ဒ်လဲၣ်, လၢတၢ်ကကိး, ပှၤလၢယွၤအဖိန့ၣ်လီၤ.” ပှၤဒ်သိး ရှါမဲ န့ၣ် ကမ့ၢ်ဒၣ်အပၢ်လီၤန့ၣ် ဒ် ဒံၢ်လဲ ဆိကမိၣ်ဝဲ တဘူၣ်အသိး ပဝဲစ့ၢ်ကီး ခီဖျိလၢစီၤယိၤဟၣ်အတၢ်ပာ်ဖျါန့ၣ် ပကတိၤက့ၤတၢ်တထီၣ်လၢၤဘၣ် န့ၣ်လီၤ. တၢ်အံၤမ့ၢ် တၢ်အနီၢ်ကီၢ်ဧါ. မ့ၢ်ဝဲလီၤ, အဆၢဖိ ၁ အပူၤ တၢ်မၢဖိစီၤယိၤဟၣ် စံးဘၣ်ပှၤသပှၢ်ပှၢ်လၢ “တၢ်ကကိးပှၤလၢယွၤအဖိန့ၣ်လီၤ.”
နမ့ၢ်စူၢ်က့ၤနာ်က့ၤကစၢ်ယ့ၣ်ရှူးန့ၣ်, အပၢ်စ့ၢ်ကီး မ့ၢ်ဝဲဒၣ်နပၢ်လီၤ. လၢဟီၣ်ခိၣ်ချၢအံၤ ဘၣ်သ့ၣ်သ့ၣ် နကထံၣ်ဆိကမိၣ်လီၤက့ၤနသးလၢ နမ့ၢ်ဖှိၣ်ဃဲဖိ, အိၣ်ဒၣ်ထဲတဂၤဧိၤန့ၣ်လီၤ. ဘၣ်ဆၣ် တၢ်လၢအမ့ၢ်တၢ် နီၢ်နီၢ်န့ၣ်, နအိၣ်ဒီးပၢ်လၢ အလၢအပှဲၤထဲတဂၤဧိၤ, ဒီးပၢ်တဂၤအံၤ ပာ်အသးကဖၢလၢ ဒ်သိးကကိးနၤဖိ အဂီၢ်န့ၣ်လီၤ.
