ယမိၢ်ဒီးယၤ ပတၢ်ပာ်သးတလီၤပလိာ်ဝံၤ, အကတၢၢ်န့ၣ် ယမိၢ်အၢၣ်လီၤဝဲလၢ ပကထံၣ်လိာ်ပသး ဖဲတၢ်လီၢ်လၢအိၣ်ယံၤဒီးယဟံၣ် ၁နၣ်ရံၣ်အတၢ်လဲၤန့ၣ်လီၤ. ဘၣ်ဆၣ်, ဖဲယလဲၤတုၤန့ၣ်ဒီး ဖျါလၢတချုး ယလဲၤတုၤအဝဲက့ၤလံန့ၣ်လီၤ. လၢတၢ်သးပှံၢ်ထီၣ်အပူၤ ယကကွဲးဆှၢလီၤလံာ် ဆူအအိၣ်န့ၣ်လီၤ. ဘၣ်ဆၣ် မ့ၢ်လၢယသးကလၢၢ်ဘၣ် ကစၢ်ယွၤသဆၣ်ထီၣ်ယၤ လၢယကမၤဆၢက့ၤတၢ်လၢတၢ်အဲၣ်အဃိ ယကွဲးဂ့ၤထီၣ်က့ၤလံာ်န့ၣ်လီၤ. ဖဲယမိၢ်ဖးဘၣ် ယလံာ်ပရၢဝံၤန့ၣ်ဒီး, အဝဲဆဲးကျိးက့ၤယၤ, ဒီးစံးဝဲလၢ “နသးဆီတလဲလံ” န့ၣ်လီၤ. ကစၢ်ယွၤစူးကါ ယတၢ်ကွဲးလၢကနဲၣ်ဆှၢယမိၢ် ဒ်သိးကသံကွၢ်ယၤ ကစၢ် ယ့ၣ်ရှူးအဂ့ၢ်ဒီး, အကတၢၢ်န့ၣ်, တူၢ်လိာ်ကစၢ်ယ့ၣ်ရှူးခရံာ် ဒ်တၢ်အုၣ်က့ၤခီၣ်က့ၤကစၢ် လၢအဂီၢ်န့ၣ်လီၤ.
မးသဲ ၅:၁၄ အပူၤ, ကစၢ်ယ့ၣ်ရှူး ပာ်ဖျါမၤဂၢၢ်မၤကျၢၤဝဲအပျဲၢ်အဘီၣ်တဖၣ်လၢ “သုဝဲဒၣ်အံၤသုမ့ၢ် ဟီၣ်ခိၣ်အတၢ်ကပီၤလီၤ” န့ၣ်လီၤ. အဆၢဖိ ၁၆ န့ၣ်စံးဝဲ, “သုတၢ်ကပီၤန့ၣ် ဒုးကပီၤထီၣ်အီၤလၢ ပှၤကညီ အမဲာ်ညါဒ်သိး အကထံၣ်ဘၣ် သုမၤတၢ်ဂ့ၤ, ဒီးကစံးထီၣ်ပတြၢၤသုပၢ်အိၣ်လၢမူခိၣ်န့ၣ်တက့ၢ်” န့ၣ်လီၤ. ပတူၢ်လိာ်ခရံာ် ဒ်အမ့ၢ်တၢ်အုၣ်က့ၤခီၣ်က့ၤကစၢ် ဝံၤတထံၣ်ဃီန့ၣ်ဒီး, ပဒိးန့ၢ် သးစီဆှံအစိကမီၤန့ၣ်လီၤ. အဝဲဆီတလဲကွံာ်ပှၤ ဒ်သိးပကမ့ၢ် တၢ်အုၣ်အသးလၢအကဲၤကပီၤ ယွၤအတၢ်မ့ၢ်တၢ်တီ, ဒီးအတၢ်အဲၣ်, ဖဲပလဲၤတၢ်တပူၤလၢ်လၢ်န့ၣ်လီၤ.
လၢသးစီဆှံအစိကမီၤအပူၤန့ၣ်, ပကဲထီၣ် တၢ်မုၢ်လၢ်အတၢ်ကပီၤ, ဃုာ်ဒီးတၢ်ဃူတၢ်ဖိးအတၢ်ကပီၤ လၢအပှဲၤဒီးတၢ်သူၣ်ခုသးခု, ဒီးပကလီၤဂာ်အါထီၣ်အါထီၣ်ဒီး ကစၢ်ယ့ၣ်ရှူးခရံံာ် လၢပတၢ်အိၣ်မူ ကိးမုၢ်နံၤအပူၤန့ၣ်လီၤ. တၢ်မၤဂ့ၤကိးမံၤဒဲး လၢပမၤသ့ၣ်တဖၣ် ကကဲထီၣ်စံးဘျုးစံးဖှိၣ်, ဘူၣ်ထီၣ်ဘါထီၣ် ကစၢ်ယွၤ, လၢအထုးန့ၢ်ပှၤဂၤအသူၣ်အသး, ဒီးဘၣ်တၢ်ထံၣ်သ့ၣ်ညါနၢ်ပၢၢ် ဒ်တၢ်စူၢ်တၢ်နာ်လၢအမူ န့ၣ်လီၤ. ဟ့ၣ်လီၤအးလီၤနသး ဆူသးစီဆှံအစုပူၤ, ဒီးပကဟ့ၣ်ထီၣ်တၢ်လၤကပီၤ ဆူပၢ်ကစၢ်အအိၣ်, ခီဖျိ လၢတၢ်ကပီၤဆၢက့ၤ, ဖိခွါကစၢ်, ကစၢ်ယ့ၣ်ရှူးအတၢ်ကပီၤန့ၣ်တက့ၢ်.
