ရိန့း (Ronit) အိၣ်ဖျဲၣ်ဒိၣ်ထီၣ်ဝဲလၢ ပှၤအဲၣ်ဘူၣ်ထူဘါယွၤ အဒူၣ်ဖိထၢဖိဘၣ်ဆၣ် တမ့ၢ်လၢ ပှၤခရံာ်ဖိ ဟံၣ်ဒူၣ်ဃီထၢဘၣ်. အဝဲသ့ၣ် မ့ၢ်စံးကတိၤနီၢ်သးတၢ်စူၢ်တၢ်နာ်အဂ့ၢ်အကျိၤန့ၣ် တၢ်လီၤသးစဲတအိၣ်, ဒီးစံးကတိၤဝဲဒ်ပှၤမၤလိတၢ်ဖိအသိးန့ၣ်လီၤ. ရိန့း စံးဝဲလၢ “ယဃ့ထုကဖၣ်ကယဲၢ်တၢ်ထုကဖၣ်အလံာ် ခဲလၢာ်, ဘၣ်ဆၣ်ယတဒိးန့ၢ်တၢ်စံးဆၢ လၢကစၢ်ယွၤအအိၣ်န့ၣ်ဘၣ်” လီၤ.

အဝဲစးထီၣ်မၤလိလံာ်စီဆှံ, ဒီးတဆီဘၣ်တဆီ စူၢ်က့ၤနာ်က့ၤကစၢ်ယ့ၣ်ရှူး ဒ်တၢ်အုၣ်က့ၤခီၣ်က့ၤကစၢ် တဂၤန့ၣ်လီၤ. ရိန့း ပာ်ဖျါထီၣ်က့ၤအကတီၢ်, ပာ်လီၤအသး လၢကစူၢ်က့ၤနာ်က့ၤကစၢ်ယ့ၣ်ရှူးအဂ့ၢ် “လၢ ယသးပူၤယနၢ်ဟူဘၣ်တၢ်ကလုၢ်သီၣ်ထီၣ်ဖျိဖျိဖျါဖျါ, ‘နနၢ်ဟူတ့ၢ်လံ, နထံၣ်တ့ၢ်လံ, လၢလၢပှဲၤပှဲၤလံ. အကတီၢ်အံၤမ့ၢ်နကဘၣ်စူၢ်က့ၤနာ်က့ၤတၢ်’ န့ၣ်လီၤ.” ဘၣ်ဆၣ် ရိန့း ဘၣ်ကွၢ်ဆၢၣ်မဲာ်ဒီးတၢ်ဂ့ၢ်ကီ, ဟဲခီဖျိလၢအပၢ်န့ၣ်လီၤ. အဝဲပာ်ဖျါထီၣ်က့ၤ “ယပၢ်စံးဆၢမၤဆၢတၢ်န့ၣ် လီၤဂာ်ဒ်သိး ဘဲးစူဘံယဲး (Vesuvius) ကစၢၢ်မ့ၣ်အူပိၢ်ဖးန့ၣ်လီၤ.”

လူၤ ၁၂:၂၅ ပာ်ဖျါဝဲ ဖဲလၢကစၢ်ယ့ၣ်ရှူးအိၣ်မူအိၣ်ဂဲၤလၢဟီၣ်ခိၣ်ချၢအကတီၢ်, ပှၤဂီၢ်မုၢ်တဖၣ်လူၤပိာ် အခံန့ၣ်လီၤ. ပှၤဂီၢ်မုၢ် တဖၣ် မ့ၢ်လူၤကွၢ်ဃုတၢ်မနုၤလဲၣ်န့ၣ် ပတသ့ၣ်ညါဘၣ်ဆၣ်, မ့မ့ၢ်ကစၢ်ယ့ၣ်ရှူးန့ၣ် လူၤကွၢ်ဃုအပျဲၢ်အဘီၣ်န့ၣ်လီၤ. ဖဲအံၤတၢ်ကဲ ကစၢ်ယ့ၣ်ရှူး အပျဲၢ်အဘီၣ်စံးတၢ်န့ၣ် အိၣ်ဒီးအပှ့ၤကလံၤ န့ၣ်လီၤ. အဆၢဖိ ၂၆ အပူၤကစၢ်ယ့ၣ်ရှူးစံးဝဲ, “ပှၤတဂၤဂၤ မ့ၢ်ဟဲဆူယအိၣ်, ဒီးတသးဟ့ဘၣ် အမိၢ်ဒီး အပၢ်, ဒီးအဖိအမါ, ဒီးအဖိအလံၤ, ဒီးအဒီပုၢ်ဝဲၢ်မုၣ်, ဒီးအဒီပုၢ်ဝဲၢ်ခွါ, ဒီးအသးသမူဒၣ်ဝဲစ့ၢ်ကီးဘၣ်ဒီး, ကဲထီၣ်ယပျဲၢ်ယဘီၣ်တသ့ဘၣ်” န့ၣ်လီၤ. ဒီးအဆၢဖိ ၂၈ အပူၤ, စံးဘၣ်ပှၤဂီၢ်မုၢ်လၢ တၢ်တ့ဒုးအိၣ်ထီၣ် တၢးထီတဖျၢၣ်အဂ့ၢ်, ဒီးသံကွၢ်ဝဲ, “တဆ့ၣ်နီၤဆိဒီးဂံၢ်ကွၢ်ဝဲ, မ့ၢ်အတၢ်အိၣ်လၢဧါ, တလၢလဲၣ်န့ၣ် မ့ၢ်မတၤတဂၤလဲၣ်” န့ၣ်လီၤ. တၢ်လၢကစၢ်ယ့ၣ်ရှူးအဲၣ်ဒိးစံးဝဲန့ၣ် တမ့ၢ်လၢ ပကဘၣ်သးဟ့ ပဟ့ၣ်ဖိ ဃီဖိနီၢ်နီၢ်ဘၣ်. လၢတၢ်အံၤအလီၢ်န့ၣ် ပကဘၣ် ဃုထၢဆိအီၤ, လၢကယဲၢ်တၢ်ခဲလၢာ်အဖီခိၣ်န့ၣ်လီၤ. အဆၢဖိ ၃၃ အပူၤ ကစၢ်ယ့ၣ်ရှူးစံးဝဲ “ပှၤလၢသုကျါအံၤမ့ၢ်တညိကွံၢ်ဘၣ် တၢ်ခဲလၢာ်ဒီး, ကဲထီၣ်ယပျဲၢ် ယဘီၣ်တသ့ဘၣ်နီတဂၤဘၣ်” န့ၣ်လီၤ.

ရိန့း အဲၣ်ဘၣ်အဟံၣ်ဖိဃီဖိနီၢ်နီၢ်ဘၣ်ဆၣ် အဝဲမၤကတၢၢ်အတၢ်ကတိၤ, “တၢ်အပှ့ၤကလံၤ, ကမ့ၢ်ဝဲ ထဲလဲၣ်ဂ့ၤထဲလဲၣ်ဂ့ၤ, ယဆိကမိၣ်လၢ ယဘၣ်ဟ့ၣ်တၢ်အပှ့ၤကလံၤန့ၣ် ကြၢးဝဲဘၣ်ဝဲဒၣ်န့ၣ်လီၤ.” နကလူၤပိာ်ကျဲလၢ ကစၢ်ယ့ၣ်ရှူးအတၢ်နဲၣ်ဆှၢနၤအဂီၢ်, တၢ်လၢနကဘၣ်စူးကွ့ၢ်ညိကွံၢ်တၢ်န့ၣ် ကမ့ၢ် တၢ်မနုၤတဖၣ်လဲၣ်.