ယသၣ်မံယီၤဖိမံးကံၣ် (Mickey) အမဲာ်ချံဆါအဃိ, ယဘၣ်တ့ၢ်နုာ်ကသံၣ်ထံလၢ အမဲာ်ချံပူၤကိးနံၤဒဲး န့ၣ်လီၤ. ဖဲယပာ်အီၤလၢ တၢ်လုၣ်ထံလီၢ်ဒၢး စီၣ်ဘံၣ်ခိၣ်လိၤန့ၣ်ဒီး, ဆ့ၣ်နီၤဝဲ ဒီးကွၢ်ထီၣ်ယမဲာ်လၢတၢ်ပျံၤ တၢ်ဖုးဒီး အိၣ်ဃိကလာ်လၢယကတ့ၢ်နုာ် ကသံၣ်ဖီၣ်ထံအဂီၢ်န့ၣ်လီၤ. ယကတိၤကသွံတၢ်ဒီးအီၤ ‘ပိာ်ခွါဖိလၢအနၢ်လိၤ’ န့ၣ်လီၤ. ယမၤအီၤတၢ်မနုၤလဲၣ်န့ၣ် တသ့ၣ်ညါဝဲဘၣ်ဆၣ်, အဝဲတဃ့ၢ်စံၣ်ဖျိး မ့တမ့ၢ် တကွးမၤဆါယၤဘၣ်. လၢတၢ်အံၤအလီၢ်န့ၣ် အဝဲဟဲသုးဘူးအသးဆူယအိၣ်, ပှၤလၢအမၤကီ မၤခဲအီၤအအိၣ်န့ၣ်လီၤ. သ့ၣ်ညါဝဲလၢနာ်န့ၢ်ယၤသ့အဃိန့ၣ်လီၤ.

ဖဲစီၤဒၤဝံးကွဲး ထါစံးထီၣ်ပတြၢၤ ၉ န့ၣ် ဘၣ်သ့ၣ်သ့ၣ် အသးကလၢၢ်ဘၣ်တ့ၢ်လံ ယွၤအတၢ်အဲၣ်, ဒီးအတၢ်တီတၢ်လိၤန့ၣ်လီၤ. အဆၢဖိ ၃-၆ န့ၣ်စံးဝဲ, လၢတၢ်ကဒီတဒၢအီၤ လၢအဒုၣ်ဒါတဖၣ်, ဒီးယွၤကမၤ တၢ်လၢအဂီၢ်န့ၣ်, အဝဲဃၣ်အသးဆူ ကစၢ်ယွၤအအိၣ်န့ၣ်လီၤ. ဖဲလၢစီၤဒၤဝံးလိၣ်ဘၣ်တၢ်မၤစၢၤ တဘျီလၢ်လၢ်, ကစၢ်ယွၤ တလဲၤကပာ်အီၤနီတစုဘၣ်န့ၣ်လီၤ. လၢတၢ်န့ၣ်အဃိ, စီၤဒၤဝံးသ့ၣ်ညါဝဲလၢ ကစၢ်ယွၤမ့ၢ်ကစၢ်လၢ အလၢပှဲၤဒီးအစိကမီၤ, ဒီးတီဝဲလိၤဝဲ, အဲၣ်တၢ်ကွံတၢ် ဒီးအကလုၢ်တီတဂၤအဃိ, စီၤဒၤဝံးနာ်န့ၢ်အီၤန့ၣ်လီၤ. စီၤဒၤဝံးသ့ၣ်ညါဝဲလၢ ကစၢ်ယွၤမ့ၢ်ကစၢ်လၢတၢ်နာ်န့ၢ်အီၤသ့တဂၤန့ၣ်လီၤ.
စးထီၣ်လၢမုၢ်တနၤ, ဖဲယထံၣ်န့ၢ်မံးကံၣ်ဖိ ဒ်သၣ်မံယီၤဆံးဆံးဖိတဒု, လၢအသၣ်ဝံၤလီၤဒိလၢ ကျဲခိၣ်န့ၣ်, ဖဲအဆူးဆါတဘျီလၢ်လၢ် ယဘၣ်ကဟုကယာ်အီၤန့ၣ်လီၤ. ယမ့ၢ်မၤအီၤတၢ်တမံၤမံၤ, ဒီးအဝဲ မ့ၢ်တနၢ်ပၢၢ်ဝဲဒၣ်လဲာ်, သ့ၣ်ညါဝဲလၢ နာ်န့ၢ်ယၤသ့န့ၣ်လီၤ. ဒ်န့ၣ်အသိး, ပမ့ၢ်တသ့ၣ်ညါနၢ်ပၢၢ် ယွၤမၤတၢ် တဖၣ်လၢပဂီၢ်ဒၣ်လဲာ် တၢ်သ့ၣ်နီၣ်ထီၣ်က့ၤ ယွၤတီဝဲလိၤဝဲလၢပဝဲကိးဂၤအဂီၢ်, ဒီးအသကဲာ်ပဝးန့ၣ် ကမၤစၢၤပှၤ ဒ်သိးပကနာ်န့ၢ်အီၤအဂီၢ်န့ၣ်လီၤ. လၢပသးသမူတၢ်ကီတၢ်ခဲ အဆၢကတီၢ်တဖၣ်အပူၤန့ၣ် မ်ပကနာ်သကိးကစၢ်ယွၤဆူညါန့ၣ်တက့ၢ်.