ကျးလၢပှၤဆါတၢ်အလီၢ်လံၤတဖၣ်အလီၢ်န့ၣ်, မ့ၢ်နကွၢ်ဃုပိးလီ လၢအပှ့ၤကလံၤဘၣ်ဘၣ်, ဒီးနမံမီၢ်နဲ လၢနကဒိးန့ၢ် တၢ်လၢအလုၢ်အပှ့ၤဒိၣ်အါအါဂီၢ်ဂီၢ်န့ၣ်ဧါ. ဖဲကီၢ်အမဲရကၤ, ကီၢ်စဲၣ်ခီၣ်နဲးတံးကး (Connecticut) န့ၣ် ပှၤပှ့ၤ တရူးဖီကိသလၢၣ်တဖျၢၣ်လၢပျၢၤ, ဖဲပှၤဆါတၢ်လီၢ်လံၤတဖၣ်အလီၢ်, ဒီးဟ့ၣ်ဘၣ်ဝဲ ၃၅ ဒီလၣ်န့ၣ်, ဘၣ်တၢ်ဆါက့ၤအီၤ ဖဲ၂၀၂၁ နံၣ် လၢပှၤဆါတၢ်ပှ့ၤတၢ် လၢကမျၢၢ်ကျါ ပှၤဟ့ၣ်အပှ့ၤကလံၤအအါကတၢၢ် (Auction), ဒီးဒိးန့ၢ် စ့ဒီလၣ် ၇၀၀,၀၀၀ န့ၣ်လီၤ. ဖီကိသလၢၣ်အံၤ မ့ၢ်စံၣ်စိၤနုာ်ပိးလီ, လီၤလီၤဆီဆီလၢနံၣ်ကယၤတဆံယဲၢ်အကတီၢ်, ဒီးတၢ်လၢပှၤကဃုမၤန့ၢ်အီၤညီညီ တသ့ဘၣ်န့ၣ်လီၤ. ပှၤတနီၤနီၤဆိကမိၣ်ဝဲလၢ တၢ်အလုၢ်အပှ့ၤဆံးစှၤတဖၣ် ကဲထီၣ်တၢ်လၢ အလုၢ်အပှ့ၤ အိၣ်ဝဲဒိၣ်ဒိၣ်မုၢ်မုၢ်အံၤန့ၣ် ကဲထီၣ်တၢ်ဒုးဟ့ၣ်ပလီၢ်တၢ်လၢအလီၤကမၢကမၣ်န့ၣ်လီၤ.
တၢ်နာ်ကစၢ်ယ့ၣ်ရှူးစံးတၢ်န့ၣ် မ့ၢ်တၢ်စူၢ်က့ၤနာ်က့ၤပှၤတဂၤလၢ အဘၣ်တၢ်ညိကွံာ်အီၤလၢ ပှၤအါဂၤ လီၤန့ၣ် စီၤပ့းတရူးကွဲးဒုးသ့ၣ်ညါ ပှၤစူၢ်က့ၤနာ်က့ၤတၢ်ဖိတဖၣ်လၢ အလီၤပြံလီၤပြါဆူဟီၣ်ခိၣ်ဒီဘ့ၣ် န့ၣ်လီၤ. ပှၤယူဒၤဖိတၢ်ဘူၣ်တၢ်ဘါခိၣ်နၢ်အါဂၤ သးဟ့ကစၢ်ယ့ၣ်ရှူး, ဒီးရိမ့ၤပဒိၣ်ပပှၢ်တဖၣ်ပျၤထီအီၤ လၢထူၣ်စုညါအလိၤန့ၣ်လီၤ. မ့ၢ်လၢကစၢ်ယ့ၣ်ရှူးတမၤပှဲၤ ပှၤအါဂၤအတၢ်မုၢ်လၢ်, ဒီးအတၢ်မိၣ်န့ၢ်သးလီၤ တၢ်တဖၣ်အဃိ အဝဲသ့ၣ်အဂီၢ် ကစၢ်ခရံာ်န့ၣ် ဖျါလၢအလုၢ်အပှ့ၤတအိၣ်ဘၣ်န့ၣ်လီၤ. ဖဲလၢပှၤအါဂၤ မ့ၢ်တတူၢ်လိာ် ကစၢ်ယ့ၣ်ရှူးအလုၢ်အပှ့ၤဘၣ်ဆၣ်, ၁ပ့း ၂:၄ ပာ်ဖျါဝဲ အဝဲမ့ၢ် ‘တၢ်လုၢ်ဒိၣ်ပှ့ၤဒိၣ်, ဒီးဘၣ်တၢ်ဃုထၢအီၤလၢယွၤ’ န့ၣ်လီၤ. ၁ပ့း ၁:၁၈-၁၉ အပူၤ ပကထံၣ်ဘၣ် လၢပဂီၢ် ကစၢ်ယ့ၣ်ရှူး အလုၢ်အပှ့ၤန့ၣ် အကတၢၢ်တအိၣ်, လုၢ်ဒိၣ်ပှ့ၤဒိၣ်န့ၢ်ဒံး ထူ မ့တမ့ၢ် စ့ န့ၣ်လီၤ. ၁ပ့း ၂:၆ အပူၤန့ၣ် ပအိၣ်ဒီး တၢ်အုၣ်ကီၤ လၢအမ့ၢ် ကယဲၢ်ပှၤတဂၤလၢ်လၢ်လၢ ဃုထၢစူၢ်က့ၤနာ်က့ၤအီၤတဖၣ် တမဲာ်ဆှးဘၣ်လၢ အတၢ်ဃုထၢအံၤအဃိ နီတစုဘၣ်န့ၣ်လီၤ.
ဒ်အဆၢဖိ ၁၀ ပာ်ဖျါဝဲအသိး, ဖဲပှၤအါဂၤသမၢကစၢ်ယ့ၣ်ရှူး ဒ်ပှၤလၢအလုၢ်အပှ့ၤတအိၣ်အကတီၢ်, ပမ့ၢ်ကွၢ်လၢကျဲအဂၤတဘိန့ၣ် ကစၢ်ယွၤအသးစီဆှံ မၤစၢၤပှၤသ့ဝဲဒၣ်လၢ ပကထံၣ် ကစၢ်ယ့ၣ်ရှူးခရံာ် အတၢ်ဟ့ၣ်လၢပထိၣ်တဲာ်အပှ့ၤကလံၤတန့ၢ်, လၢဟ့ၣ်လီၤဝဲဆူပှၤကိးဂၤဒဲး, လၢအမ့ၢ် တၢ်ကွဲမုာ် လုၢ်ဒိၣ်ပှ့ၤဒိၣ်, ဒ်သိးကကဲထီၣ် ယွၤအဒူၣ်ဖိထၢဖိအဂီၢ်န့ၣ်လီၤ.
