တၢ်ဒုးနဲၣ်ခီဖျိတၢ်ဒ့သးဝံၣ် ဟါမ့တၢၣ် (Hamilton) အပူၤ, ကီၢ်အဲကလံး စီၤပၤ ကၠီးရှ် (George) သၢဂၤတဂၤန့ၣ်, ဘၣ်တၢ်ပာ်ဖျါထီၣ်အီၤ လၢတၢ်ဂီၤကွံးကွးအလီၤနံၤ ဒ်အမ့ၢ်ပှၤအၢပှၤသီ, ပှၤအသးတထံ တဂၤန့ၣ်လီၤ. ဘၣ်ဆၣ်, တၢ်ကွဲးအဝဲအသးသမူအဂ့ၢ်အသီတဘ့ၣ်ပာ်ဖျါထီၣ်လၢ စီၤပၤကၠီးရှ်န့ၣ် တမ့ၢ် စီၤပၤအၢသီတဂၤ ဒ် တၢ်ဒုးနဲၣ် “ဟါမ့တၢၣ်” မ့ၢ်ဂ့ၤ အမဲရကၤလံာ်ဘိးဘၣ်ရၤလီၤတၢ်သဘျ့ (America’s Declaration of Independence) မ့ၢ်ဂ့ၤ ပာ်ဖျါတ့ၢ်ဝဲအသိးဘၣ်န့ၣ်လီၤ. ဒ်ပှၤအမဲရကၤဖိတဖၣ်စံးဝဲ အသိး စီၤပၤ ကၠီးရှ် မ့မ့ၢ် ပှၤအသူၣ်ကိၤသးကိၤ,ပှၤအၢသီန့ၣ်ဒီး အဝဲကမၤကတၢၢ်ကွံာ် ပှၤလၢအဂုၤကျဲးစၢး ထံသဘျ့ကီၢ်သဘျ့ ခီဖျိလၢတၢ်စုဆူၣ်ခီၣ်တကး, ကမၤဟးဂီၤတၢ်ခဲလၢာ်န့ၣ်လီၤ. ဘၣ်ဆၣ်, မ့ၢ်လၢအဝဲ အိၣ်ဒီး “တၢ်ပာ်သူၣ်ပာ်သး လုၢ်လၢ်အဂ့ၢ်အဝါ” အဃိ စီၤပၤ ကၠီးရှ် ကီၤသူၣ်ကီၤသး, ဒီးပၢၤဃာ်အသး န့ၣ်လီၤ. စီၤပၤ ကၠီးရှ် သံထွဲဝဲလၢ တၢ်သးအုးသးဖှီၣ်အပူၤဧါ, အဝဲမ့ၢ်ပၢဆှၢ အထံဖိကီၢ်ဖိတဖၣ် ဆူၣ်ဆူၣ် ကိၤကိၤန့ၣ်ဒီး အထံကီၢ်မ့ၢ်ကအါထီၣ်လဲၢ်ထီၣ်ဧါန့ၣ်, မ့ၢ်မတၤကသ့ၣ်ညါလဲၣ်.

တၢ်ကမၤအသးတမ့ၢ်ဒ်န့ၣ်သ့ၣ်သ့ၣ်ဘၣ်. လံာ်စီဆှံအပူၤပဖးဘၣ် စီၤပၤယဟိရၣ် လၢအမၤဂၢၢ် မၤကျၢၤ အဘီမုၢ်လီၢ်ပစိၢ်အဂ့ၢ်န့ၣ် ၂ကွဲး ၂၁:၄ ပာ်ဖျါဝဲ “မၤသံအဒီပုၢ်ဝဲၢ်လၢနးခဲလၢာ် ဒီးပှၤအံၣ်စရ့လးဖိ အပဒိၣ်ဖးဒိၣ် အကျါတဖၣ်” န့ၣ်လီၤ. အဆၢဖိ ၆ န့ၣ်စံးဝဲ စီၤပၤယဟိရၣ် “မၤတၢ်အၢလၢ ယွၤအမဲာ်ညါလီၤ” န့ၣ်လီၤ. အတၢ်ပၢဆှၢထံကီၢ်အၢအၢသီသီန့ၣ် မၤလီၤဖးအီၤဒီး ပှၤဂီၢ်မုၢ် အဆၢဖိ ၁၉ ပာ်ဖျါထီၣ် အတၢ်သံ သအုၣ်သပှီၤဒၣ်လဲာ် ပှၤတသးအုး, ပှၤတဟီၣ် ဒီး “တဆိၣ်ကဲၤဘၣ်တၢ် ဒ်အပၢ်တဖၣ် အတၢ်ဆိၣ်ကဲၤအသိးန့ၣ်ဘၣ်” လီၤ.

ပှၤကူၣ်သ့လၢတၢ်စံၣ်စိၤတဲစိၤ ကတိၤဂ့ၤလိာ်ဘှီလိာ်တၢ်လၢ စီၤပၤ ကၠီးရှ် မ့ၢ်ပှၤလၢ အသူၣ်ကပုာ် သးကပုာ်ကဲာ်ဆိးတဂၤဒီး, မ့မ့ၢ် စီၤပၤယဟိရၣ်မ့ၢ် ပှၤလၢအသူၣ်ကိၤအသးကိၤ, ဒီးအၢဝဲသီဝဲနီၢ်နီၢ်တဂၤ န့ၣ်လီၤ. ယိၤ ၁:၁၄ စံးဝဲ, စီၤပၤကစၢ်ယ့ၣ်ရှူးမ့ၢ် စီၤပၤအဂ့ၤကတၢၢ်တဂၤ, လၢ “အလၢပှဲၤဒီး တၢ်ဘျုး တၢ်ဖှိၣ်, ဒီးတၢ်မ့ၢ်တၢ်တီ” န့ၣ်လီၤ. ကစၢ်ခရံာ်အတၢ်မုၢ်လၢ်တဖၣ် မ့ၢ်တၢ်လၢအဂၢၢ်အကျၢၤ, (အဲၣ်ဒိးဝဲ တၢ်မ့ၢ်တၢ်တီ), ဒီးအဝဲဖိးဟု ပှၤလၢအလီၤဃံၤ (မၤအါထီၣ်,မၤလဲၢ်ထီၣ်အဘျုးအဖှိၣ်) န့ၣ်လီၤ. ကစၢ် ယ့ၣ်ရှူးကိးဝဲ ပှၤလၢအစူၢ်က့ၤနာ်က့ၤအီၤတဖၣ် ကလူၤပိာ်အတၢ်နဲၣ်ဆှၢပှၤန့ၣ်လီၤ. ခီဖျိလၢအဝဲ အသး မုၢ်စီဆှံ အတၢ်နဲၣ်ဆှၢပှၤအပူၤ, ကစၢ်ယ့ၣ်ရှူးကမၤစၢၤပှၤဒ်သိးပကပိာ်အခံအဂီၢ်န့ၣ်လီၤ.