ယမိၢ်ဒီရသ့ၣ် (Dorothy) တဂၤ အတၢ်အိၣ်ဆူၣ်အိၣ်ချ့ဂ့ၤဝဲဒၣ် ဖဲလၢအဆၢကတီၢ်မတၤလဲၣ်န့ၣ် ယတသ့ၣ်နီၣ်က့ၤလၢၤဘၣ်. တူၢ်ဘၣ်ခီၣ်ဘၣ်ဝဲဆံၣ်ဆၢတၢ်ဆါ အါနံၣ်အါလါ ဒီးအဝဲအသွံၣ်ပူၤ အံသၣ်ဆၢအအါအစှၤ, ဆီတလဲၤသးချ့မးန့ၣ်လီၤ. တၢ်ဆါအဂၤတဖၣ်အါထီၣ်, ဒီးအကလ့ၣ်လၢအဟးဂီၤတဖၣ်လိၣ်ဘၣ် တၢ်ကသ့မၤကဆှီအီၤထီဘိန့ၣ်လီၤ. အဝဲအနၢၢ်ဘိတဖၣ်ဟးဂီၤ, ဒီးဃံကွဲကၢ်ဝဲဒၣ်အဃိ ဘၣ်စူးကါ ပၣ်လီၢ်ဆ့ၣ်နီၤလ့ၣ်ဖိန့ၣ်လီၤ. အမဲာ်ချံထံၣ်တၢ်န့ၣ် အဂံၢ်စၢ်လီၤ, ဒီးဘူးထီၣ်လၢအမဲာ်ချံ တထံၣ်တၢ်လၢၤဘၣ်န့ၣ်လီၤ.
အနီၢ်ခိက့ၢ်ဂီၤ မ့ၢ်ဟးဂီၤဝဲ ဘၣ်ဆၣ်, လၢယမိၢ် အတၢ်ထုကဖၣ်တၢ်တကပၤ ဆူၣ်ထီၣ်ဝဲ ကွ့ၢ်ကွ့ၢ်န့ၣ်လီၤ. ယမိၢ်စူးကါ နၣ်ရံၣ်အါမး လၢတၢ်ထုကဖၣ်န့ၣ် တၢ်လၢပှၤဂုၤပှၤဂၤအဂီၢ် ဒ်သိးကသ့ၣ်ညါ ဒီးကလဲၤခီဖျိကလၢၢ်ဘၣ် ယွၤအတၢ်အဲၣ်အဂီၢ်န့ၣ်လီၤ. ယွၤအကလုၢ်ကထါလၢ အလုၢ်ဒိၣ်ပှ့ၤဒိၣ်တဖၣ် ဆၢဒိၣ်ထီၣ်ဒိၣ်ထီၣ်ဝဲလၢ အဂီၢ်န့ၣ်လီၤ. တချုးလၢ အဝဲအမဲာ်ချံတၢ်ထံၣ် လီၤမၢ်ကွံာ်ဝဲဒၣ်န့ၣ်, အဝဲကွဲးလံာ်တဘ့ၣ်ဆူ အဒ့မုၣ် မၣ်ကၠိၣ်ရံၣ်(Marjorie)အအိၣ်လၢ အပာ်ဃုာ်ဒီး လံာ်စီဆှံအဆၢ လၢ ၂ ကရံၣ်သူး ၄:၁၆အပူၤ “ပတလီၤဘှံးဘၣ်, ပနီၢ်လၢခိအံၤ မ့ၢ်ဟးဂီၤဘၣ်ဆၣ်ဒီး ပနီၢ်လၢညါန့ၣ် ဘၣ်တၢ်မၤထီၣ်က့ၤအီၤ တနံၤဘၣ်တနံၤလီၤ” န့ၣ်လီၤ.
“တၢ်လီၤဘှံးလီၤတီၤလၢပှၤဟီၣ်ခိၣ်ဖိအဂီၢ် ညီဝဲဒၣ်ထဲလဲၣ်န့ၣ်” ပှၤတၢ်မၢဖိစီၤပီလူးသ့ၣ်ညါဝဲန့ၣ်လီၤ. ၂ ကရံၣ် ၁၁:၂၃-၂၉ အပူၤ, အဝဲပာ်ဖျါထီၣ် အတၢ်အိၣ်မူ – ဒ်အမ့ၢ် တၢ်လီၤပျံၤလီၤဖုးတမံၤ, ဘၣ်တၢ်ဒိတီၢ် ဒီးဘၣ်တၢ်အိၣ်ဖှီၣ်အိၣ်ယာ်တဖၣ်န့ၣ်လီၤ. ဘၣ်ဆၣ် အဝဲထံၣ် တၢ်နးတၢ်ဖှီၣ်တဖၣ်အံၤ ဒ်အမ့ၢ် တၢ်ကမၤအသး တစိၢ်တလီၢ်ဖိန့ၣ်လီၤ. ဒီးအဝဲဟ့ၣ်ဂံၢ်ဟ့ၣ်ဘါပှၤ လၢ ၂ကရံၣ် ၄:၁၇-၁၈ အပူၤ ပသုတဆိကမိၣ်ထီၣ် ထဲတၢ်လၢ ပထံၣ်သ့ တဖၣ်ဘၣ်. မ့ၢ်မး ပကဆိကမိၣ်စ့ၢ်ကီး တၢ်လၢ ပထံၣ်လၢ မဲာ်ချံတသ့တန့ၢ်တဖၣ် – လၢအမ့ၢ် တၢ်မူ အထူအယိာ် န့ၣ်လီၤ.
တၢ်လၢအလီၤဘၣ်ပှၤ ဒ်လဲၣ်ဒ်လဲၣ်ဂ့ၤ, တၢ်အဲၣ်ပၢ်သးဘိယွၤအံၤ မၤသီထီၣ်က့ၤ ပနီၣ်သးကိးမုၢ်ဒဲးန့ၣ်လီၤ. ယွၤအိၣ်ဒီးပှၤန့ၣ် မ့ၢ်တၢ်လၢ အလီၤတံၢ်လီၤဆဲးန့ၣ်လီၤ. ခီဖျိတၢ်ထုကဖၣ် လၢအမ့ၢ်သးအတၢ်ဟ့ၣ်အဃိ မ့ၢ်မးယွၤအိၣ်ဘူးဒီးပှၤန့ၣ်လီၤ. ဒီးယွၤအၢၣ်လီၤအီၤလီၤပှၤလၢ ကဒုးဆူၣ်ထီၣ် ပဂံၢ်ပဘါ ဒီးကဟ့ၣ်ပှၤ တၢ်မုၢ်လၢ်ဒီး တၢ်သးခုန့ၣ် အမ့ၢ်ဝဲတီဝဲဒၣ်ထီဘိန့ၣ်လီၤ.
