ဖဲ ၁၈၉၂ နံၣ်န့ၣ်, ဟဲဘၢး (Hamburg) အပှၤဝ့ၢ်ဖိလၢအအိၣ်ဒီးဟၢဖၢလူတၢ်ဆါတဂၤ, လၢတၢ်တဆိကမိၣ်ဘၣ်အပူၤ ရၤလီၤဘၣ်ဝဲ တၢ်ဆါအဃၢ်, ခီဖျိလၢထံကျိ အဲး(လ) (Elbe), ဆူဟဲဘၢး ဒီတဝ့ၢ်န့ၣ်လီၤ. ထံကျိအံၤ ကီၢ်ကၠၢမနံၣ်ဒီကီၢ်အဂီၢ် တၢ်နီၤဟ့ၣ်ထံဧိၤနိဧိၤအဂံၢ်ထံးန့ၣ်လီၤ. ပှၤဝ့ၢ်ဖိသံဝဲ အဂၤတကလး လၢစှၤနွံအတီၢ်ပူၤန့ၣ်လီၤ. တၢ်လၢအပူၤကွံာ် ဃိးနံၣ် အဆၢကတီၢ်, ပှၤကၠၢမနံၣ်ဖိ, ပှၤကူၣ်သ့ လၢတၢ်ဖိဃၢ်ဆံးတကပၤ, လၢအမ့ၢ် ရီဘၢး ကိး(ခ်) ဃုသ့ၣ်ညါဘၣ်ဝဲလၢ ဟၢဖၢလူတၢ်ဆါအဃၢ်ဆံးဆံးဖိ တဖၣ်အံၤန့ၣ် ကူရၤလီၤအသးသ့ ခီဖျိလၢထံကျါနိကျါန့ၣ်လီၤ. ကိး(ခ်) အတၢ်ပာ်ဖျါအံၤကဲထီၣ် တၢ်ဟ့ၣ်သဆၣ် လၢယူၤရပၤဝ့ၢ်ဒိၣ်ဝ့ၢ်ထီအပှၤဘၣ်မူဘၣ်ဒါတဖၣ် ကစူးကါအါထီၣ်ကျိၣ်စ့ လၢတၢ်မၤ ကဆှီထံဧိၤနိဧိၤအတၢ်ရဲၣ်တၢ်ကျဲၤသနူ ဒ်သိးကဒီတဒၢထံအဂီၢ်န့ၣ်လီၤ. ဘၣ်ဆၣ် ဟဲဘၢး အပှၤဒိၣ်စိ ဒိၣ်ကမီၤတဖၣ် တမၤတၢ်နီတမံၤဘၣ်. ပှၤဘၣ်မူဘၣ်ဒါတဖၣ်စံးဝဲလၢ တၢ်လၢာ်ဘူၣ်လၢာ်စ့ၤအါ, ဒီးတၢ်သးဒ့ဒီလၢစဲအ့ၣ်အတၢ်ထံၣ်အဃိ, ဖဲဟဲဘၢးအဝ့ၢ်န့ၣ် ကဘၣ်ကွၢ်ဆၢၣ်မဲာ်ဒီးတၢ်သံတၢ်ပှၢ်ဖးဒိၣ် ဒၣ်လဲာ် အဝဲသ့ၣ် လဲၤကပာ်ဝဲတၢ်ဒုးပလီၢ်တဖၣ်အံၤန့ၣ်လီၤ.

လံာ်ကတိၤဒိအပူၤ အိၣ်ပှဲၤဒီးတၢ်ကူၣ်သ့အါမး လၢအစံးဘၣ်ပှၤဒ်သိးလၢ အထံၣ်တၢ်ကီတၢ်ခဲ ဘၣ်ဆၣ် စူးကွံၣ်ညိကွံာ်တၢ်ကမၤထွဲတၢ်အဂီၢ်န့ၣ်လီၤ. ကတိၤ ၂၇:၁၂ စံးဝဲ “ပှၤကူၣ်တၢ်ဘၣ်န့ၣ် ထံၣ်ဘၣ် တၢ်အၢဒီးပာ်တဒၢအသးလီၤ.” ဖဲကစၢ်ယွၤမၤစၢၤပှၤလၢပကထံၣ်စိ တၢ်ကီတၢ်ခဲလၢအကဟဲတဖၣ်န့ၣ်ဒီး, ညီနုာ်ပကဘၣ်သ့ၣ်ညါဆိဝဲဒၣ်လၢ ပကဘၣ်ဘှါဆှဲတၢ်ဂ့ၢ်ကီတဖၣ်အံၤန့ၣ်န့ၣ်လီၤ. ဆီတလဲကွံာ် ပတၢ်အိၣ်သး လၢတၢ်ကူၣ်သ့အပူၤ မ့ၢ်ဂ့ၤ အိၣ်ကတဲာ်ကတီၤပာ်ပသး, ဒီးဒီတဒၢပသးလၢ ကစၢ်ယွၤအတၢ် ဟ့ၣ်ပလီၢ်တဖၣ်မ့ၢ်ဂ့ၤ ပကဘၣ်မၤတၢ်တမံၤမံၤန့ၣ်လီၤ. ပမ့ၢ်တမၤတၢ်တၢ်နီတမံၤဘၣ်န့ၣ်ဒီး ပကမ့ၢ်ဒၣ် ပှၤလၢအသးတဆးတဂၤန့ၣ်လီၤ. ပဝဲကိးဂၤပလီၤတူာ်လီၤကာ်သ့ဝဲဒၣ်လၢ ပပျဲလဲၤပူၤကွံာ် တၢ်ဟ့ၣ်ပလီၢ် အတၢ်ပနီၣ်တဖၣ်, ဒီးဃ့ၢ်သဖှိနုာ်လီၤဘၣ်ဆူ တၢ်ဟးဂုၢ်ဟးဂီၤတဖၣ်အပူၤန့ၣ်လီၤ. ကတိၤ ၂၇:၁၂ စံးဝဲ “မ့မ့ၢ်ပှၤလၢအတမၤလိဘၣ်တၢ်န့ၣ် လဲၤဒၣ်တၢ်, ဒီးဘၣ်တၢ်နးတၢ်ဖှီၣ်လီၤ” န့ၣ်လီၤ.

ခီဖျိလၢလံာ်စီဆှံ, ဒီးလၢကစၢ်ယ့ၣ်ရှူးအသးသမူအပူၤန့ၣ်, ကစၢ်ယွၤဒုးနဲၣ်ပှၤကျဲလၢပကပိာ်ထွဲ, ဒီးဟ့ၣ်ပလီၢ်ပှၤတၢ်ကီတၢ်ခဲ, လၢပကဘၣ်ကွၢ်ဆၢၣ်မဲာ်သပှၢ်တၢၢ်န့ၣ်လီၤ. ပသးမ့ၢ်တဆးဘၣ်န့ၣ်ဒီး, ပကဃ့ၢ်နုာ်လီၤဘၣ်လိၤလိၤဆူ တၢ်ကမၤဟးဂီၤပှၤအလီၢ်အကျဲ, လၢအတအိၣ်ဒီးတၢ်ပျံၤတၢ်ဖုးန့ၣ်လီၤ. လၢတၢ်ကမၤအသးဒ်သိးအံၤအလီၢ်န့ၣ်, ဖဲကစၢ်ယွၤနဲၣ်ဆှၢပှၤ ခီဖျိလၢအဘျုးအဖှိၣ်န့ၣ်, မ်ပကမ့ၢ်ပှၤလၢ အဒိကနၣ်ယွၤအတၢ်ကူၣ်သ့. ဒီးဆီတလဲကွံာ်ပတၢ်လဲၤကျဲတဖၣ်န့ၣ်တက့ၢ်.