တၢ်အိၣ်ဖှိၣ်သရၣ် ကွၢ်စူၣ်ကွၢ်ထံ တၢ်စံၣ်တဲၤတဲလီၤ, ဒီးဖီၣ်ဃးဝဲ လံာ်ကဘျံးတဖၣ် ဘူးဘူးတံၢ်တံၢ် လၢအမဲာ်ချံ ဒ်သိးကထံၣ်ဘၣ်လံာ်မဲာ်ဖျၢၣ်တဖၣ်န့ၣ်လီၤ. အဝဲတထံၣ်လံာ်မဲာ်ဖျၢၣ်ဂ့ၤဂ့ၤအဃိ ဃုထၢဖး လံာ်ကျိၤလီၤတံၢ်လီၤဆဲး ဒီးဖးဖျါထီၣ်ဝဲအကလုၢ်န့ၣ် လၢတၢ်ထုးန့ၢ်သူၣ်သးတအိၣ်တၢ်အပူၤန့ၣ်လီၤ. ခီဖျိလၢ ကစၢ်ယွၤအသးစီဆှံ မၤတၢ်လၢ ကၠီနသၣ် အဲး(ဒ)ဝၢး စံၣ်တဲၤတဲလီၤတၢ်န့ၣ်အဃိ တၢ်မူထီၣ် ဂဲၤထီၣ်ဖးဒိၣ်အဆိကတၢၢ်တဘျီန့ၣ် ပှၤစူၢ်က့ၤနာ်က့ၤခရံာ် လၢအကထိတဖၣ်အကထိန့ၣ်လီၤ.
ဒ်သိးကမၤလၢပှဲၤ အတၢ်ပညိၣ်လၢလၢပှဲၤပှဲၤအဂီၢ် ကစၢ်ယွၤစူးကါကျိၤကျဲလၢ ပှၤတဆိကမိၣ် မုာ်လၢ်တ့ၢ်တဖၣ် တလီၢ်လီၢ်န့ၣ်လီၤ. တၢ်ကွဲးဘၣ်ထွဲဒီး ကစၢ်ယွၤအတၢ်ရဲၣ်တၢ်ကျဲၤ ဒ်သိးကထုးန့ၢ်မိၤန့ၢ် ပှၤဟီၣ်ခိၣ်ဖိ, လၢအလဲၤကမၣ်ကျဲတဖၣ်အဂီၢ်, ခီဖျိကစၢ်ယ့ၣ်ရှူးအတၢ်အဲၣ်ပှၤအဃိ, ဘၣ်သံဝဲလၢ သ့ၣ်ဖျၢၣ်ထူၣ်စုညါအလိၤအဂ့ၢ်န့ၣ်, စီၤပီလူးပာ်ဖျါထီၣ်လၢ ၁ ကရံၣ် ၁:၂၇ အပူၤ “မ့ၢ်ယွၤဃုထၢတၢ် ကလီကလီလၢဟီၣ်ခိၣ်ချၢ ဒ်သိးကမၤမဲာ်ဆှး ပှၤကူၣ်တၢ်သ့, ဒီးယွၤဃုထၢတၢ်ဂံၢ်စၢ်ဘါ လၢဟီၣ်ခိၣ်ချၢ ဒ်သိးအကမၤမဲာ်ဆှး ပှၤဂံၢ်ဆူၣ်ဘါဆူၣ်လီၤ” န့ၣ်လီၤ. ဟီၣ်ခိၣ်မုၢ်လၢ်ဝဲလၢ ယွၤအတၢ်ကူၣ်သ့န့ၣ် ကလီၤဂာ်ဒီး ပှၤဟီၣ်ခိၣ်ဖိအတၢ်ကူၣ်သ့, ဒီးကဘၣ်ဟဲဃုာ်ဒီးတၢ်သဟီၣ်ဆူၣ် လၢတၢ်တြီဆၢတန့ၢ်အပူၤ န့ၣ်လီၤ. ဘၣ်ဆၣ်လၢတၢ်အံၤအလီၢ်န့ၣ်, ကစၢ်ယ့ၣ်ရှူး ဟဲဝဲလၢတၢ်ဆီၣ်လီၤသး, ဒီးလၢတၢ်သညူးသပှၢ် အပူၤ ဒ်သိးကအုၣ်က့ၤခီၣ်က့ၤပှၤလၢပတၢ်ဒဲးဘး, ဒီးဒ်သိး အဆၢဖိ ၃၉ စံးဘၣ်ပှၤလၢ ကကဲထီၣ် “တၢ်ကူၣ်သ့ အဟဲလၢယွၤ- လၢအမ့ၢ်ပတၢ်မ့ၢ်တၢ်တီ, ပတၢ်စီတၢ်ဆှံ ဒီးတၢ်ပှ့ၤက့ၤတၢ်လၢပဂီၢ်” န့ၣ်လီၤ.
ကစၢ်အထူအယိာ်ဒီး ကစၢ်လၢအပှဲၤဒီး တၢ်ကူၣ်သ့တဂၤအံၤ ဟံးထီၣ်လိၣ်ထီၣ် ပှၤဟီၣ်ခိၣ်ဖိ ဖိသၣ်အက့ၢ်အဂီၤ, ဒီးဒိၣ်ထီၣ်, ဒိၣ်တုာ်ခိၣ်ပှဲၤဝဲ, ဒီးဒိးတူၢ်တၢ်နးတၢ်ဖှီၣ်, တူၢ်သံအသးလၢပဂီၢ်, ဒီးဂဲၤဆၢထၢၣ်သမူထီၣ်က့ၤ ဒ်သိးကဒုးနဲၣ်ပှၤကျဲဆူဟံၣ်, ဆူအအိၣ်န့ၣ်လီၤ. ကစၢ်ယွၤအဲၣ်စူးကါဝဲ တၢ်ဆီၣ်လီၤသးကျိၤကျဲတဖၣ်, ဒီးပှၤကညီတဖၣ် ဒ်သိးကမၤဝံၤတၢ်ဖံးတၢ်မၤဖးဒိၣ်, ပကမၤတၢ်မၤ လၢပဂံၢ်ပဘါတသ့တန့ၢ်နီတစုတဖၣ်အဂီၢ်န့ၣ်လီၤ. ပမ့ၢ်သးဆူၣ်သးအိၣ်န့ၣ်ဒီး, ကစၢ်ယွၤကစူးကါပှၤ သ့ၣ်သ့ၣ်န့ၣ်လီၤ.
