မ့ၢ်နနၢ်ဟူဘၣ် တၢ်လၢအဘၣ်ထွဲဒီး လုၢ်လၢ်က့ၢ်ဂီၤ မၤတၢ်လဲၤတၢ်ကယီကယီ (#slowfashion) အဂ့ၢ် တဘျီဘျီန့ၣ်ဧါ. တၢ်ပနီၣ် (#slowfashion)အံၤ မ့ၢ်တၢ်ဟူးတၢ်ဂဲၤ, အိၣ်ဒီးတၢ်ပညိၣ်လၢ ကထီဒါကွံာ် “လုၢ်လၢ်က့ၢ်ဂီၤမၤတၢ်လဲၤတၢ်ချ့ချ့” (fast fashion) လၢအထုးထီၣ်တၢ်ကူတၢ်ကၤအါအါ, ဒီးအပှ့ၤကလံၤဘၣ်ဘၣ်, ဝံၤန့ၣ်ဒီး ဘၣ်တၢ်စူးကွံာ်အီၤ ညီညီဒီးချ့ချ့န့ၣ်လီၤ. လုၢ်လၢ်က့ၢ်ဂီၤ မၤတၢ်လဲၤတၢ်ချ့ချ့ အတၢ်မၤတဖၣ်အပူၤန့ၣ် တၢ်ကူတၢ်ကၤတဖၣ် လၢအအိၣ်လၢ တၢ်ဆါတၢ်ပှ့ၤအကျးန့ၣ်, တယံာ်ဘၣ်အတီၢ်ပူၤန့ၣ် ပှၤတဘၣ်သူၣ်ဘၣ်သးလၢၤဘၣ်အဃိဒီး ကိးနံၣ်ဒဲးန့ၣ် ဆ့ကၤပနီၣ်(brands)တနီၤန့ၣ် ဘၣ်တၢ်စူးကွံာ်အဆ့ကၤ အနီၢ်ဂံၢ်အါအါဂီၢ်ဂီၢ်န့ၣ်လီၤ. မ့မ့ၢ် “လုၢ်လၢ်က့ၢ်ဂီၤ မၤတၢ်လဲၤတၢ်ကယီကယီ” အတၢ်ဟူးတၢ်ဂဲၤတခီ ဟ့ၣ်ဂံၢ်ဟ့ၣ်ဘါ ပှၤဂီၢ်မုၢ် ကမၤတၢ်လဲၤတၢ်ကယီကယီ ဒီးဆိကမိၣ်ဃုမၤတၢ်လၢ ကျိၤကျဲလီၤဆီအဂၤန့ၣ်လီၤ. တၢ်ပာ်သူၣ်ပာ်သး ထီဘိကဘၣ်မ့ၢ် တၢ်လၢအဘၣ်တၢ်တ့ဒုးအိၣ်ထီၣ် ဒ်သိးကလူၤထီၣ်ခ့ခါ ဆၢကတီၢ်အလီၢ်န့ၣ် လုၢ်လၢ်က့ၢ်ဂီၤ မၤတၢ်လဲၤတၢ်ကယီကယီ ဟ့ၣ်ဂံၢ်ဟ့ၣ်ဘါပှၤလၢ ပကဃုထၢ တၢ်တမံၤမံၤလၢ ဘၣ်တၢ်ထုးထီၣ်အီၤအဘ့ၣ်စှၤစှၤ, လၢအိၣ်ဒီးအကံၢ်အစီ, ဒီးအတမၤဘၣ်ဒိဘၣ်ထံး ခိၣ်ဃၢၤန့ဆၢၣ်ဂံၢ်ထံးတဖၣ်, လၢပှၤစူးကါအီၤသ့ယံာ်ယံာ်န့ၢ်ဝဲတဖၣ်န့ၣ်လီၤ.

ဖဲယဆိကမိၣ်ထီၣ်က့ၤ လုၢ်လၢ်က့ၢ်ဂီၤမၤတၢ်လဲၤတၢ်ကယီကယီ အတၢ်ကွဲမုာ်န့ၣ်, ယထံၣ်လၢ ယမ့ၢ်ပှၤအိၣ်လၢ “လုၢ်လၢ်က့ၢ်ဂီးမၤတၢ်လဲၤတၢ်ချ့ချ့” အတၢ်ဆိကမိၣ်အထံကျိၤ- ထီဘိဃုထံၣ်ယဲထဲ သးအတၢ်လၢတၢ်ပှဲၤ လၢတၢ်ဟဲအိၣ်ထီၣ် အသီအသီတဖၣ်အပူၤန့ၣ်လီၤ. ကလီးစဲ ၃ အပူၤန့ၣ် စီၤပီလူး စံးဘၣ်ပှၤလၢ တၢ်ဃုထံၣ်န့ၢ် တၢ်ဆီတလဲအမ့ၢ်အတီ လၢကစၢ်ယ့ၣ်ရှူးအပူၤန့ၣ် တမ့ၢ်တၢ်ကဲထီၣ်အသး ချ့သဒံးန့ၣ်ဘၣ်. မ့ၢ်တၢ်မၤတစိၤသး လၢတၢ်ကစုဒု, တဆီဘၣ်တဆီ တၢ်ဆီတလဲလၢခရံာ်ပူၤန့ၣ်လီၤ.

တၢ်ကူသိးထီၣ် ပနီၣ်ခိလၢ ဟီၣ်ခိၣ်အတၢ်ပာ်ပနီၣ်, လၢအဘၣ်တၢ်ဒုးအိၣ်ထီၣ်သီသံၣ်ဘှဲအလီၢ်န့ၣ်, ဒ်အဆၢဖိ ၁၂ ပာ်ဖျါအသိး ပဆီတလဲကူသိးထီၣ် သးစီဆှံအတၢ်ကူတၢ်သိး လၢအမ့ၢ် “တၢ်သးကညီ, တၢ်မၤဂ့ၤတၢ်, တၢ်ဆီၣ်လီၤသး, တၢ်ဝံသးစူၤသ့ၣ်တဖၣ်” သ့ဝဲဒၣ်န့ၣ်လီၤ. အဆၢဖိ ၁၅ စံးဘၣ်ပှၤ ပဝဲတဂၤဒီးတဂၤ ပမၤလိလိာ်သးတၢ်သးစူၤသ့ဝဲ လၢတၢ်လဲၤကယီကယီ, လၢကစၢ်ခရံာ် အတၢ်ဆီတလဲ ပသူၣ်ပသး – တၢ်လဲၤလၢအကဆှၢပှၤဆူ သးအတၢ်မုာ်တၢ်ဖိး လၢအအိၣ်စံၣ်အိၣ်ကျၢၤန့ၣ်လီၤ.