“ပှၤအါဒံအါဂၤ အိၣ်ဒီးခီမဲာ် လၢပှၤဂုၤပှၤဂၤ ထံၣ်တသ့ မ့တမ့ၢ် နၢ်ပၢၢ်တသ့တဖၣ်န့ၣ်လီၤ.” တၢ်ကတိၤ တဖၣ်အံၤအိၣ်ဟဲဝဲလၢ ပှၤလိာ်ကွဲမ့ၣ်ကၠၢၣ်လံးဘ့း(စ)ဘီ (Major League Baseball) အဲ(န) ဒရဲ(လ) တၢၣ် စ့မၢၣ် (Andrelton Simmons)လၢ အဘၣ် တၢ်ထုးထီၣ်ကွံာ်အီၤ ဖဲ ၂၀၂၀ နံၣ်ဘူးကလၢာ် ခီဖျိလၢ သးအတၢ်အိၣ်ဆူအိၣ်ချ့ အတၢ်ဂ့ၢ်ကီအဃိ န့ၣ်လီၤ. စ့မၢၣ် ကွၢ်ထံဆိကမိၣ်အတၢ်ဆၢတဲာ်ဝံၤဒီး, အသးကလၢၢ်ဘၣ်လၢ ပှၤဂုၤပှၤဂၤလၢအဘၣ် ကွၢ်ဆၢၣ်မဲာ် တၢ်တၤတၢ်တမံၤဃီ ဒ်သိးအီၤတဖၣ်အဂီၢ် တၢ်ကဟ့ၣ်ဂံၢ်ဟ့ၣ်ဘါ, ဒီးဒုးသ့ၣ်ညါပှၤဂုၤပှၤဂၤ လၢကဒုးနဲၣ်တၢ်သးကညီၤအဂီၢ် အလီၢ်အိၣ်လၢ ကနီၤဟ့ၣ်အတၢ်လဲၤခီဖျိအဂ့ၢ်န့ၣ်လီၤ.

တၢ်ပူၤလီၢ်ခီမဲာ်လၢပတထံၣ်ဘၣ်တဖၣ်န့ၣ် မၤဘၣ်ဒိဆါတၢ် ဒိၣ်ဒိၣ်ယိာ်ယိာ်ဒီး တၢ်ပူၤလီၢ်ပူၤကျဲ လၢတၢ်ထံၣ်န့ၢ်အီၤတသ့တဖၣ်န့ၣ် မ့ၢ်တၢ်လၢအမၤဆါတၢ်နီၢ်နီၢ်, ဒီးပတူၢ်ဘၣ်ခီၣ်ဘၣ်အီၤနးနးကလဲာ် န့ၣ်လီၤ. လၢထါစံးထီၣ်ပတြၢၤ ၆ အပူၤ, အဆၢဖိ ၂ န့ၣ် “ယလီၤဘှါ” ဒီး အဆၢဖိ ၃ န့ၣ် “ယသးကိၢ်နးမး”- တၢ်လၢအဘၣ်ဂုာ်ကျဲးစၢၤဂဲၤလိာ်တၢ်အဂ့ၢ် စီၤဒၤဝံးကွဲးပာ်ဖျါလၢ တၢ်သးတီအပူၤ န့ၣ်လီၤ. အဆၢဖိ ၆ န့ၣ် စံးဝဲ “တၢ်ဘှံးယသးလၢ ယကအုကစွါအဃိ, ယမၤပှံၢ်လီၤ ယလီၢ်မံလၢယမံာ်ထံ” န့ၣ်လီၤ. တၢ်လၢ အတူၢ်ဘၣ်ခီၣ်ဘၣ်တၢ်အဂ့ၢ်န့ၣ် စီၤဒၤဝံးတနီၤဟ့ၣ်ဝဲဘၣ်ဆၣ်, ပဝဲအါဂၤ ပဒုးဘၣ်ထွဲလိာ်သး တၢ်လၢ အတူၢ်ဘၣ်တဖၣ်သ့ဝဲဒၣ်န့ၣ်လီၤ.

စီၤဒၤဝံးစံးဆၢမၤဆၢ အတၢ်နးတၢ်ဖှီၣ်အသိး ပဝဲစ့ၢ်ကီးပန့ၢ်ဂံၢ်န့ၢ်ဘါသ့ဝဲဒၣ်လီၤ. လၢတၢ်ကီတၢ်ခဲ ဒိၣ်ဒိၣ်ယိာ်ယိာ်အပူၤ, စီၤဒၤဝံး ကိးထီၣ်ယွၤန့ၣ်လီၤ. စီၤဒၤဝံးဂၢ်လီၤအသးလၢယွၤအမဲာ်ညါ တီတီလိၤလိၤ, ဒီးဃ့ထုကဖၣ်ဝဲလၢ အဆၢဖိ ၂ န့ၣ် “မၤဘျါက့ၤယၤ,” အဆၢဖိ ၄ န့ၣ် “မၤပူၤမၤဖျဲးယသး,” ဒီး အဆၢဖိ ၉ န့ၣ် “ယွၤအတၢ်သးကညီ” န့ၣ်လီၤ. အဆၢဖိ ၃ အပူၤ အဝဲမ့ၢ်အိၣ်ဒီးတၢ်သံကွၢ် “ဆံးယံာ်လဲၣ်” န့ၣ် ဖျါလၢ တၢ်အိၣ်အသးတလီၤဆီလၢအဂီၢ် ဘၣ်ဆၣ်, စီၤဒၤဝံးအတၢ်နာ်ဂၢၢ်ကျၢၤလၢ ကစၢ်ယွၤအဃိ အဆၢဖိ ၉ ပာ်ဖျါဝဲ “ယွၤနၢ်ဟူလံ ယဃ့ကညးတၢ်လံ” ဒီး အဆၢဖိ ၁၀ န့ၣ် ပာ်ဖျါဝဲ ယွၤကမၤတၢ်လၢ အဆၢကတီၢ် ဒၣ်ဝဲန့ၣ်လီၤ. ပကစၢ်ယွၤမ့ၢ် “ယမ့ၢ်တၢ်လၢယမ့ၢ်” အဃိ တၢ်မုၢ်လၢ်အိၣ်ဝဲထီဘိန့ၣ်လီၤ.