ပှၤအၢၣ်လီၤအီၤလၢအကဒိးန့ၢ်ဘၣ် တၢ်မၤလိမၤဒိးအဂီၢ်အဃိ နၣ်တၤလယၣ် (Natalia) လဲၤဝဲဆူ ထံကီၢ်အဂၤတဘ့ၣ်န့ၣ်လီၤ. ဘၣ်ဆၣ် တယံာ်ဘၣ်န့ၣ်, ပၢ်တဂၤလၢ အလဲၤအိၣ်ဘၣ်ဟံၣ်အသီအံၤ, စးထီၣ်မၤတရီတပါအီၤလၢနီၢ်ခိ, ဒီးမၤဆူၣ်မၤစိး အိၣ်ဃုာ်မံဃုာ်ဒီးအီၤန့ၣ်လီၤ. ဟံၣ်ကစၢ်အံၤ မၢဆူၣ် အီၤလၢတၢ်ကွၢ်ထွဲအဟံၣ်, ဒီးအဖိတဖၣ်, ဘၣ်ဆၣ် တဟ့ၣ်ဝဲအဘူးအလဲဘၣ်. အဝဲတပျဲဟး နၣ်တၣ်လံယၣ် ဆူတၢ်ချၢဘၣ်, ဒီးတဒုးသူအီၤ လီတဲစိဘၣ်. နၣ်တၤလယၣ် ကဲထီၣ်ပှၤတဂၤအံၤ အကုၢ်န့ၣ်လီၤ.

နီၢ်ဟၤကၢ်မ့ၢ် ပှၤအဲၤကူပတူးကုၢ်ပိာ်မုၣ်လၢ စီၤအၤဘြၣ်, ဒီးနီၢ်စၤရဲအဟံၣ်န့ၣ်လီၤ. မတၤမး တကိးအီၤလၢအမံၤဘၣ်. ၁ မိၤ ၁၆:၂, ၅-၆ အပူၤ ပှၤကိးအီၤဒၣ်လၢ “ယကုၢ်” မ့တမ့ၢ် “နကုၢ်”န့ၣ်လီၤ. အဝဲသ့ၣ်အဲၣ်ဒိးသူအီၤဒၣ်, ဒ်သိးအဝဲသ့ၣ်ကဒိးန့ၢ်ဝဲ ဖိလၢပှၤန့ၢ်ဘၣ်သါအဂီၢ် ဧိၤန့ၣ်လီၤ.

မ့မ့ၢ်ကစၢ်ယွၤန့ၣ် လီၤဆီဒိၣ်မးလီၤ. လံာ်စီဆှံအပူၤ, ယွၤအကလူး လီၣ်ဖျါထီၣ်အသး အဆိကတၢၢ်လၢပှၢ်မုၢ်ကနၢ, ဖဲအကတိၤတၢ်ဒီး နီၢ်ဟၤကၢ်, လၢအအိၣ်ဒီးအဟုးအသးန့ၣ်လီၤ. ကလူးအံၤမ့ၢ် ပှၤလၢအစိာ်ဆှၢယွၤတၢ်ကစီၣ် မ့တမ့ၢ် ယွၤအနီၢ်ကစၢ်ဒၣ်ဝဲန့ၣ်လီၤ. နီၢ်ဟၤကၢ်နာ်ဝဲလၢ ပှၤတဂၤမ့ၢ်ယွၤအဃိ, အဆၢဖိ ၁၃ အပူၤ စံးဝဲဒၣ် “ပှၤလၢအထံၣ်ယၤတဂၤန့ၣ် မ့ၢ်ယဃုထံၣ်န့ၢ်အီၤဧါ” န့ၣ်လီၤ. ကလူးတဂၤအံၤ မ့မ့ၢ်ယွၤန့ၣ်ဒီး ဘၣ်သ့ၣ်သ့ၣ်ကမ့ၢ်ယွၤအဖိခွါ, လၢအလီၣ်ဖျါထီၣ်ဝဲ ကစၢ်ယွၤဆူပအိၣ်, ဒ်အလီၣ်ဖျါဆိဝဲ ဖဲလၢတချုးကဲထီၣ် ပှၤကညီဒ်ဘၣ်န့ၣ်လီၤ. အဆၢဖိ ၈ အပူၤ ကလူးတဂၤအံၤစံးဝဲဒၣ် နီၢ်ဟၤကၢ်လၢ အမံၤ, “နီၢ်စၤရဲ အကုၢ်ပိာ်မုၣ်နီၢ်ဟၤကၢ်ဧၢ, နဟဲလၢလဲၣ်, ဒီးနကလဲၤဆူလဲၣ်” န့ၣ်လီၤ.

ကစၢ်ယွၤထံၣ် နၣ်တၤလယၣ် ဒီးဆှၢလီၤ ပှၤကဟုကယာ်တၢ်တဖၣ်ဆူ အတၢ်အိၣ်မူအပူၤဒီး မၤထူၣ်ဖျဲးအီၤန့ၣ်လီၤ. ခဲကနံၣ်အံၤ အဝဲမၤလိမၤဒိးတၢ် ဒ်သိးကကဲထီၣ် သရၣ်မုၣ်ကွၢ် ပှၤဆါတဂၤ အဂီၢ်န့ၣ်လီၤ. ယွၤထံၣ်နီၢ်ဟၤကၢ် ဒီးကိးအီၤလၢအမံၤန့ၣ်လီၤ. ဒီးယွၤထံၣ်နၤလီၤ. ဘၣ်သ့ၣ်သ့ၣ် နကဘၣ် တၢ်ကွၢ်ကပာ်နၤ, မ့တမ့ၢ် တၢ်အၢန့ၢ်အန့ၣ် နကဘၣ် တၢ်မၤတရီတပါနၤန့ၣ်လီၤ. ကစၢ် ယ့ၣ်ရှူး ကိးနၤလၢနမံၤလီၤ. ဃ့ၢ်ဆူအအိၣ်တက့ၢ်.