ဒ့ အဲ(န)ဟး(ဒ) ကၠူနံၣ်ယၢၣ် (Dale Earnhardt Jr.) စံးကတိၤဖျါထီၣ် ဖဲအသ့ၣ်ညါနၢ်ပၢၢ်ဝဲလၢ အပၢ်လဲၤသဒၣ်အီၤလံအဂ့ၢ်န့ၣ်, မ့ၢ်တၢ်လဲၤထီဖျိ နးနးကျံးကျံးလၢအဂီၢ်န့ၣ်လီၤ. ဒ့ အဲ(န)ဟး(ဒ) စံနယၢၣ် (Dale Earnhardt Sr.) လၢအမ့ၢ် ပှၤနီၣ်ပြၢသိလ့ၣ် ဒီးအမံၤဟူသၣ်ဖျါဒိၣ်မးတဂၤန့ၣ် ဖဲအနုာ်လီၤနီၣ်ပြၢ ဒ့တိၣ်နၣ် ၅၀၀ သိလ့ၣ်ပြၢ (Daytona 500) အကတၢၢ်န့ၣ် အသိလ့ၣ် ဘၣ်ဒိဘၣ်ထံးနးနးကလဲာ်, ဒီးသံဝဲဒၣ်န့ၣ်လီၤ. လၢတၢ်ပြၢအံၤ. ဒ့ ကၠူနံၣ်ယၢၣ် စ့ၢ်ကီး နုာ်လီၤပြၢဝဲ န့ၣ်လီၤ. အဝဲစံးဝဲဒၣ် “တၢ်ကလုၢ်အိၣ်သိၣ်ထီၣ်- ယကမၤကဒီးဆူညါတသ့လၢၤဘၣ်, တၢ်တမံၤအံၤ ဟဲထီၣ်လၢယပူၤ, တၢ်ကိးပသူဖးဒိၣ် လၢအမ့ၢ် တၢ်ဖုးသံပျီၢ်သံဒီး တၢ်သူၣ်အုးသးအုး, ဒီးတၢ်ပျံၤ တၢ်ဖုးအတၢ်ကိးပသူန့ၣ်လီၤ”. တၢ်န့ၣ်ဝံၤဒီး တၢ်မ့ၢ်တၢ်တီလၢ အလီၤသယုၢ်သညိတမံၤမ့ၢ်ဝဲ “ဆူညါ ယကဘၣ်မၤတၢ်အံၤ ထဲယတၢ်ဒၣ်ယဲဧိၤန့ၣ်လီၤ”.
အဲ(န)ဟး(ဒ) ကၠူနံၣ်ယၢၣ် စံးဝဲ “တၢ်အိၣ်ဒီးပၢ်န့ၣ် လီၤဂာ်ဒ် တၢ်အိၣ်ဒီးလံာ်ကွဲးနီၣ်ဖိတဘ့ၣ် န့ၣ်လီၤ. တၢ်အိၣ်ဒီးပၢ်န့ၣ် လီၤဂာ်ဒ် တၢ်သ့ၣ်ညါတၢ်စံးဆၢခဲလၢာ်တဖၣ်န့ၣ်လီၤ.”
ကစၢ်ယ့ၣ်ရှူး အပျဲၢ်အဘီၣ်တဖၣ် မၤလိန့ၢ်ဝဲလၢ တၢ်စံးဆၢခဲလၢာ်အဂီၢ် ကကွၢ်ထီၣ်ဆူ အအိၣ်န့ၣ်လီၤ. ခဲကနံၣ်အံၤ, တချုးဘၣ်တၢ်ပျၤထီလၢထူၣ်စုညါအလိၤ, ဟါတၢ်အီၣ်န့ၣ်, ကစၢ် ယ့ၣ်ရှူး မၤလီၤတံၢ်အပျၢ်အဘီၣ်တဖၣ်လၢ အတပာ်တ့ၢ် အဝဲသ့ၣ်ဘၣ်. ယိၤ ၁၄:၁၆-၁၇ အပူၤ ကစၢ်ယ့ၣ်ရှူးစံးဝဲဒၣ် “ယကဃ့တၢ်လၢပၢ်, ဒီးကဟ့ၣ်သုလၢ ပှၤမၤစၢၤတၢ်လၢအဂၤတဂၤ ဒ်သိး အကအိၣ်ဒီးသုလီၤထူလီၤယိာ်လီၤ. အဝဲန့ၣ်မ့ၢ်သးလၢ အဘၣ်ဃးဒီး တၢ်မ့ၢ်တၢ်တီ”န့ၣ်လီၤ.
ကစၢ်ယ့ၣ်ရှူး ဟ့ၣ်ယူာ်ထီထီၣ် တၢ်မၤမုာ်ထီၣ်တမံၤအံၤဆူ ကယဲၢ်ပှၤလၢ အကစူၢ်က့ၤနာ်က့ၤ အီၤတဖၣ်အဂီၢ်န့ၣ်လီၤ. အဆၢဖိ ၂၃ န့ၣ်ပာ်ဖျါဝဲဒၣ် “ပှၤမ့ၢ်အဲၣ်ယၤဒီး, ကတိၢ်န့ၢ် ယကလုၢ်ကထါ, ဒီးယပၢ်ကအဲၣ်အီၤ, ဒီးပကဟဲဆူအအိၣ်, ဒီးမၤန့ၢ်ပအိၣ်အလီၢ်ဒီးအီၤလီၤ” န့ၣ်လီၤ.
အဆၢဖိ ၂၆ န့ၣ်ပာ်ဖျါဝဲ, ပှၤလၢအဃုထၢပိာ်ခရံာ်အခံတဖၣ်န့ၣ် သးစီဆှံကအိၣ်လၢအပူၤ, ဒီးကသိၣ်လိ အဝဲသ့ၣ်လၢ “ကယဲၢ်တၢ်ခဲလၢာ်,” ဒီးကဒုးသ့ၣ်နီၣ်ထီၣ်က့ၤ ကယဲၢ်တၢ်လၢကစၢ် ယ့ၣ်ရှူးသိၣ်လိတ့ၢ်တဖၣ်န့ၣ်လီၤ. ပတအိၣ်ဒီးတၢ်စံးဆၢခဲလၢာ်ဘၣ်ဆၣ်, ပအိၣ်ဒီး ယွၤအသးစီဆှံ လၢအသ့ၣ်ညါ တၢ်စံးဆၢခဲလၢာ်န့ၣ်လီၤ.
