ထါအိၣ်တယုၢ် စးထီၣ်ဝဲလၢ “ယတမ့ၢ်ၦၤနီတဂၤ နမ့ၢ်မတၤလဲၣ်” ဒီးထါအပူၤန့ၣ် ပှၤကွဲးထါ အဲမလ့ၣ် ဒ့းက့ၣ်စၣ် (Emily Dickinson) လၢတၢ်ကလီာ်ကလာ်အပူၤ တၤဝဲဒၣ် ကယဲၢ်ပှၤကညီ အတၢ်ဂုာ်ကျဲးစၢးတဖၣ်, လၢပှၤအဲၣ်ဒိးကဲထီၣ် “ၦၤတဂၤဂၤ”အဂီၢ်, ဒီးအလီၢ်န့ၣ် ဟ့ၣ်ဂံၢ်ဟ့ၣ်ဘါဝဲ ပှၤလၢအတမ့ၢ်တၢ်နီတဂၤ သးခုသးမုာ်ဝဲလၢ အတၢ်သဘျ့အပူၤအဂ့ၢ်န့ၣ်လီၤ. ထါအဖျၢၣ်တဖၣ်န့ၣ် “တၢ်ကမ့ၢ် ၦၤတဂၤဂၤအဂီၢ်န့ၣ် လီၤကၢၣ်ထဲလဲၣ်. တၢ်မံၤဟူသၣ်ဖျါန့ၣ် လီၤဂာ်ဒ်ဒ့ၣ်ဖိလၢမၤသီၣ် အကလုၢ်, ဒ်သိးပှၤကသ့ၣ်ညါအိၣ်ဝဲဖဲလဲၣ်. အတၢ်ပာ်သးကဖၢလၢ ဒီးတၢ်ကျဲးစၢၤလၢအဃု ပှၤကဆိကမိၣ်ဒိၣ်အီၤန့ၣ်, လီၤဂာ်ဒ် တၢ်ယီၤအကတီၢ်လၢ အယံၢ်ဝဲထီဝဲ” န့ၣ်လီၤ.

တၢ်ဃုထံၣ်န့ၢ်တၢ်သဘျ့ လၢတၢ်ပျဲပူၤကွံာ် တၢ်အဲၣ်ဒိးကဲထီၣ် “ၦၤတဂၤဂၤ”န့ၣ် ပာ်ဖျါထီၣ်က့ၤ ၦၤတၢ်မၢဖိစီၤပီလူး အတၢ်အုၣ်သး လၢကျဲတနီၤအပူၤန့ၣ်လီၤ. တချုးလၢ စီၤပီလူးထံၣ်လိာ်သးဒီး ကစၢ်ခရံာ်ဒံးဘၣ်န့ၣ် အဝဲအိၣ်ဒီး နီၢ်ဂံၢ်စရီဖးထီႇ လၢတၢ်ဘူၣ်တၢ်ဘါအတၢ်အုၣ်ကီၤ, ၦၤအတီၤ အပတီၢ်, လၢအလီၤထုးန့ၢ်ပှၤသးအဃိ, ဖံလံးပံၤ ၃:၄ ပာ်ဖျါဝဲလၢ “ယသန့ၤယသးလၢ တၢ်ဖံးတၢ်ညၣ် အပူၤ အလီၢ်အိၣ်ဝဲလီၤ….. ယဲဒၣ်အံၤအိၣ်အါန့ၢ်အန့ၣ်တက့ၢ်လီၤ” န့ၣ်လီၤ.

ဘၣ်ဆၣ် တၢ်ဘၣ်သဂၢၢ်လိာ်သးဒီး ကစၢ်ယ့ၣ်ၡူးန့ၣ် ဆီတလဲကွံာ် တၢ်ခဲလၢာ်န့ၣ်လီၤ. ဖဲစီၤပီလူးသ့ၣ်ညါနၢ်ပၢၢ် အတၢ်မၤန့ၢ်မၤနၢၤတၢ်တဖၣ်အံၤ လၢခရံာ်တူၢ်သံသးအတၢ်အဲၣ်, အတၢ်ကပီၤပူၤန့ၣ် မ့ၢ်ဒၣ်တၢ်ကလီကလီအဃိန့ၣ်ဒီး အဆၢဖိ ၈ အပူၤ အဝဲအၢၣ်လီၤဝဲဒၣ်လၢ “ယပာ်တၢ်ခဲလၢာ်လၢ တၢ်ဟါမၢ် မ့ၢ်လၢတၢ်သ့ၣ်ညါ, ယကစၢ်ယ့ၣ်ၡူးခရံာ်အဃိ… ယပာ်အီၤ ဒ်တၢ်အ့ၣ်အသိး ဒ်သိးယကန့ၢ်ဘၣ်ခရံာ်လီၤ.” အဆၢဖိ ၁ဝ ပာ်ဖျါ စီၤပီလူး ဆၢမၤန့ၢ်တၢ်ထဲတမံၤဧိၤ လၢအမ့ၢ် “ဒ်သိးကသ့ၣ်ညါအီၤ(ခရံာ်), ဒီးအတၢ်ဂဲၤဆၢထၢၣ်က့ၤန့ၣ် အစိအကမီၤ, ဒီးဒ်သိးယဘၣ် တၢ်လီၤဂာ်လၢ အတၢ်သံသတးဒီး ယကသ့ၣ်ညါ တၢ်ရ့လိာ်ဒီးအတၢ်နးတၢ်ဖှီၣ်” န့ၣ်လီၤ.

နီၢ်နီၢ်န့ၣ်, တၢ်ဂုာ်ကျဲးစၢးကဲထီၣ် “ၦၤတဂၤဂၤ” လၢပကစၢ်ဒၣ်ဝဲန့ၣ် မ့ၢ်တၢ်လၢအလီၤကၢၣ်, လီၤသးအုးန့ၣ်လီၤ. ဘၣ်ဆၣ်, အဆၢဖိ ၉ စံးဘၣ်ပှၤ လၢတၢ်သ့ၣ်ညါကစၢ်ယ့ၣ်ၡူးႇ ဒီးလၢတၢ်ဟ့ၣ်လီၤပသး လၢကစၢ်အတၢ်ဟ့ၣ်လီၤသးအတၢ်အဲၣ်, ဒီးအသးသမူအပူၤန့ၣ်အံၤႇ မ့ၢ်လၢပကဃုထံၣ်န့ၢ်က့ၤပသး, ဒီးအကတၢၢ်န့ၣ် ပကမ့ၢ်ပှၤသဘျ့ဒီး ပှၤလၢထီၣ်ၦဲၤထီၣ်တဖၣ်န့ၣ်လီၤ.