အပူၤကွံာ် အမဲရကၤအကီၢ်ခိၣ်, ယူလစံ(စ) အဲး(စ) ကရၢး (Ulysses S. Grant) န့ၣ် ကျိၣ်စ့လၢ အပာ်ဖှိၣ်ဃာ်ဝဲ အါနံၣ်အါလါအပူၤတဖၣ် ဘၣ်တၢ်လံၣ်အိာ်လီၤအီၣ်ဝဲဒၣ် လၢအၦၤမၤသကိးတၢ် လၢပနံၣ်ကၤတၢ်မၤအပူၤအဃိ, စံးဝဲဒၣ်လၢ “မုၢ်တဂီၤအံၤ ယဆိကမိၣ်လီၤယသး လၢယအိၣ်ဒီး ကျိၣ်စ့အါမးဘၣ်ဆၣ်, ခဲအံၤစ့တဒီလၣ်ဒၣ်လဲာ် တအိၣ်လၢၤဘၣ်န့ၣ် ယတသ့ၣ်ညါလီၤယသးဘၣ်.” လါတဖၣ်ပူၤကွံာ်ဝံၤအလီၢ်ခံ ကရၢး ဒိးန့ၢ်ခဲစၢၣ်တၢ်ဆါ လၢၦၤကူစါတန့ၢ်လၢၤဘၣ်လီၤ. ဒ်သိးကလုၢ်အီၣ်လုၢ်အီ အဟံၣ်ဖိဃီဖိတဖၣ်အဂီၢ်, ၦၤကွဲးလံာ် မးထွ့(န) Mark Twain ဟ့ၣ်ကူၣ်အီၤ လၢကစဲကျံးထုးထီၣ် အသးသမူအတၢ်လဲၤခီဖျိ နီၢ်ကစၢ်တၢ်ကွဲးနီၣ်အဂီၢ် အဝဲတူၢ်လိာ်ဝဲန့ၣ်လီၤ. တချုးသံ, တနွံအတီၢ်ပူၤန့ၣ်ကွဲးဝံၤဝဲန့ၣ်လီၤ.
လံာ်စီဆှံစံးဘၣ်ၦၤလၢ ၦၤအိၣ်ဝဲတဂၤ, လၢအဘၣ်ကွၢ်ဆၢၣ်မဲာ် တၢ်ဂ့ၢ်ကီဒိၣ်ဒိၣ်မုၢ်မုၢ်အဂ့ၢ် န့ၣ်လီၤ. ၁မိၤ ၃၇:၃၃ ပာ်ဖျါထီၣ် စီၤယၤကိာ် နာ်ဝဲဒၣ်လၢ အဖိခွါစီၤယိၤသး ဘၣ်တၢ်အ့ၣ်ဖှီလၢဆၣ်ဖိကီၢ်ဖိအၢသီဒိၣ်မးတဒုန့ၣ်လီၤ. အဖိခွါစီၤစူၤမ့းအိၣ်စ့ၢ်ကီး ဘၣ်တၢ်ဖီၣ်ထၢနုာ်လၢဃိာ်ပူၤ လၢထံဂၤကီၢ်ဂၤ, ဒီးစီၤယၤကိာ် ပျံၤတၢ်လၢအဖိခွါစီၤဘံၣ်ယၤမံၣ် ကဘၣ်တၢ်ဟံးန့ၢ် လၢအအိၣ်စ့ၢ်ကီးန့ၣ်လီၤ. မၤသးဒ်န့ၣ်ဒီး, ၁မိၤ ၄၂:၃၆ ပာ်ဖျါထီၣ် လၢတၢ်သူၣ်ကိၢ်သးဂီၤအပူၤ, စီၤယၤကိာ်ဟီၣ်ကိးပသူဒီးစံးဝဲ, “တၢ်ကိးမံၤန့ၣ် ထီဒုၣ်ထီဒါယၤလီၤ” န့ၣ်လီၤ.
ဘၣ်ဆၣ် တၢ်မၤအသးတဖၣ်န့ၣ် တမ့ၢ်ဒ်န့ၣ်အသိးဘၣ်. အဖိခွါစီၤယိၤသး အိၣ်မူဒံးဒီး ဒ်သိး အဝဲသ့ၣ် အဟံၣ်ဖိဃီဖိတဖၣ် ကထံၣ်လိာ်ဘၣ်က့ၤသးအဂီၢ်န့ၣ် ကစၢ်ယွၤမၤတၢ်လၢ တၢ်လီၢ်ခံန့ၣ် စီၤယၤကိာ်တသ့ၣ်ညါဝဲ လ့ၤတက့ၢ်ဘၣ်န့ၣ်လီၤ. တၢ်ဂ့ၢ်တဖၣ်အံၤပာ်ဖျါဝဲ, လၢပတၢ်အိၣ်အသး, မၤအသးတဖၣ်အပူၤ, ပထံၣ်ယွၤအစု မ့ၢ်တသ့ဘၣ်ဆၣ် ကစၢ်ယွၤန့ၣ် ပနာ်န့ၢ်အီၤသ့ဝဲဒၣ်န့ၣ်လီၤ.
ကရၢး အသးသမူအတၢ်လဲၤခီဖျိနီၢ်ကစၢ်တၢ်ကွဲးနီၣ်န့ၣ် ဆါဘၣ်ဝဲအါအါဂီၢ်ဂီၢ်အဃိဒီး ကဲထီၣ် တၢ်ဘျုးတၢ်ဖှိၣ်လၢ အဟံၣ်ဖိဃီဖိတဖၣ်အဂီၢ် ဂ့ၤဂ့ၤဘၣ်ဘၣ်န့ၣ်လီၤ. အဝဲတအိၣ်မူ ထံၣ်ထွဲဝဲ တၢ်ဂ့ၢ်အံၤဘၣ်ဆၣ် အမါထံၣ်ထွဲဘၣ်ဝဲန့ၣ်လီၤ. ခါဆူညါပတၢ်ထံၣ်တထီၣ်ဘးဘၣ်ဆၣ် ကစၢ်ယွၤ အတၢ်ထံၣ်န့ၣ် တမ့ၢ်တၢ်ဒ်န့ၣ်ဘၣ်. ကစၢ်ယ့ၣ်ရှူးဒ်အမ့ၢ်ဝဲ ပတၢ်မုၢ်လၢ်အသိးန့ၣ်, ရိမ့ၤ ၈:၃၁ စံးဘၣ်ပှၤလၢ “ယွၤမ့ၢ်အိၣ်လၢပဂီၢ်ဒီး ယမ့ၢ်မတၤကထီဒါၦၤတဂၤလဲၣ်” န့ၣ်လီၤ. တနံၤအံၤ, မ်ပကအိၣ်ဒီးတၢ်နာ် လၢကစၢ်အပူၤန့ၣ်တက့ၢ်.
