ယတံၤသကိးတဂၤ မၤတၢ်လၢ တၢ်ဆါဟံၣ်ကဘီအၤဖရံကၤမၢစံၣ် (Africa Mercy) အလိၤဒီး ကဘီအံၤ ကူစါယါဘျါကလီန့ၢ် ထံကီၢ်လၢ အဂုၤထီၣ်ပသီထီၣ်ဒံးအဖၢမုၢ်တဖၣ်အဂီၢ်န့ၣ်လီၤ. ပှၤမၤတၢ်ဖိတဖၣ် ဘၣ်ကွၢ်ပှၤဆါလၢအကယၤတဖၣ် ကိးမုၢ်ဒဲးန့ၣ်လီၤ. မ့တမ့ၢ်ဘၣ်ဒီး ပှၤဆါတဖၣ် တမ့ၢ်လၢကဘၣ် တၢ်ကူစါယါဘျါအသးန့ၣ်လီၤ.
တဘျီဘၣ်တဘျီ ပှၤဒိကွဲၤထံၣ်ဟူတဖၣ် လဲၤထီၣ်ဆူကဘီအဖီခိၣ်န့ၣ်ဒီး, ဒိန့ၣ် ကသံၣ်သရၣ်/သရၣ်မုၣ်တဖၣ် ကူစါမၤဘျါက့ၤပှၤဆါလၢ ထးခိၣ်တဲၤဖးဒီး ဒီးခီၣ်လၣ်အက့ၢ်အဂီၤဟးဂီၤတဖၣ်အဂီၤန့ၣ်လီၤ. ဘၣ်တဘျီဘျီန့ၣ် အဝဲသ့ၣ်လဲၤလီၤဆူ ကဘီအဖီလာ်တကထၢ ဒီးသံကွၢ်သံဒိးဝဲဘၣ်ဆၣ် တၢ်မၤလၢ မ့း(ခ) (Mick) မၤဝဲန့ၣ် ညီနုၢ် လၢ ပှၤတပာ်သူၣ်ပာ်သးဝဲဒၣ်န့ၣ်လီၤ.
မ့း(ခ) မ့ၢ်ဝဲပှၤအ့ၣ်ကၠ့နံယၢၣ်တဂၤဒီး ဖဲလၢပှၤဟ့ၣ်အီၤမူဒါတၢ်ဖံးတၢ်မၤန့ၣ် ကဘၣ်မၤကဆှီ တၢ်အ့ၣ်တၢ်ဆံၣ်အလီၢ်အဃိ ကဲထီၣ် တၢ်ကမၢကမၣ်လၢ အဝဲအဂီၢ်န့ၣ်လီၤ. တနံၤဘၣ်တနံၤ တၢ်ကတဲာ်ကတီၤရဲၣ်လီၤ မၤကဆှီ တၢ်ဘၣ်အၢဘၣ်သီ အိၣ်ဃုာ်ဒီး တၢ်အစုၣ်အပျၢ်တဖၣ်လၢ လံထၢၣ် (liter) လွံၢ်ကလးဃၣ်ဃၣ်န့ၣ် မ့ၢ်တၢ်မၤဖးဒိၣ်ဒီး မ့ၢ်တၢ်လၢ အကါဒိၣ်တမံၤန့ၣ်လီၤ. မ့း(ခ) အတၢ်ကွၢ်ထွဲ ထံပီၤဘိဒီးစဲးထုးထီၣ်ထံတဖၣ် မ့ၢ်တအိၣ်ဘၣ်န့ၣ်ဒီး, အၤဖရံကၤမၢစံၣ် ကဘီလၢအကူစါယါဘျါတၢ် အတၢ်ဖံးတၢ်မၤန့ၣ် ကဆိကတီၢ်ဝဲဒၣ်န့ၣ်လီၤ.
ပှၤခရံာ်ဖိတဖၣ် မၤဝဲ တၢ်သးခုကစီၣ်တၢ်ဖံးတၢ်မၤအပူၤစ့ၢ်ကီး ညီလၢ ပကပတြၢၤ ပှၤအိၣ်မၤတၢ်လၢ “တၢ်အဖီခိၣ်တဖၣ်” ဒီးကွၢ်ကပာ်လဲၤကပာ် ပှၤမၤတၢ်လၢ“တၢ်ဖီလာ်တဖၣ်”န့ၣ်လီၤ. ပှၤကရံၣ်သူးဖိတဖၣ် ဖဲအပာ်ထီၣ်ထီ ပှၤလၢအအိၣ်ဒီး တၢ်ဟ့ၣ်တၤလၣ်လီၤလီၤဆီဆီတဖၣ် အဆၢကတီၢ်, ၁ကရံၣ် ၁၂:၇-၂၀အပူၤ , စီၤပီလူး ဒုးသ့ၣ်နီၣ်ထီၣ်က့ၤ အဝဲသ့ၣ်လၢ တၢ်လၢကစၢ်ယ့ၣ်ရှူးခရံာ်အတၢ်မၤအပူၤန့ၣ် ပှၤစူၢ်က့ၤနာ်က့ၤဖိခဲလၢာ် အိၣ်ဒီး တၢ်မၤအသနၢၣ်စုာ်စုာ်ဒီး, အဆၢဖိ ၂၇-၃၁ အပူၤစံးဝဲ တၢ်မၤဘျါက့ၤတၢ်လၢ အလီၤလိာ်လီၤလးမ့ၢ်ဂ့ၤ, တၢ်မၤဂ့ၤမၤစၢၤပှၤဂုၤပှၤဂၤမ့ၢ်ဂ့ၤ, တၢ်ဟ့ၣ်ကိးမံၤဒဲးန့ၣ် မ့ၢ်တၢ်အကါဒိၣ်ခဲလၢာ် န့ၣ်လီၤ. အဆၢဖိ ၂၂-၂၄ ပာ်ဖျါဝဲ တၢ်ကဘၣ်မၤအသးနီၢ်နီၢ်မ့ၢ် ပှၤမၤတၢ်လၢ ပှၤတထံၣ်စိပာ်ဖျါတဖၣ် ကြၢးဘၣ် တၢ်မၤလၤကပီၤဒိၣ်ဒိၣ်အါအါတၢ်န့ၣ်လီၤ.
နမ့ၢ်ပှၤမၤတၢ်လၢ “တၢ်ဖီလာ်”အကတီၢ်န့ၣ်ဧါ. မ့မ့ၢ်ဒ်န့ၣ်ဒီး ယူာ်ထီၣ်ထီ နခိၣ်တက့ၢ်. လၢပဝဲခဲလၢာ်အဂီၢ် တၢ်မၤလၢနမၤ မ့ၤတအိၣ်တသ့ဝဲ သပှၢ်တၢၢ်ဘၣ်အဃိ တၢ်ဖံးတၢ်မၤန့ၣ် ကဘၣ်တၢ်မၤလၤကပီၤအီၤလၢ ကစၢ်ယွၤန့ၣ်လီၤ.
