တၢ်ဘါသရိာ်ပူၤ ပကယၢကယဲတၢ်လၢမူးလီၤဆီအဂီၢ်အဆၢကတီၢ်, မူဒါခိၣ်ပိာ်မုၣ်ဟဲကဒူးကဒ့ၣ်ယၤလၢ ယတၢ်လဲၤခီဖျိစှၤအဃိန့ၣ်လီၤ. ဖဲအဝဲဟးထီၣ်ဝံၤန့ၣ် ပိာ်မုၣ်အဂၤတဂၤ ဟဲဃီၤဆူယအိၣ်ဒီးစံးဘၣ်ယၤ “ဘၣ်ဃးဒီးအတၢ်ကတိၤန့ၣ် တဘၣ်ပာ်လၢနသးပူၤတဂ့ၤ. ပကိးအီၤလၢ အံ. ကၠံၣ်. အၣ်. (E.G.R-Extra Grace Required) ပှၤလၢအလိၣ်အါထီၣ် တၢ်ဘျုးတၢ်ဖှိၣ်တဂၤ” န့ၣ်လီၤ.
တၢ်ကတိၤတထံၣ်အံၤအဃိ ယနံၤဘၣ်ယသးန့ၣ်လီၤ. တယံာ်ဘၣ်န့ၣ် ဖဲတၢ်သဘံၣ်ဘုၣ်မ့ၢ်အိၣ်ဒီးပှၤတဂၤလၢ်လၢ်န့ၣ် ယစးထီၣ်သူ တၢ်ကတိၤအံၤလၢ ပှၤသ့ၣ်တဖၣ်အလိၤန့ၣ်လီၤ. နံၣ်တဖၣ်လဲၤပူၤကွံာ်ဝံၤအလီၢ်ခံ, သရိာ်တဖျၢၣ်အံၤအပူၤ ယဆ့ၣ်နီၤကနၣ် တၢ်ဖးဖျါထီၣ် ပိာ်မုၣ်အံၤလၢအလိၣ်အါထီၣ်ဘၣ် ကစၢ်ယွၤအတၢ်ဘျုးတၢ်ဖှိၣ်တဂၤ အသးသမူအဂ့ၢ်အကျိၤ, ဖဲလၢတၢ်ဘါဆိးသီအတၢ်သံ အဆၢကတီၢ်န့ၣ်လီၤ. တၢ်အိၣ်ဖှိၣ်သရၣ် စံးကတိၤဟ့ၣ်နီၤလီၤဝဲ, လၢတၢ်လီၢ်ခံ ဒီးလၢပှၤအါဂၤတသ့ၣ်ညါတၢ်အပူၤ ပိာ်မုၣ်တဂၤအံၤ မၤတ့ၢ်တၢ်လၢကစၢ်ယွၤအဂီၢ်ဒ်လဲၣ် ဒီးသးအိၣ်ဟ့ၣ်မၤစၢၤညီတၢ်ဆူ ပှၤဂုၤပှၤဂၤအအိၣ်ဒ်လဲၣ်အဂ့ၢ်န့ၣ်လီၤ. အပူၤကွံာ်န့ၣ် မ့ၢ်လၢယစံၣ်ညီၣ်ဒီးစံးကတိၤအၢသီအီၤဒီးပှၤဂုၤပှၤဂၤတဖၣ်, ယကိးဘၣ်အဝဲသ့ၣ်လၢ “ပှၤလၢအလိၣ်အါထီၣ်ဘၣ်ယွၤအတၢ်ဘျုးတၢ်ဖှိၣ်”အဃိ ယထုကဖၣ် ဃ့ကညးကစၢ်ယွၤလၢ ကပျၢ်ယတၢ်ဒဲးဘးအဂီၢ်န့ၣ်လီၤ. နီၢ်နီၢ်တခီ ယနီၢ်ကစၢ်ဒၣ်ယဲ ယလိၣ်အါထီၣ်ဘၣ် ကစၢ်ယွၤအတၢ်ဘျူးတၢ်ဖှိၣ် ဒ်ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် တဂၤလၢ်လၢ်အသိးန့ၣ်လီၤ.
အ့ဖ့းစူး ၂:၃ အပူၤ ပှၤတၢ်မၢဖိစီၤပီလူး ပာ်ဖျါထီၣ်ဝဲ ပှၤစူၢ်က့ၤနာ်က့ၤတၢ်ဖိတဖၣ် ခဲလၢာ်န့ၣ် “အိၣ်ဖျဲၣ်လၢ ပှၤဂ့ၤဘၣ် တၢ်သးဒိၣ်ထီၣ်” န့ၣ်လီၤ. ဘၣ်ဆၣ်ကစၢ်ယွၤဟ့ၣ်ပှၤ တၢ်အုၣ်က့ၤခီၣ်က့ၤအတၢ်ဟ့ၣ်, တၢ်ဟ့ၣ်လၢပတကြၢးဒိးန့ၢ်, တၢ်ဟ့ၣ်လၢ ပကစၢ်ဒၣ်ဝဲ တၢ်ကျဲးစၢၤဃုဒိးန့ၢ်အီၤအဂီၢ်တသ့အဃိ အဆၢဖိ ၉ စံးဘၣ်ပှၤ “ဒ်သိး ပှၤသုတပာ်အသးကဖၢလၢနီတဂၤတဂ့ၤ” န့ၣ်လီၤ.
လၢပတၢ်အိၣ်မူအတၢ်လဲၤ တကတီၢ်ဘၣ်တကတီၢ်န့ၣ် ပမ့ၢ်ဟ့ၣ်လီၤအးလီၤပသးဆူကစၢ်ယွၤအအိၣ်န့ၣ်ဒီး သးစီဆှံကမၤတၢ်လၢ တၢ်ဆီတလဲကွံာ် ပသကဲာ်ပဝး ဒ်သိးပကဆဲးကပီၤကဒါက့ၤ ကစၢ်ယ့ၣ်ရှူးခရံာ် အက့ၢ်အဂီၤသကဲာ်ပဝးအဂီၢ်န့ၣ်လီၤ. ကယဲၢ်ပှၤစူၢ်က့ၤနာ်က့ၤတၢ်ဖိတဖၣ်ခဲလၢာ် လိၣ်အါထီၣ်ဘၣ်ယွၤအတၢ်ဘျုးတၢ်ဖှိၣ်န့ၣ်လီၤ. ဘၣ်ဆၣ် ၂ကရံၣ် ၁၂:၉ စံးဘၣ်ပှၤ “ယဘျုးယဖှိၣ်အါလံလၢနဂီၢ်လံ” အဃိဒီး ပစံးဘျုးကစၢ်ယွၤသ့ဝဲဒၣ်န့ၣ်လီၤ.
