နမ့ၢ်အဲၣ် တၢ်ဘှ့ၣ်တၢ်ဘှီၣ်န့ၣ်, နကဘၣ်သူၣ်ဘၣ်သး ဒၢးအိၣ်ဝဲတဖျၢၣ် ဖဲဝ့ၢ်မ့ၣ်နံၣ်ယၤပိလ့း(စ) (Minneapolis), ကီၢ်စဲၣ်မ့ၣ်နံၣ်စိထၣ် (Minnesota)န့ၣ်လီၤ. ဒၢးတဖျၢၣ်အံၤ ဆူးသဝံးကွံာ်ဒီး မၤဆံးလီၤစှၤလီၤ တၢ်ကလုၢ်အသီၣ်တဖၣ်ခဲလၢာ် တုၤ မျးကယၤ ၉၉.၉၉ န့ၣ်လီၤ. အီၣ်ဖံ(လ)အတၢ်မၤကွၢ်တၢ်သူၣ်ထီၣ် (Orfield Laboratories) လၢတၢ်သီၣ်တၢ်သဲတအိၣ်ဘၣ်အံၤန့ၣ် အမံၤဟူသၣ်ဖျါလၢ ဟီၣ်ခိၣ်ဒီဘ့ၣ် ဒ်အမ့ၢ် “တၢ်လီၢ်အဘှ့ၣ်ဘှီၣ်ကတၢၢ်လၢဟီၣ်ခိၣ်ချၢ” အံၤန့ၣ်လီၤ. ပှၤလၢအသးအိၣ်လဲၤခီဖျိ ကွၢ်တၢ်လီၢ်ဖဲတၢ်သီၣ်တၢ်သဲ တအိၣ်တတီၤအံၤန့ၣ် ကဘၣ်ဆ့ၣ်နီၤဝဲ ဒ်သိးတၢ်သးကဒံကဒါ အသုတအိၣ်ထီၣ်ဝဲလၢ တၢ်ကလုၢ်အသီၣ်အသဲတအိၣ်ဘၣ်အဃိန့ၣ်လီၤ. ပှၤလၢအအိၣ်ဆိးကွၢ်ဝဲလၢ ဒၢးပူၤအံၤတဖၣ် အါန့ၢ် (၄၅) မံးနံးန့ၣ် တအိၣ်ဘၣ်နီတဂၤဒံးဘၣ်န့ၣ်လီၤ.
ပှၤလၢအလိၣ်ဘၣ် တၢ်ဘှ့ၣ်တၢ်ဘှီၣ်ဒ်သိးအံၤန့ၣ် အိၣ်ဒၣ်ထဲ ပှၤစှၤဂၤန့ၣ်လီၤ. ဘၣ်တဘျီဘျီ ပဆၢမိၣ်န့ၢ်ဘၣ်တၢ်ဘှ့ၣ်တၢ်ဘှီၣ် တဆံးတက့ၢ်ဖိ, ဖဲဟီၣ်ခိၣ်ချၢအံၤလၢအသီၣ်သဲဒီး အတၢ်ဖံးတၢ်မၤအါတဖျၢၣ်အပူၤန့ၣ်လီၤ. တၢ်ကစီၣ်တဖၣ်လၢ ပကွၢ်အီၤ ဒီးကမျၢၢ်ဂ့ၢ်ဝီတၢ်ကစီၣ် (social media) လၢပစူးကါတဖၣ်န့ၣ် ဟဲစိာ်န့ၢ်ပှၤ တၢ်ကလုၢ်အသီၣ် အကလုာ်ကလုာ် ဒ်သိးကထုးန့ၢ်ပသးအဂီၢ်န့ၣ်လီၤ. တၢ်ကစီၣ်အါတက့ၢ်န့ၣ် အိၣ်ပှဲၤဒီးတၢ်ကတိၤ ဒီးတၢ်အက့ၢ်အဂီၤတဖၣ်လၢ အထိၣ်ဟူးထိၣ်ဂဲၤနီၢ်သး လၢအတဂ့ၤတကပၤန့ၣ်လီၤ. ပမ့ၢ်မၤလၢာ်တၢ်ဆၢကတီၢ်လၢ တၢ်တဖၣ်အံၤန့ၣ်ဒီး ကကဲထီၣ်တၢ်ထုးဖး ပှၤဒီးကစၢ်ယွၤအကလုၢ် ညီကဒၣ် သ့ဝဲဒၣ်န့ၣ်လီၤ.
၁စီၤ ၁၉:၁၁-၁၂ အပူၤန့ၣ် ဝံအ့ၤလံယၤ လဲၤထံၣ်ကစၢ်ယွၤ လၢကစၢၢ်ဃိၤရ့း အဆၢကတီၢ်, ကလံၤမုၢ်မ့ၢ်ဂ့ၤ, ဟီၣ်ခိၣ်ဟူးဝးမ့ၢ်ဂ့ၤ, ဒီးလၢမ့ၣ်အူကိၢ်ကဲၤမ့ၢ်ဂ့ၤ တၢ်တဖၣ်လၢအကလုၢ်သီၣ်ဖးဒိၣ် ဒီးလၢအကမၤဟးဂီၤတၢ်တဖၣ်အပူၤန့ၣ် ကစၢ်ယွၤတအိၣ်ဝဲဒၣ်ဘၣ်. အဆၢဖိ ၁၂-၁၄ ပာ်ဖျါဝဲ ဖဲဝံအ့ၤလံယၤနၢ်ဟူ “တၢ်အသီၣ်ဖိနဲ ဒီးကပုာ်လုး” န့ၣ် ဝံၤဒီးပာ်တဒၢအမဲာ်ဒီးဟးထီၣ်ဝဲလၢ လ့ပူၤအဆၢကတီၢ် ထံၣ်ဘၣ်ဝဲ “ယွၤတၢ်သုးမုၢ်အကစၢ်” န့ၣ်လီၤ.
နသးကဆၢန့ၢ် တၢ်ဘှ့ၣ်တၢ်ဘှီၣ်သ့ၣ်သ့ၣ် ဘၣ်ဆၣ်, အါန့ၢ်အန့ၣ်, နသးကဆၢနၢ်ဟူဘၣ် ကစၢ်ယွၤအကလုၢ်န့ၣ်လီၤ. ဒ်သိး နသုတလဲၤပူၤကွံာ် ‘တၢ်အသီၣ်ဖိနဲ ဒီး ကပုာ်လုး’နီတဘျီ တဂ့ၤအဂီၢ် ဃုထံၣ်န့ၢ်တၢ်ဘှ့ၣ်တၢ်ဘှီၣ်ဒၢးလၢ နတၢ်အိၣ်မူအပူၤန့ၣ်တက့ၢ်.
