လၢကွဲၤထံၣ်ဟူတၢ်ဂီၤရဲၣ် “တၢ်မၤမူဒါခိၣ်လၢ အဃုသ့ၣ်ညါခူသူၣ်တၢ်” (Undercover Boss) အပူၤ, ခီပနံၣ်လၢအဆါ တၢ်အီၣ်လီၤသကၤဆၢတဖၣ် အ CEO (ပှၤအခိၣ်လၢ လီၢ်လၤအထီကတၢၢ်လၢခီပနံၣ်တခါအပူၤ)န့ၣ် ကူသိးထီၣ်ဝဲ ပှၤတူၢ်လိာ်စ့ တၢ်မၤအကူအသိး (Uniform) ဒီးတၢ်ကယၢကယဲအမဲာ်, ဒီးလဲၤမၤဝဲလၢ ခီပနံၣ်အကျးတဖၣ် အကျါတဖျၢၣ်, ဒ်ပှၤမၤတၢ်ဖိ “အသီ”တဂၤန့ၣ်လီၤ. အတၢ်ကွၢ်စိတခီ မ့ၢ်ဝဲဒ်သိး ကထံၣ်ဘၣ် တၢ်အိၣ်အသး မၤအသးနီၢ်နီၢ်လၢ ကျးအပူၤန့ၣ်လီၤ. လၢအတၢ်ကွၢ်ထံကွၢ်ဆးဒီး ထံၣ်န့ၢ်တၢ်တဖၣ်အဖီခိၣ်န့ၣ်, အဝဲမၤလိၤမၤဘၣ်က့ၤဝဲ တၢ်ဂ့ၢ်တနီၤ လၢကျးဘၣ်ကွၢ်ဆၢၣ်မဲာ်ဝဲန့ၣ်လီၤ.
ကစၢ်ယ့ၣ်ရှူး “ဒိးန့ၢ်ကုၢ်အက့ၢ်အဂီၤ” (ဖံလံးပံၤ ၂:၇), ဒ်သိးကဃုန့ၢ်ကျဲကပူၤ လၢပတၢ်ဂ့ၢ်တၢ်ကျိၤတဖၣ်အဂီၢ်လီၤ. အဝဲကဲထီၣ် ပှၤကညီတဂၤ, လဲၤတၢ်လၢဟီၣ်ခိၣ်ချၢ, သိၣ်လိပှၤလၢယွၤအဂ့ၢ်, ဒီးလၢခံကတၢၢ် ဒိးသံအသးလၢထူၣ်စုညါအလိၤ လၢပတၢ်ဒဲးဘးတဖၣ်အဂီၢ်လီၤ(:၈). တၢ်ဟ့ၣ်လီၤသးအံၤ ဒုးနဲၣ်ဖျါထီၣ်ခရံာ် အတၢ်ဆီၣ်လီၤသးန့ၣ်လီၤ. လၢတၢ်ဒိကနၣ်အပူၤ, အဝဲဟ့ၣ်လီၤအသးသမူ ဒ်တၢ်ဒဲးဘးအတၢ်လုၢ်တၢ်ပာ်အသိးန့ၣ်လီၤ. အဝဲအိၣ်မူဝဲလၢ ဟီၣ်ခိၣ်ချၢ ဒ်ပှၤပိာ်ခွါ တဂၤအသိး, ဒီးလဲၤခီဖျိဝဲ တၢ်လၢပလဲၤခီဖျိ, ဒ်နၤနၤယၤယၤအသိးန့ၣ်လီၤ.
ဒ်ပှၤစူၢ်က့ၤနာ်က့ၤတၢ်လၢ ကစၢ်ယ့ၣ်ရှူးအပူၤအသိးန့ၣ်, ပဘၣ်တၢ်ကိးပှၤလၢ ပကအိၣ်ဒီးခရံာ်အသး လၢပပူၤ လၢပတၢ်ရ့လိာ်ဘၣ်ထွဲဒီး ပှၤစူၢ်က့ၤနာ်က့ၤတၢ်ဖိ အဂုၤအဂၤတဖၣ်န့ၣ်လီၤ (:၅). ယွၤမၤစၢၤပှၤဒ်သိး ပကကူထီၣ်သိးထီၣ် တၢ်ဆီၣ်လီၤပသးဒီး ဟံးန့ၢ်ခရံာ်အသးအဂီၢ်လီၤ (:၅). အဝဲသဆၣ်ထီၣ်ပှၤလၢ ပကမူဒ်တၢ်ခ့တၢ်ပှၤတဖၣ် လၢအအိၣ်ကတဲာ်ကတီၤအသးလၢ ကမၤလၢပှဲၤပှၤဂၤ အတၢ်လိၣ်တဖၣ် ဒီးယူာ်ဃီၤပစုအတၢ်မၤစၢၤန့ၣ်လီၤ. ဖဲယွၤဆှၢပှၤ ဒ်သိးပကအဲၣ်ပှၤဂၤ လၢတၢ်ဆီၣ်လီၤသးအပူၤန့ၣ်, ပမၤတၢ်ဂ့ၤန့ၢ်အလီၢ်သ့ဝဲ ဒ်သိးပကမၤအဝဲသ့ၣ် အတၢ်ဒီး ဃုန့ၢ်တၢ်အစၢလၢ အတၢ်ဂ့ၢ်ကီခဲလၢ အဝဲသ့ၣ်ဘၣ်ကွၢ်ဆၢၣ်မဲာ်, လၢတၢ်သးအိၣ်မၤစၢၤတၢ်အပူၤန့ၣ်လီၤ.
