ဟါရိၣ် (Harold) စံးဝဲဒၣ်, “ယမ့ၢ်ခွါကမဲ ဒီးယအိၣ်ဘှံးလၢတၢ်ဖံးတၢ်မၤ, ယဖိတဖၣ်အတၢ်မၤအါလၢ အဟံၣ်ဖိဃီဖိဒၣ်ဝဲ, ဒီးမုၢ်ဃ့ၢ်လီၤတၢ်ဘှ့ၣ်တၢ်ဘှီၣ်အကတီၢ်န့ၣ် ယဘၣ်မၤလၢာ်တၢ်ဆၢကတီၢ်လၢ ဘၣ်ကွၢ်ကီဒၣ် တၢ်အကဒုတဖၣ်လၢ တၢ်အဒူၣ်လိၤန့ၣ်လီၤ. ယသးပူၤယတူၢ်ဘၣ် ဒ်သိးယတဂိာ်တသီၣ်လၢၤဘၣ်န့ၣ်လီၤ.” အဝဲစံးဘၣ်အဖိမုၣ်တလီၢ်လီၢ်လၢ “ယသးပှၢ်လံ, ဒီးယအိၣ်မူအိၣ်ဂဲၤတ့ၢ်လံတၢ်အိၣ်မူ လၢလၢပှဲၤပှဲၤလံ. ယတၢ်တိာ်, တၢ်ပညိၣ်တဖၣ် တအိၣ်လီၤလီၤဆီဆီလၢၤဘၣ်. ကစၢ်ယွၤမ့ၢ်အဲၣ်ဒိးကိးက့ၤယၤဒီး ကိးဝဲသ့ကိးဆၢကတီၢ်ဒဲးလံ န့ၣ်လီၤ.”
ဘၣ်တနံၤ မုၢ်ဃ့ၢ်လီၤအဆၢကတီၢ်န့ၣ် ဖဲအစံးကတိၤလိာ်သးဒီး ပှၤအိၣ်လၢအဟံၣ်အဃၢၤဝံၤ ဟါရိၣ်အတၢ်ဆိကမိၣ်တဖၣ် ဆီတလဲကွံာ် အသးန့ၣ်လီၤ. ဟါရိၣ်စံးဝဲလၢ “ပှၤအိၣ်လၢ ယဟံၣ်အဃၢၤတဂၤ, အတၢ်ဂ့ၢ်ကီအိၣ်ဒီးအဖိတဖၣ်အဃိ ယဃ့ဘါထုကဖၣ်တၢ်လၢအဂီၢ် န့ၣ်လီၤ. လၢခံန့ၣ်ယဟ့ၣ်ခီဟ့ၣ်နီၤလီၤတၢ်သးခုကစီၣ်ဆူအအိၣ် ဒီးတၢ်မၤအသးအံၤန့ၣ် ယနၢ်ပၢၢ်လၢယအိၣ်ဒံးဒီးတၢ်တိာ်တၢ်ပညိၣ် အဖၢမုၢ်န့ၣ်လီၤ. ပှၤလၢအတနၢ်ဟူဒံးဘၣ်ကစၢ်ယ့ၣ်ရှူးအဂ့ၢ် မ့ၢ်အိၣ်တဘျီလၢ်လၢ်, ယကဘၣ်စံးကတိၤဒုးသ့ၣ်ညါအဝဲသ့ၣ်လၢ တၢ်အုၣ်က့ၤခီၣ်က့ၤကစၢ်အဂ့ၢ်န့ၣ်လီၤ.”
လၢမုၢ်ဆ့ၣ်မုၢ်ဂီၤ ညီနုၢ်တၢ်ထံၣ်လိာ်သးအကတီၢ် ဟါရိၣ်သူဝဲအတၢ်အိၣ်မူ ခီဖျိနီၤဟ့ၣ် အတၢ်စူၢ်တၢ်နာ်ဆူ ပှၤအိၣ်လၢအဟံၣ်အဃၢၤတဂၤအဃိ ပှၤတဂၤအံၤအတၢ်အိၣ်မူ ဆီတလဲအသးန့ၣ်လီၤ. တၢ်မၤအသးဒ်သိးအံၤအဂ့ၢ်န့ၣ် လံာ်၂တံၤမသ့း အဆၢဒိၣ် ၁ အပူၤ စီၤပီလူးပာ်ဖျါဝဲ ပိာ်မုၣ်ခံဂၤ လၢကစၢ်ယွၤစူးကါအဝဲသ့ၣ် ဒ်သိးပှၤအဂၤအတၢ်အိၣ်မူ ကဆီတလဲအဂီၢ်, ပှၤတဂၤအံၤ မ့ၢ်စီၤတံၤမသ့း, ပှၤသးစၢ်လၢအမၤသကိးတၢ်ဒီး စီၤပီလူးန့ၣ်လီၤ. ၂တံၤ ၁:၅ အပူၤ ပကထံၣ်ဘၣ် စီၤတံၤမသ့း အဖံနီၢ်လိၤအ့ၣ် ဒီးအမိၢ်နီၢ်အူၤနံက့ၤတဖၣ်န့ၣ် အိၣ်ဒီး “တၢ်နာ်နီၢ်နီၢ်” လၢအဝဲသ့ၣ်ဟ့ၣ်သါဝဲဒၣ်ဆူ စီၤတံၤမသ့းအအိၣ်န့ၣ်လီၤ. ဒ်သိးပှၤသးစၢ်ဖိစီၤတံၤမသ့း ကဒိၣ်ထီၣ်ဒီး ကကဲထီၣ် ကစၢ်ယ့ၣ်ရှူးအပျဲၢ်အဘီၣ် တီတီလိၤလိၤတဂၤအဂီၢ်န့ၣ်, အဝဲမၤလိန့ၢ်တၢ်စူၢ်တၢ်နာ်အမ့ၢ်အတီ ခီဖျိလၢဟံၣ်ပူၤဃီပူၤ ညီနုၢ်တနံၤဘၣ်တနံၤ တၢ်အိၣ်မူအိၣ်ဂဲၤအပူၤဒီး အကတၢၢ်န့ၣ် ကဲထီၣ်ခိၣ်နၢ်တဂၤလၢ အ့းဖ့းစူးတၢ်အိၣ်ဖှိၣ် လၢအမၤကစၢ်ယွၤအတၢ်မၤန့ၣ်လီၤ.
ပသးအနံၣ်အလါ, ပပှၤတဝၢတၢ်အိၣ်အသးလၢပဒိၣ်ထီၣ်တၢ်ဘၣ်, မ့တမ့ၢ် တၢ်အိၣ်အသး မၤအသးတဖၣ် ကမ့ၢ်ဒၣ်ဝဲ ဒ်လဲၣ်ဂ့ၤဒ်လဲၣ်ဂ့ၤ, ပအိၣ်ဒီး တၢ်တိာ်တၢ်ပညိၣ်တမံၤ, လၢအမ့ၢ် ပကဘၣ်စံးကတိၤဒုးသ့ၣ်ညါ ပှၤဂုၤပှၤဂၤလၢကစၢ်ယ့ၣ်ရှူးအဂ့ၢ်န့ၣ်လီၤ.
