“ကိးဆၢကတီၢ်ဒဲးလၢ အစီဝဲဆှံဝဲ”(Every Moment Holy) မ့ၢ်လံာ်ဃံလၤ တဘ့ၣ် ဘၣ်ဃးတၢ်ထုကဖၣ်လၢ တၢ်ဟူးဂဲၤမၤတၢ်အကလုာ်ကလုာ်အဂီၢ်, ပာ်ဃုာ် တၢ်မၤယိယိဖိ ဒ်တၢ်ကတဲာ်ကတီၤတၢ်အီၣ် မ့တမ့ၢ် တၢ်ဆှုၣ်ကူဆှုၣ်ကၤတဖၣ်စ့ၢ်ကီးလီၤ. မုၢ်ဆ့ၣ်မုၢ်ဂီၤတၢ်မၤတဖၣ်အံၤ ပတမၤအီၤန့ၣ် တသ့ဘၣ်. ဒီးဖဲပမၤအီၤအခါ ကဲထီၣ် တၢ်မၤလၢ ပမၤဝံၤမၤက့ၤ မ့တမ့ၢ် တၢ်မၤလၢအတလီၤသးစဲန့ၣ်လီၤ. လံာ်န့ၣ် မၤသ့ၣ်နီၣ်ယၤလၢ ၦၤကွဲးလံာ် ကၠံၢ်.က့ၣ် ခၠၢးစတၣ်တၢၣ် (G.K Chesterton) အတၢ်ကတိၤတဖၣ်လီၤ. “တချုးတၢ်အီၣ်, နစံးတၢ်ဘျုးတၢ်ဖှိၣ်. မ့ၢ်လံ. ဘၣ်ဆၣ် ယစံးတၢ်ဘျုးတၢ်ဖှိၣ် တချုး ယတ့တၢ်ဂီၤတကွီၣ်, တချုး ယခဲၣ်တၢ်ဂီၤ, တချုး ယယူၤထံ, တချုး တၢ်ဘှီကရၢၢ်, တၢ်တမဲးစု, တၢ်ဟးကျဲ, တၢ်လိာ်ကွဲ, တၢ်ဂဲၤကလံၣ် လၢတၢ်ခဲလၢာ်အပူၤ, တချုး ယစုၣ်လီၤ ယထိၣ်ဒံးဘိလၢမဲၣ်ထံပူၤ ဒီးကွဲးတၢ်န့ၣ် ယစံးတၢ်ဘျုးတၢ်ဖှိၣ်လီၤ”.

တၢ်ဟ့ၣ်ဂံၢ်ဟ့ၣ်ဘါ ဒ်သိးန့ၣ်တဖၣ်န့ၣ် မၤလိၤမၤဘၣ်က့ၤ ယတၢ်ထံၣ်လၢ တနံၤဘၣ်တနံၤ တၢ်ဟူးဂဲၤမၤတၢ်အလိၤလီၤ. တဘျီတခီၣ်, ယနီၤဖး ယတၢ်မၤတဖၣ် ဒ်အမ့ၢ် တၢ်ဖးတၢ်ဘူၣ်တၢ်ဘါ လံာ်တဖၣ် တချုးတၢ်အီၣ်န့ၢ် မ့ၢ်တၢ်လၢအဖျါအိၣ်ဒီး နီၢ်သးအလုၢ်အပှ့ၤ ဒီးတၢ်မၤအဂၤတဖၣ် ဒ်အမ့ၢ်တၢ်သ့စီပာ်က့ၤ လီခီ ဖဲတၢ်အီၣ်ဝံၤအခါ, တၢ်မၤအံၤ မ့ၢ်တၢ်လၢ အအိၣ်ဒီးနီၢ်သး အလုၢ်အပှ့ၤဆံးကိာ်န့ၣ်လီၤ. စီၤပီလူးတြူာ်ကွံာ်တၢ်နီၤဖးဒ်န့ၣ် လၢအတၢ်ပရၢတဘ့ၣ်အပူၤဆူ ၦၤကလီးစဲဖိ လၢအဃုထၢမူလၢ ယ့ၣ်ရှူးအဂီၢ်လီၤ. စီၤပီလူးဟ့ၣ်ဂံၢ်ဟ့ၣ်ဘါအဝဲသ့ၣ်လၢ တၢ်ကတိၤတဖၣ်အံၤလီၤ.“ကယဲၢ်သုမၤတၢ်န့ၣ်, လၢတၢ်ကတိၤမ့ၢ်ဂ့ၤ, တၢ်မၤမ့ၢ်ဂ့ၤ, မၤတၢ်ခဲလၢာ်လၢ ကစၢ်ယ့ၣ်ရှူးအမံၤတက့ၢ်” (၃:၁၇). တၢ်မၤတၢ်လၢယ့ၣ်ရှူးအမံၤအပူၤန့ၣ် အခီပညီ မ့ၢ်တၢ်ဟ့ၣ်ထီၣ်တၢ် လၤကပီၤဆူအအိၣ်, ဒီးတၢ်အိၣ်ဒီး တၢ်လီၤတံၢ်လၢ ကစၢ်အသးစီဆှံ ဟ့ၣ်ဆူၣ်ထီၣ်ၦၤလၢ ပကမၤထီၣ်ဘးဘၣ်တၢ်တဖၣ်လီၤ.

“ကယဲၢ်နမၤတၢ်တမံၤလၢ်လၢ်” တၢ်မၤယိယိခဲလၢာ် လၢပတၢ်အိၣ်မူပူၤတဖၣ်န့ၣ် ကိးဆၢကိးကတီၢ်, မၤဆူၣ်ထီၣ်ၦၤသ့လၢ ကစၢ်ယွၤအသးစီဆှံဒီး မၤဝံၤဘၣ်အီၤလၢ ကျဲလၢဟ့ၣ်ထီၣ်တၢ်လၤကပီၤဆူယ့ၣ်ရှူးလီၤ.