လၢကီၢ်စွံးစၢၣ်လဲၣ်, ပှၤအိၣ်ဆိးလၢ ဝ့ၢ်အိထၢၣ်ဖိတဖၣ်န့ၣ် ဘှ့ၣ်ပစီၤခၠီးကလဲးကမူၣ်ဖိတဖၣ် ဟဲလီၤ ဒီးမၤဘၢဝ့ၢ်ဒီတဝ့ၢ်အဃိ, ကဲထီၣ် တၢ်ကမၢကမၣ်လၢ အဝဲသ့ၣ်အဂီၢ်န့ၣ်လီၤ. လၢတၢ်ကပိာ်ကပၤ တၢ်ထုးထီၣ်ခၠီးကလဲးတၢ်မၤလီၢ်တတီၤန့ၣ် ကလံၤနုာ်လီၤဟးထီၣ်အကျဲသနူ ဟးဂီၤအဃိ ကိၣ်ကိ (cocoa) ကမူၣ်တဖၣ်ဟးထီၣ်ဆူကလံၤကျါဒီး ကိၣ်သကၤဆၢအဂ့ၤတဖၣ် ပှဲၤလုၣ်ဘၢဝဲဟီၣ်ကဝီၤပူၤန့ၣ်လီၤ. ခၠီးကလဲးကမူၣ်ဖိတဖၣ်အံၤ လၢပှၤအဲၣ်ခၠီးကလဲးတဖၣ်အဂီၢ် ဒုးကဲထီၣ်တၢ်မံမီၢ်ဆူ တၢ်မၤအသးနီၢ်နီၢ်န့ၣ်လီၤ.

တၢ်လၢခၠီးကလဲးန့ၣ် တၢ်လိၣ်ဘၣ်တဖၣ်လၢ ပှၤကညီတဂၤ ကန့ၢ်ဂံၢ်န့ၢ်ဘါအဂီၢ် တဟ့ၣ်ထီၣ်ဝဲအလၢအပှဲၤဘၣ်ဆၣ် ပှၤအံၣ်စရ့လးဖိတဖၣ် ကန့ၢ်ဂံၢ်န့ၢ်ဘါအဂီၢ် ကစၢ်ယွၤ ကတဲာ်ကတီၤ ဟ့ၣ်လီၤကိၣ်လၢမူခိၣ်န့ၣ်လီၤ. ဖဲပှၤဂီၢ်မုၢ်တဖၣ် လဲၤတၢ်လၢပှၢ်မုၢ်ကနၢအဆၢကတီၢ်, အဝဲသ့ၣ်စးထီၣ်ကဒူးကဒ့ၣ်တၢ် ဘၣ်ဃးဒီးတၢ်အီၣ်တၢ်အီအကလုာ်ကလုာ် လၢအအိၣ်တ့ၢ်လၢ အဲၤကူပတူးန့ၣ်လီၤ. ဒ်သိးကစံးဆၢ ပှၤဂီၢ်မုၢ်တဖၣ် အတၢ်အိၣ်အသးအံၤအဂီၢ်, ၂မိၤ ၁၆:၄ အပူၤ ကစၢ်ယွၤစံးဝဲ, “ယကဒုးဟဲစူၤကိၣ်လၢ မူခိၣ်လၢသုဂီၢ်” ဒ်သိးပှၤဂီၢ်မုၢ်တဖၣ် ကမူဝဲအဂီၢ်န့ၣ်လီၤ. ကိးမုၢ်ဂီၤဒဲး ဖဲဘှ့ၣ်ပစီၤတဖၣ်ဃ့ထီဝဲဒၣ်အဆၢကတီၢ်, ကိၣ်ကဘျံးဘူဘူဖိတဖၣ် အိၣ်လီၤတဲာ်တ့ၢ်ဝဲဒၣ်န့ၣ်လီၤ. တၢ်မၤအသးဖဲလၢမုၢ်တနံၤအံၤန့ၣ် ပှၤအံၣ်စရ့လးဖိတဖၣ် ကအိၣ်ဝဲ ခံကကွဲၢ်ဃၣ်ဃၣ် ကစၢ်ယွၤမၢအဝဲသ့ၣ်ထၢဖှိၣ်ပာ်ဖှိၣ် ကိၣ်ကဘျံးဖိတဖၣ် ဒ်အဝဲသ့ၣ်လိၣ်ဘၣ်ဝဲအသိးန့ၣ်လီၤ. ဖဲပှၤဂီၢ်မုၢ်တဖၣ် ဟးဝ့ၤဝီၤလၢပှၢ်မုၢ်ကနၢ အနံၣ်လွံၢ်ဆံအတီၢ်ပူၤ, ကစၢ်ယွၤ လုၢ်အီၣ်လုၢ်အီ အဝဲသ့ၣ် ခီဖျိလၢကိၣ်မၤနၤ လၢပတၢ်နၢ်ပၢၢ်တထီၣ်ဘးဘၣ်အပူၤန့ၣ်လီၤ.

ကိၣ်မၤနၤအဂ့ၢ် ပသ့ၣ်ညါဒၣ်ထဲ ၂မိၤ ၁၆:၃၁ ပာ်ဖျါဖဲ “တၢ်န့ၣ်မၤသး ဒ်နၣ်နၣ်အချံအသိး ဝါဝဲ, ဒီးမၤသးဒ်ကိၣ်ဘ့ၣ်ဘၣ်ဒီး ကနဲစီအသိး” န့ၣ်လီၤ. ကိၣ်မၤနၤန့ၣ် တမ့ၢ်တၢ်လၢ ကထုးန့ၢ်ပသးအါန့ၢ် ခၠီးကလဲးလၢပအီၣ်ဝံၣ်ဘဲ ထီဘိဘၣ်ဆၣ်, ကစၢ်ယွၤအတၢ်လုၢ်အီၣ် အပှၤဂီၢ်မုၢ်န့ၣ် ဖျါလီၤတံၢ်ဝဲဒၣ်န့ၣ်လီၤ. ကိၣ်မၤနၤန့ၣ် ဒုးနဲၣ်ပှၤဆူ ကစၢ်ယ့ၣ်ရှူး, လၢ ယိၤ ၆:၄၈ အပူၤ ပာ်ဖျါထီၣ်အသးဒ်အမ့ၢ် “တၢ်မူအကိၣ်” ဒီးအဆၢဖိ ၅၁ စံးဘၣ်ပှၤ, ကစၢ်ယ့ၣ်ရှူးမ့ၢ် ပှၤလၢအမၤလၢပှဲၤ တနံၤဘၣ်တနံၤတၢ်လိၣ်တဖၣ်လၢ ပတၢ်အိၣ်မူအဂီၢ် ဒီးမၤလီၤတံၢ်န့ၢ်ပှၤ တၢ်မူအထူအယိာ်အဂီၢ်န့ၣ်လီၤ.