မ့ၢ်နမၤဘၣ်တၢ်လၢ တၢ်သူၣ်ဒိၣ်သးဖျိးအပူၤဝံၤမး ပိာ်ထွဲထီၣ်အသးလၢ တၢ်ပီၢ်ယၢ်လီၤက့ၤသးန့ၣ် မ့ၢ်အိၣ်တမံၤမံၤဧါ. ဖဲယဖိခွါ အသးစဲထီဘိလၢ ကသံၣ်မူၤဘှိးအဆၢကတီၢ်, ယစံးကတိၤဘၣ်အီၤ ဆူၣ်ဆူၣ်ကိၤကိၤဘၣ်ထွဲဒီး အတၢ်ဃုထၢအိၣ်မူအိၣ်ဂဲၤတၢ်အဂီၢ်န့ၣ်လီၤ. လၢတၢ်သူၣ်ဒိၣ်သးဖျိးအပူၤ ယစံးကတိၤဘၣ်အီၤန့ၣ် ကဲထီၣ် တၢ်သးဟးဂီၤအါထီၣ်လၢအဂီၢ်န့ၣ်လီၤ. ဘၣ်ဆၣ် အကတၢၢ်န့ၣ် ယဖိခွါအံၤ ထံၣ်လိာ်သးဒီး ပှၤစူၢ်က့ၤနာ်က့ၤတၢ်ဖိတဖၣ်လၢ အဒုးသ့ၣ်ညါတၢ်မူဒီး တၢ်မုၢ်လၢ်လၢအဂီၢ်န့ၣ်ဒီး တုၤအဆၢကတီၢ်ဘၣ်န့ၣ်ဒီး ဖိခွါအံၤ ထူၣ်ဖျဲးဝဲဒၣ်လၢ တၢ်သးစဲထီ ကသံၣ်မူၤဘှိးအပူၤန့ၣ်လီၤ.
ၦၤဒ်အမ့ၢ်စီၤမိၤရှ့လၢ ပဂ့ၤကွၢ်ဒိတဂၤ မၤဘၣ်တၢ်တမံၤဒီး လၢခံန့ၣ်ဘၣ် ပီၢ်ယၢ်လီၤက့ၤအသးန့ၣ်လီၤ. ဖဲပှၤအံၣ်စရ့လးဖိတဖၣ် ဘၣ်လဲၤတၢ်လၢ ပှၢ်မုၢ်ကနၢအဆၢကတီၢ် ထံဧိၤနိဧိၤ တလၢတလီၣ်အဃိ ပှၤဂီၢ်မုၢ်တဖၣ် ကဒူးကဒ့ၣ်တၢ်နးနးကလဲာ်န့ၣ်လီၤ. လၢတၢ်န့ၣ်အဃိ, ၄ မိၤ ၂၀:၈ အပူၤ ကစၢ်ယွၤနဲၣ်လီၤဝဲ စီၤမိၤရှ့ဒီးစီၤအၤဟရိၣ် လီၤတံၢ်လီၤဆဲး ဒီးစံးဝဲ, “မၤလိာ်လၢၢ်လၢအမဲာ်ညါ, ဒီးကဟ့ၣ်ထီၣ်အထံ, ဒီးနကဒုးဟဲထီၣ်ထံလၢအဂီၢ်လၢ လၢၢ်ပူၤလီၤ”န့ၣ်လီၤ. လၢတၢ်မၤတၢ်လီၤလးတမံၤအံၤအဂီၢ် ကဘၣ်မၤလၤကပီၤ ကစၢ်ယွၤအလီၢ်န့ၣ် စီၤမိၤရှ့မၤဆၢက့ၤတၢ်လၢ တၢ်သးဒိၣ်သးဖျိးအပူၤ ဒီးဟံးန့ၢ်တၢ်လၤကပီၤလၢအဂီၢ်ဒီး စီၤအၤဟရိၣ်အဂီၢ်ဒီး စံးဘၣ်ပှၤဂီၢ်မုၢ်လၢ, “ပှၤပူထီၣ်ဖိသ့ၣ်ဧၢ, ကနၣ်တက့ၢ်, ယဘၣ်ဒုးဟဲထီၣ်ထံလၢ လၢၢ်အပူၤအံၤ, လၢသုဂီၢ်စ့ၢ်ကီးဧါ” န့ၣ်ဖျါဖဲ အဆၢဖိ ၁၀ အပူၤန့ၣ်လီၤ. တၢ်မၤအသးအံၤ ပကထံၣ်ဘၣ် စီၤမိၤရှ့ တဒိကနၣ် ကစၢ်ယွၤလိၤလိၤန့ၣ် ဖျါဖဲအဆၢဖိ ၁၁ အတၢ်ပာ်ဖျါ “ယၤထီၣ်အစု, ဒီးတီၢ်လၢၢ်န့ၣ် လၢအနီၣ်ထိးဘိတဘိ ခံဘျီ”န့ၣ်လီၤ.
ထံမ့ၢ် ဟဲထီၣ်ဘၣ်ဆၣ်, တၢ်မၤအသး ပိာ်ထွဲထီၣ်အခံလၢ အလီၤသးအုး အိၣ်ထီၣ်ဝဲဒၣ်န့ၣ်လီၤ. စီၤမိၤရှ့မ့ၢ်ဂ့ၤ စီၤအၤဟရိၣ်မ့ၢ်ဂ့ၤ တလဲၤနုာ်လီၤဘၣ်ဝဲဒၣ်လၢ ကီၢ်ပူၤလၢ ယွၤအၢၣ်လီၤဝဲလၢ ပှၤဂီၢ်မုၢ်တဖၣ်အဂီၢ်န့ၣ်လီၤ. ဘၣ်ဆၣ် ယွၤသးကညီဒံးအီၤအဃိ, ပျဲ စီၤမိၤရှ့ ထံၣ်စိဘၣ်ဝဲ ကီၢ်တၢ်စံးပာ်လၢအယံၤန့ၣ် ဘၣ်တၢ်ပာ်ဖျါဖဲ ၄ မိၤ၂၇:၁၂-၁၃ အပူၤန့ၣ်လီၤ.
ဒ်စီၤမိၤရှ့အသိး, ပှၢ်မုၢ်ကနၢလၢအမ့ၢ် ပတဒိကနၣ် ယွၤအပူၤဒၣ်လဲာ် ယွၤဃုထံၣ်န့ၢ်ပှၤန့ၣ်လီၤ. လၢအတၢ်သူၣ်ကညီၤသးကညီၤအပူၤန့ၣ် ယွၤဟ့ၣ်ကလီၤပှၤတၢ်ပျၢ် ပတၢ်ဒဲးဘးဒီးတၢ်မုၢ်လၢ် ခီဖျိကစၢ်ယ့ၣ်ရှူးအတၢ်ဒိးသံအသးဒီး အတၢ်ဂဲၤဆၢထၢၣ်သမူထီၣ်က့ၤ တၢ်အပူၤန့ၣ်လီၤ. ဖဲပအိၣ်တပူၤဂ့ၤတပူၤဂ့ၤ, (မ့) ဖဲပမၤဘၣ် တၢ်တမံၤဂ့ၤတမ့ၤဂ့ၤ, ပမ့ၢ်ဃၣ်လိၤက့ၤပသးဆူ ယွၤအအိၣ်န့ၣ်ဒီး အဝဲကနဲၣ်ဆှၢပှၤဆူတၢ်မူန့ၣ်လီၤ.
