တၢ်လိာ်ကွဲဖိအံၤ မ့ၢ်တၢ်လၢ အမၤသးခု ပှၤသးစၢ်တဖၣ် ဒီးမ့ၢ်စ့ၢ်ကီးတၢ်လၢ ပမၤလိန့ၢ်တၢ် ဘၣ်ထွဲဒီး ပကဆီတလဲပှၤလၢပခိၣ်ပဃၢၤအလီၢ်န့ၣ် ပကဃုမၤလိအဲၣ်ပှၤလၢ အအိၣ်ဒီးပှၤအဂီၢ်န့ၣ်လီၤ. တၢ်လိာ်ကွဲဖိမ့ၢ်ဝဲ ပှၤအါဂၤဆ့ၣ်နီၤကဝီၤဝဲလၢ ခးဆ့ၣ်နီၤတဖၣ် ဒီးပှၤတဂၤန့ၣ် ဘၣ်ဂဲၤဆၢထၢၣ်လၢတၢ်အကဝီၤအခၢၣ်သးန့ၣ်လီၤ. ၦၤလၢအဆၢထၢၣ်တဂၤန့ၣ် ဘၣ်သံကွၢ်ၦၤဆ့ၣ်နီၤတဂၤလၢ, “နအဲၣ်ၦၤလၢနဃၢၤဧါ”န့ၣ်လီၤ. ၦၤဆ့ၣ်နီၤတဂၤန့ၣ် ကဘၣ်စံးဆၢဒၣ်ထဲခံထံၣ် “မ့ၢ် ယအဲၣ် မ့တမ့ၢ်ဘၣ်ဒီး ယတအဲၣ်” ဘၣ်န့ၣ်လီၤ. အဝဲကဘၣ်ဆၢတဲာ် မ့ၢ်ကအဲၣ်ဒိး ဆီတလဲ ၦၤလၢအဆ့ၣ်နီၤကပၤဒီး ၦၤအဂၤတဂၤဂၤဧါန့ၣ်လီၤ.
လၢပတၢ်အိၣ်မူနီၢ်နီၢ်ပူၤစ့ၢ်ကီး ပဆၢမုၢ်လၢ်ဒီးဃုထၢ ပှၤလၢပခိၣ်ပဃၢၤ လၢတၢ်ရ့လိာ်ဘၣ်ထွဲလိာ်သးအဂီၢ်န့ၣ်လီၤ. လီၤဆီဒၣ်တၢ် ဖဲပအိၣ်ဒီးၦၤမၤသကိးတၢ်လၢ ပတၢ်ရ့လိာ်ဘၣ်ထွဲလိာ်သးတဂ့ၤ မ့တမ့ၢ် ၦၤအိၣ်ဆိးလၢပဟံၣ်အဃၢၤတဂၤ, လၢအအဲၣ်ကူးတပံၢ်လၢ တဘၣ်ဆၢဘၣ်ကတီၢ်န့ၣ်လီၤ. တမံၤဂ့ၤတမံၤဂ့ၤန့ၣ် ပကဘၣ်မၤလိအိၣ်မူအိၣ်ဂဲၤဒီး ပှၤလၢပခိၣ်ပဃၢၤ ပှၤလၢ ပရ့လိာ်ပသးတမုာ်တဖၣ်န့ၣ်လီၤ.
ဖဲၦၤအံၣ်စရ့လးဖိတဖၣ် နုာ်လီၤအိၣ်ဆိးလၢ ကီၢ်တၢ်စံးပာ်အပူၤအဆၢကတီၢ် ဒ်အမ့ၢ် ပှၤဂီၢ်မုၢ်လၢ အဘၣ်ထွဲဒီးယွၤအဃိ ကစၢ်ယွၤ ဟ့ၣ်လီၤ တၢ်သိၣ်တၢ်သီလၢ အကါဒိၣ်တဖၣ် လၢအကဘၣ်အိၣ်မူအိၣ်ဂဲၤဝဲ ဒ်လဲၣ်အဂီၢ်န့ၣ်လီၤ. ၃ မိၤ ၁၉:၁၈ အပူၤ ပှၤဂီၢ်မုၢ်တဖၣ် ဘၣ်တၢ်သိၣ်လီၤလၢ “အဲၣ်ၦၤလၢနဃၢၤ ဒ်နအဲၣ်လီၤ နသးဒၣ်နဲအသိး”တက့ၢ်န့ၣ်လီၤ. အဆၢဖိ ၉-၁၈ အပူၤ ပာ်ဖျါစ့ၢ်ကီးဝဲ တဘၣ်စံးကတိၤခဲၣ်သူခဲၣ်ဂီၤတၢ်ဘၣ်. တဘၣ်မၤတရီတပါ ဟံးန့ၢ်တၢ်ခွဲးတၢ်ယာ်လၢ ပှၤလၢနဃၢၤတဖၣ်အလိၤဘၣ်. ဒီးအလီၢ်မ့ၢ်အိၣ် နကဘၣ် သိၣ်ဃီၢ်ပှၤလၢနဃၢၤ ဒ်သိးနသုတဘၣ် တၢ်ဒဲးဘးလၢအဃိတဂ့ၤန့ၣ်လီၤ.
ပကအဲၣ်ပှၤကိးဂၤဒဲး မ့ၢ် လၢပဂီၢ်ကီခဲဘၣ်ဆၣ်, ခီဖျိ ကစၢ်ယ့ၣ်ရှူးမၤတၢ်လၢ ပပူၤ မၤတၢ်လၢပှၤအဃိ, တၢ်ရ့လိာ်ဘၣ်ထွဲလိာ်သးဒီး ပှၤဂၤန့ၣ် ကဲထီၣ်သ့ဝဲဒၣ်န့ၣ်လီၤ. ဒ်ပမ့ၢ်ယွၤအပှၤဂီၢ်မုၢ်အသိး ပဃုအိၣ်မူအိၣ်ဂဲၤ ဒ်ပတၢ်မ့ၢ်တၢ်အသိး တၢ်လၢပကအဲၣ်ပှၤလၢ ပဃၢၤအဂီၢ်န့ၣ် ကစၢ်ယွၤကကတဲာ်ကတီၤ ဟ့ၣ်လီၤလာ်ပှၤ တၢ်ကူၣ်သ့ ဒီးသးလၢ အသ့မၤတၢ်တဖၣ်န့ၣ်လီၤ.
