ကၠီ(န) အဲ(မ) ပါက့ၣ် (John M. Perkins)န့ၣ် ဖဲကဘၣ်သံဝဲဘူးထီၣ်လံ အဆၢကတီၢ် အိၣ်ဝဲဒီးတၢ်ကတိၤလီၤ တၢ်လၢခံကတၢၢ်ဆူ ပှၤလၢကပာ်လီၤတဲာ်တ့ၢ်တဖၣ်အဂီၢ်န့ၣ်လီၤ. ပါက့ၣ်န့ၣ် ပှၤသ့ၣ်ညါအီၤလၢ အတၢ်ဟ့ၣ်ဂံၢ်ဟ့ၣ်ဘါ တၢ်မၤဘၣ်လိာ်ဘၣ်စးက့ၤ ကလုၢ်ဒူၣ်တဖၣ်အဘၢၣ်စၢၤ တၢ်ထီဒါလိာ်သးတဖၣ်န့ၣ်လီၤ. အဝဲစံးဝဲ “တၢ်ပီၢ်ယၢ်လီၤက့ၤ သးန့ၣ် မ့ၢ်ကျိၤကျဲ ထဲတမံၤဧိၤ လၢတၢ်ကက့ၤကဒါက့ၤ ဆူယွၤအအိၣ်န့ၣ်လီၤ. သုမ့ၢ်တပီၢ်ယၢ်လီၤက့ၤ သုသးဘၣ်ဒီး သုကတိၤဃီၤဆူ တၢ်ဟးဂုာ်ဟးဂီၤန့ၣ်လီၤ.”
အတၢ်ကတိၤတဖၣ်အံၤ ဒုးနဲၣ်ဖျါက့ၤ ကစၢ်ယ့ၣ်ရှူးဒီး ပှၤအါဂၤအတၢ်ကတိၤတဖၣ်လၢလံာ်စီဆှံအပူၤန့ၣ်လီၤ. လူၤကၣ် ၁၃:၃ အပူၤ ကစၢ်ယ့ၣ်ရှူးခရံာ်စံးဝဲ “သုမ့ၢ်တပီၢ်ယၢ်လီၤက့ၤ သုသးဘၣ်ဒီး သုဝဲ ဒ်န့ၣ်အသိးကတုၤလၢ တၢ်ဟးဂီၤခဲလၢာ်လီၤ”န့ၣ်လီၤ. လံာ်မၤတၢ် ၃:၁၉ အပူၤ စ့ၢ်ကီး တၢ်မၢဖိစီၤပ့းတရူး စံးဝဲ “ဒ်သိး သုတၢ်ဒဲးဘးကဘၣ် တၢ်တြူာ်ကွံာ်…အဂီၢ် သ့ၣ်နီၣ်ပီၢ်ယၢ်လီၤက့ၤသုသး ဒီးဃၣ်လိၤက့ၤ သုသးတက့ၢ်”န့ၣ်လီၤ.
လံာ်စီဆှံအပူၤ ပဖးဘၣ် ပှၤစံးကတိၤဆိပာ်တ့ၢ်လံလၢ အအဲၣ်ဒိးအပှၤဂီၢ်မုၢ်တဖၣ် ဃၣ်ကဒါက့ၤ အတၢ်အိၣ်မူဆူ ကစၢ်ယွၤန့ၣ် ပှၤအိၣ်တဂၤန့ၣ်လီၤ. ၁ရှမူၤ ၁၂:၁ အပူၤ စီၤရှမူၤအ့လး ဒ်အမ့ၢ်ဝံ, ပှၤလုၢ်တၢ်အဒိၣ်ဒီး စံၣ်ညီၣ်ကွၢ်တဂၤအသိး စံးကတိၤလီၤတၢ်ဆူ “အံၣ်စရ့လးခဲလၢာ်” ဒီးစံးဝဲလၢ အဆၢဖိ ၂၀ အပူၤ “ပျံၤတဂ့ၤ , သုမၤ တၢ်အၢတၢ်သီခဲလၢာ်န့ၣ် ဘၣ်ဆၣ်ဒီး ဃၣ်ကပၤ လၢတၢ်လူၤယွၤအသးန့ၣ်တဂ့ၤ. မၤယွၤအတၢ်လၢ သုသးဒီဖျၢၣ်ညါတက့ၢ်”န့ၣ်လီၤ. တၢ်အံၤ မ့ၢ် စီၤရှမူၤအ့လး အတၢ်ကစီၣ်လၢ တၢ်ပီၢ်ယၢ်လီၤက့ၤသးအဂီၢ် ဒ်သိးပှၤဂီၢ်မုၢ်တဖၣ် ကဃၣ်က့ၤအသးလၢ တၢ်အၢတၢ်သီဒီး ကမၤယွၤအတၢ် လၢသူၣ်ဒီဖျၢၣ်သးဒီဖျၢၣ်အပူၤန့ၣ်လီၤ.
ပမ့ၢ်ပှၤတၢ်ဒဲးဘးဖိခဲလၢာ်ဒီး ပတတုၤထီၣ် ထီၣ်ဘးလၢ ယွၤအနီၣ်ထိၣ်အပတီၢ်ဘၣ်န့ၣ်လီၤ. လၢတၢ်န့ၣ်အဃိ အလီၢ်အိၣ်လၢ ပကဘၣ်ပီၢ်ယၢ်လီၤက့ၤပသး ဒီးအခီပညီမ့ၢ်ဝဲ ပကဘၣ်ဃၣ်က့ၤ ပသးလၢတၢ်အၢတၢ်သီဒီး ဃၣ်လိၤက့ၤ ပတၢ်အိၣ်မူဆူ ကစၢ်ယ့ၣ်ရှူး လၢအမ့ၢ်ပှၤလၢ အပျၢ်ပတၢ်ဒဲးဘးဒီး ဟ့ၣ်ဂံၢ်ဟ့ၣ်ဘါပှၤ ဒ်သိးပကပိာ်အခံအဂီၢ်န့ၣ်လီၤ. မ်ပကဒိကနၣ်သကိး ကၠီ(န) ပါက့ၣ် ဒီးစီၤရှမူၤအ့လး, ပှၤခံဂၤအတၢ်ကတိၤ ဒ်အမ့ၢ်ပှၤခံဂၤ လၢသ့ၣ်ညါပာ်ပနီၣ် တၢ်ပီၢ်ယၢ်လီၤက့ၤသး အစိကမီၤလၢကစၢ်ယွၤကစူးကါ ဒ်သိးကဆီတလဲက့ၤပှၤဒီး ကစူးကါပှၤလၢ အလၤကပီၤအဂီၢ်န့ၣ်တက့ၢ်.
