လၢတၢ်စံၣ်စိၤတဲစိၤအပူၤ တၢ်ကတိၤလီၤတၢ်ဆူကမျၢၢ်အအိၣ် လၢအစိကမီၤဒိၣ်ကတၢၢ် မ့ၢ်ဝဲခိၣ်နၢ်တဖၣ်လၢ အသူဝဲဒၣ်အကလုၢ်လၢ ကဟဲစိာ် တၢ်လဲလိာ် လၢအဂ့ၤတကပၤတဖၣ်န့ၣ်လီၤ. ဆိကမိၣ်ကွၢ် ဖရဲးဒရ့း ဒီးကလဲးစ် (Fredreick Douglass), မ့ၢ်ၦၤလၢအကတိၤတၢ် ဘၣ်ဃး တၢ်မၤကတၢၢ် တၢ်မၢကဲကုၢ် ဒီးတၢ်အိၣ်မူလၢတၢ်သဘျ့အဂ့ၢ် လၢအဒုးထိၣ်ဂဲၤထီၣ် တၢ်ဟူးတၢ်ဂဲၤ လၢကမၤစၢၤမၤကတၢၢ်ကွံာ် တၢ်မၢကဲကုၢ်လၢကီၢ်အမဲရကၤန့ၣ်လီၤ.

အဝဲမ့ၢ်ဃုထၢလၢ ကအိၣ်ဘှ့ၣ်ဝဲန့ၣ် တၢ်ကမၤသးဒ်လဲၣ်. ပဝဲကိးဂၤ ပအိၣ်ဒီး တၢ်သ့တၢ်ဘၣ်လၢ ပကသူပကလုၢ်လၢ ကဒုးထိၣ်ဟူးထိၣ်ဂဲၤထီၣ်သးသဟီၣ် ဒီးမၤစၢၤၦၤဂၤ ဘၣ်ဆၣ် တၢ်ပျံၤတၢ်ဖုး လၢပကဘၣ် ကတိၤတၢ်အံၤ မ့ၢ်တၢ်လၢ အလီၤဘၣ်ယိၣ် တုၤဒၣ်လဲာ် တၢ်မၤအသးဒ်တၢ်စှီၤတံၢ်ဃးပှၤန့ၣ်လီၤ. ဖဲတၢ်ပျံၤတၢ်ဖုးအံၤ ဒိၣ်ဘၢၦၤအဆၢကတီၢ်န့ၣ်, ပကွၢ်ထီၣ်တၢ်ဆူယွၤအိၣ်သ့, လၢအမ့ၢ် ပဂံၢ်ထံးလၢတၢ်ကူၣ်သ့ဒီး ကဟ့ၣ်ၦၤတၢ်ဂံၢ်တၢ်ဘါန့ၣ်လီၤ.

ဖဲကစၢ်ယွၤကိး ဝံယံးရမံယၤ ဒ်သိးကကဲထီၣ် ဝံတဂၤ လၢထံကီၢ်တဖၣ်အဂီၢ်အခါ, အဝဲအသးဒ့ဒီသတူၢ်ကလာ် လၢအတၢ်သ့တၢ်ဘၣ်အဖီခိၣ်န့ၣ်လီၤ. အဝဲကိးပသူထီၣ်, “ယကတိၤတၢ်တသ့ဘၣ်. ယမ့ၢ်ဖိသၣ်တဂၤလီၤ” (ယံး ၁:၆). ဘၣ်ဆၣ် ယွၤတပျဲ ဝံယံးရမံယၤအတၢ်ပျံၤတၢ်ဖုး ဟဲနုာ်လၢအတၢ်ကိး ဒ်သိးကထိၣ်ဟူးထိၣ်ဂဲၤ ၦၤတစိၤ ခီဖျိအကလုၢ်န့ၣ်ဘၣ်လီၤ. လၢအလီၢ်န့ၣ် ကစၢ်ယွၤ နဲၣ်လိ ဝံတဂၤလၢ ကနာ်ယွၤယိယိဖိ ဒီးစံးကတိၤ ဒီးမၤဒ်အမၤလိာ်အီၤအသိးန့ၣ်လီၤ(:၇). လၢကစံးဂၢၢ်စံးကျၢၤ ဝံယံးရမံယၤအဂီၢ်, ယွၤကတဲာ်ကတီၤအီၤ စ့ၢ်ကီးန့ၣ်လီၤ. ယွၤ မၤလီၤတံၢ်အီၤလၢ, “ယပာ်တၢ်ကတိၤလၢ နထးခိၣ်လံ”န့ၣ်လီၤ(:၉).

ဖဲပသံကွၢ်ကစၢ်ယွၤလၢ ကဒုးနဲၣ်ၦၤ လၢသးအိၣ်သူၦၤ ဒ်လဲၣ်အခါ, အဝဲကကတဲာ်ကတီၤၦၤ ဒ်သိးပကမၤကဲထီၣ် ပတၢ်ပညိၣ်တဖၣ်န့ၣ်လီၤ. ဃုာ်ဒီးယွၤအတၢ်မၤစၢၤ, ပသူပကလုၢ်ဒူဒူ ဒ်သိးပကဒုးကဲထီၣ် တၢ်ဘျုးတၢ်ဖှိၣ် ဒီးတၢ်မၤအဂ့ၤတဖၣ် လၢပဃၢၤဝးတရံးအဂီၢ်န့ၣ်လီၤ.