ဒဲးဘံၣ် စတံဖၢၣ် ဘရီးဒၢၣ်(Debbie Stephens Browder) မ့ၢ်ကၠိသရၣ်မုၣ်သိၣ်လိတၢ် လၢအိၣ်ဘှံးက့ၤလၢ ပဒိၣ်တၢ်ဖံးတၢ်မၤတဂၤလီၤ. အခဲအံၤ အဝဲဂုာ်ကျဲးစၢးသဆၣ်ထီၣ် ၦၤအါဂၤလၢ ကသူၣ်သ့ၣ်ထူၣ်တၢ်မုၢ်တၢ်ဘိတဖၣ် တသ့ဖဲအသ့န့ၣ်လီၤ. တၢ်အဂ့ၢ်အခၢးတခီမ့ၢ်ဝဲ တၢ်ကိၢ်ဆူၣ်အဃိလီၤ. လၢကီၢ်အမဲရကၤအပူၤ တၢ်ကိၢ်ဆူၣ်ဒိၣ်မးအံၤ မ့ၢ်တၢ်ဂ့ၢ်အကါဒိၣ်ကတၢၢ်တဘီ လၢအဒုးအိၣ်ထီၣ်တၢ်သံတၢ်ၦၢ် လၢအဘၣ်ထွဲဒီး မူခိၣ်ကလံၤသီၣ်ဂီၤအဃိန့ၣ်လီၤ. ဒ်သိးကဘှါစါက့ၤ တၢ်ဂ့ၢ်အံၤအဂီၢ် အဝဲစံးဝဲ “ယစးထီၣ်ဒီး တၢ်သူၣ်လီၤသ့ၣ်မုၢ်ဝၣ်ဖိတဖၣ်န့ၣ်လီၤ.” သ့ၣ်ဖးထီအကဒုတဖၣ်အံၤ မ့ၢ်ကျဲအကါဒိၣ်တဘိလၢ အကဒီသဒၢ ၦၤတဝၢတဖၣ်န့ၣ်လီၤ. “တၢ်မၤအဝဲအံၤ တမ့ၢ်ထဲတၢ်မၤဃံမၤလၤ ၦၤတဝၢဒီး တၢ်ဘၣ်တ့အဘၢၣ်ကဝီၤဘၣ်, မ့ၢ်တၢ်ဃုထၢတၢ်သံ မ့တမ့ၢ် တၢ်မူန့ၣ်လီၤ”

တၢ်အကဒုန့ၣ် တမ့ၢ်ထဲတၢ်မၤသီထီၣ်က့ၤ တၢ်အဂီၢ်ဘၣ်, မ့မ့ၢ်တခီ မ့ၢ်တၢ်လၢအမၤမူထီၣ်က့ၤတၢ် သ့ဝဲန့ၣ်လီၤ. ၦၤကွဲးထါ စံးထီၣ်ပတြၢၤ ၁၂၁, ကသ့ၣ်ညါတ့ၢ်ဝဲဂ့ၤဂ့ၤလီၤ. လၢလီၢ်ခၢၢၣ်သးမုၢ်ထီၣ်ကဝီၤန့ၣ် တၢ်ကိၢ်ကျီတၢ်ဆါအံၤဘၣ်ၦၤသ့ထီဘိလီၤ. တၢ်အမ့ၢ်အတီတခါအံၤ မၤယိာ်ထီၣ်အါထီၣ် ၦၤကွဲးထါအတၢ်ဒုးနဲၣ်ယွၤႇ ဒ်အမ့ၢ်ပတၢ်ပူၤဖျဲးအလီၢ်နီၢ်နီၢ်, ဒီးစံးဝဲ အဝဲမ့ၢ်ယွၤလၢအအံးထီၣ်ကွၢ်လီၤၦၤ ဒီး “မုၢ်တမၤဆါဘၣ်ၦၤလၢမုၢ်ဆါခီဘၣ်, ဒီးလါန့ၣ်လၢမုၢ်နၤဘၣ်”(:၆).

လံာ်စီဆှံတဆၢအံၤ တစံးဝဲလၢ ၦၤစူၢ်က့ၤနာ်က့ၤခရံာ်တဖၣ်န့ၣ် ကပူၤဖျဲးဒီး တၢ်ဘၣ်ဒိဘၣ်ထံး မ့တမ့ၢ် တၢ်လီၤမၢ်လၢ တၢ်အိၣ်မူအပူၤန့ၣ်ဘၣ်. (တစံးစ့ၢ်ကီးလၢ တၢ်ကိၢ်ဆူၣ်န့ၣ် တမၤဘၣ်ဒိဘၣ်ထံးၦၤဘၣ်). နီၢ်နီၢ်တခီ ကစၢ်ယ့ၣ်ၡူးစံးဝဲႇ “လၢဟီၣ်ခိၣ်အံၤ သုကဘၣ်တၢ်အဖှီၣ်လီၤ” (ယိၤ ၁၆:၃၃). ဘၣ်ဆၣ် တၢ်အဒိလၢ ယွၤမ့ၢ်ပတၢ်ကဒု မၤမံသးကျၢၤၦၤ ဖျိဖျိဖျါဖျါ, လၢတၢ်မၤအသးဒ်လဲၣ်ဒ်လဲၣ် ဘၣ်ဆၣ် ပသးသမူသ့ၣ်တဖၣ် အိၣ်လၢယွၤအတၢ်အံးတၢ်ကွၢ်အဖီလာ်န့ၣ်လီၤ. (စံး ၁၂၁:၇-၈). ပထံၣ်န့ၢ် တၢ်အိၣ်ဘှံး ခီဖျိပနာ်အီၤ, ဒီးပသ့ၣ်ညါလၢ တၢ်မနုၤမး မၤလီၤဖးၦၤဒီး ယွၤအတၢ်အဲၣ်တၢ်ကွံ လၢအအိၣ်လၢပကစၢ်ယ့ၣ်ၡူးခရံာ်အပူၤတသ့ဘၣ်လီၤ (ယိၤ ၁ဝ:၂၈, ရိမ့ၤ ၈:၃၉).