ကီၢ်အမဲရကၤကီၢ်ခိၣ် အၤဘြၤဟၣ် လ့ကၢၣ် (Abraham Lincoln) အဖိခွါ ရီဘၢး ထိး(ဒ) လ့ကၢၣ် (Robert Todd Lincoln) န့ၣ် အိၣ်မူအိၣ်ဝဲ ဖဲတၢ်ဂ့ၢ်အကါဒိၣ် သၢထံၣ် မၤအသးအဆၢကတီၢ်, ဒ်အမ့ၢ် အပၢ်ဘၣ် တၢ်မၤသံ, ဃုာ်ဒီး ကီၢ်ခိၣ် ကၠ့ ကးဖံ (James Garfield) ဒီး ဝ့လယၢၣ် မဲးက့လ့ (William McKinley)တဖၣ် ဘၣ်တၢ်ကူၣ်သံအဝဲသ့ၣ်အကတီၢ်အပူၤန့ၣ်လီၤ.
မ့မ့ၢ် တၢ်မၢဖိ စီၤယိၤဟၣ် အိၣ်မူအိၣ်ဂဲၤဘၣ်ဝဲ ဖဲလၢ တၢ်စံၣ်စိတဲစိၤအပူၤ တၢ်ဂ့ၢ်အကါဒိၣ် မၤအသး လွံၢ်ထံၣ်အပူၤ လၢအမ့ၢ် ဟါတၢ်အီၣ်လၢခံကတၢၢ် ဒီးကစၢ်ယ့ၣ်ရှူး, ကစၢ်ယ့ၣ်ရှူး အတၢ်နးတၢ်ဖှီၣ်လၢ က့ၤသစ့ၤမနၤတၤသၣ်လီၤ, အတၢ်ဒိးသံအသးလၢ ထူၣ်စုညါအလိၤ ဒီးကစၢ်ယ့ၣ်ရှူးခရံာ် အတၢ်ဂဲၤဆၢထၢၣ်သမူထီၣ်က့ၤ အတၢ်ဂ့ၢ်တဖၣ်န့ၣ် ကွၢ်ဆိကမိၣ်အီၤတက့ၢ်. တၢ်ဂ့ၢ်အကါဒိၣ်တဖၣ်အံၤ မၤအသးအဆၢကတီၢ် ဘၣ်မနုၤအဃိ အနီၢ်ကစၢ်ဒၣ်ဝဲ ကဲထီၣ် ပှၤအုၣ်အသးတဂၤလဲၣ်န့ၣ် စီၤယိၤဟၣ်သ့ၣ်ညါဝဲဂ့ၤဂ့ၤန့ၣ်လီၤ. ယိၤ ၂၁:၂၄ အပူၤ ကွဲးဝဲ, “အဝဲတဂၤအံၤ မ့ၢ်အပျဲၢ်အဘီၣ်, လၢအအုၣ်အသးလၢ တၢ်န့ၣ်တဖၣ်, ဒီးကွဲးတၢ်တဖၣ်အံၤလီၤ. ဒီးပသ့ၣ်ညါလၢ အတၢ်အုၣ်အသးန့ၣ် မ့ၢ်အမ့ၢ်အတီလီၤ”န့ၣ်လီၤ.
ဖဲလံာ် ၁ ယိၤ ၁:၁ အပူၤ စီၤယိၤဟၣ် မၤဂၢၢ်မၤကျၢၤကဒီး တၢ်ဂ့ၢ်အံၤ ဒီးကွဲးပာ်ဖျါဝဲ “တၢ်လၢအအိၣ်ဝဲလၢ အခီၣ်ထံးလံၤလံၤ, လၢပနၢ်ဟူလံ, လၢပထံၣ်လၢပမဲာ်လံ, လၢပကွၢ်ထံအီၤ, ဒီးလၢပဟံးအီၤလၢပစု, ဘၣ်ဃးဒီးတၢ်မူအကလုၢ်”န့ၣ်လီၤ. စီၤယိၤဟၣ် အသးကလၢၢ်ဘၣ်တၢ် ဒ်အအိၣ်ဒီးမူဒါဖးဒိၣ်လၢ ကစံးဘၣ်တဲဘၣ် အတၢ်အုၣ်အသး အဂ့ၢ်အကျိၤ ဘၣ်ဃးဒီးကစၢ်ယ့ၣ်ရှူးတဖၣ်န့ၣ် ဆူပှၤဂၤအအိၣ်န့ၣ်လီၤ. ဘၣ်မနုၤအဃိလဲၣ်. အဆၢဖိ ၃ အပူၤပာ်ဖျါဝဲ “တၢ်လၢပထံၣ်ဘၣ်, ဒီးပနၢ်ဟူဘၣ်န့ၣ်, ပစံးဘၣ်တဲဘၣ်သု ဒ်သိးသုဝဲသ့ၣ်စ့ၢ်ကီး သုကရ့လိာ်သုသးဒီးပှၤလီၤ”န့ၣ်လီၤ.
ပတၢ်အိၣ်မူအပူၤ တၢ်မၤအသးတဖၣ်န့ၣ် ကမ့ၢ်တၢ်လီၤကမၢကမၣ် မ့တမ့ၢ်ဘၣ်ဒီး ကမ့ၢ်တၢ်လၢအညီနုာ်မၤအသးဘၣ်ဆၣ် တမံၤဂ့ၤတမံၤဂ့ၤ, တၢ်မၤအသးတဖၣ်အံၤ ကစၢ်ယွၤတိာ်ကျဲၤဝဲ လီၤတံၢ်လီၤဆဲး ဒ်သိး ပကမ့ၢ်ပှၤအုၣ်အသးလၢ အဂ့ၢ်အဂီၢ်န့ၣ်လီၤ. ဖဲပအိၣ်ကဒုလၢ ကစၢ်ယ့ၣ်ရှူးခရံာ် အတၢ်ဘျုးတၢ်ဖှိၣ်ဒီး အတၢ်ကူၣ်သ့အပူၤ အဆၢကတီၢ်, မ်ပကမ့ၢ်ပှၤလၢအစံးကတိၤတၢ်လၢအဂီၢ်, လၢပသးသမူ မ့ၢ်တၢ်လီၤကမၢကမၣ် အဆၢကတီၢ်ဒၣ်လဲၣ်အပူၤန့ၣ်တက့ၢ်.
