ဖဲ ၁၈၅၉ နံၣ်န့ၣ်, ကၠီးရှဝါ အ့ၣ်ဘရၣ်ဟၣ် နီၣ်တဲၣ် (Abraham Norton) ဘိးဘၣ်သ့ၣ်ညါဝဲဒီး တဲဖျါလီၤအသး လၢအမ့ၢ် ကီၢ်အမဲရကၤဘီမုၢ်စီၤပၤ တဂၤအသိးန့ၣ်လီၤ. အဝဲဃုန့ၢ် ကျိာ်စ့, ဒီး အတၢ်အိၣ်မူလဲၤထီၣ်လဲၤထီဝဲအသိး, အတၢ်ထူးတၢ်တီၤတဖၣ် ဆှူကွံာ်ဝဲလီၤမၢ်ကွံာ်ဝဲလၢ ဝ့ၢ်စၢၣ်ဖရဲၣ်စ့းစကိၣ်(San Francisco) တၢ်ဆှၢထီၣ်ဆှၢလီၤ တၢ်လၢ ကဘီပနံာ်ကါ တၢ်မၤအပူၤန့ၣ်လီၤ. ဘၣ်ဆၣ် အဝဲအဲၣ်ဒိးဝဲ အတၢ်မ့ၢ်တၢ်အသီ ဒ်အမ့ၢ်အမဲရကၤဘီမုၢ်စီၤပၤ အဆိကတၢၢ်တဂၤအသိးန့ၣ်လီၤ. ဖဲ စၢၣ်ဖရဲၣ်စ့းစကိၣ် ဟါခီတၢ်ကစီၣ်စဲကျံးပာ်ဖျါဝဲ “ဘီမုၢ်စီၤပၤ” နီၣ်တဲၣ် အတၢ်ဘိးဘၣ်သ့ၣ်ညါတၢ်အဂ့ၢ်န့ၣ်, ပှၤဖးတၢ်ကစီၣ်ဖိအါဂၤနံၤဘၣ်အီၤန့ၣ်လီၤ. နီၣ်တဲၣ် ပာ်ဖျါဘိးဘၣ်သ့ၣ်ညါဝဲ အတၢ်ပညိၣ်လၢကဘှီဘၣ်က့ၤ ပှၤတဝၢပူၤ တၢ်လၢအဟးဂီၤတဖၣ် ဒီးစဲကျံးထုးထီၣ်အကျိာ်စ့ဒၣ်ဝဲန့ၣ်လီၤ. ကွဲးလံာ်ဆူ နီၢ်ပၤမုၣ် ဘ့းထိရံၤယၢၣ် (Victoria) အအိၣ် ဒီးဃ့ဖျီအသးဒီးအီၤ ဒ်သိး ကပာ်ဖှိၣ်အဝဲသ့ၣ်အဘီအမုၢ်တဖၣ်အဂီၢ်န့ၣ်လီၤ. အဝဲကူသိးဝဲ စီၤပၤအသုးမုၢ်အဆ့ကူဆ့ကၤတဖၣ် လၢထံလီၢ်ကီၢ်ပူၤ ပှၤတ့ဆးတၢ်ဖိတဖၣ် မၤဝဲဒၣ်န့ၣ်လီၤ. ပှၤခိးကွၢ်ထံတၢ်တဂၤစံးဝဲ ပမ့ၢ်ကွၢ် နီၣ်တဲၣ် “ဒီတဂၤညါန့ၣ် လီၤဂာ်ဒီးစီၤပၤတဂၤအသိး”န့ၣ်လီၤ. ဘၣ်ဆၣ်, အဝဲတမ့ၢ် စီၤပၤတဂၤဘၣ်. ပဒုးအိၣ်ထီၣ် ပတၢ်မ့ၢ်တၢ် တသ့ဘၣ်.
ပဝဲဒၣ် အါဒံအါဂၤန့ၣ် အါနံၣ်အါလါအပူၤ ပလူၤဃုထံၣ် ပမ့ၢ်မတၤလဲၣ်ဒီး ပအဲၣ်ဒိးသ့ၣ်ညါ မ့ၢ်ပအိၣ်ဒီး ပလုၢ်ပပှ့ၤမနုၤလဲၣ်န့ၣ်လီၤ. တၢ်မ့ၢ်တၢ်တီဘၣ်ဒီး ပမ့ၢ်မတၤလဲၣ်န့ၣ် ထဲဒၣ် ကစၢ်ယွၤတဂၤဧိၤ စံးဘၣ်ပှၤတီတီလိၤလိၤ သ့ဝဲဘၣ်ဆၣ် ပဂုၢ်ကျဲးစၢး ပာ်ဖျါထီၣ် ပမံၤပသၣ်ဒီး ပတၢ်မ့ၢ်တၢ်န့ၣ်လီၤ. ပကဘၣ်စံးဘျုးယွၤ, ဖဲလၢပဒိးန့ၢ် တၢ်အုၣ်က့ၤခီၣ်က့ၤ ခီဖျိအဖိခွါကစၢ်ယ့ၣ်ရှူး အဆၢကတီၢ်, ကစၢ်ယွၤကိးပှၤ အဖိခွါ အဖိမုၣ်တဖၣ်န့ၣ်လီၤ. ယိၤ ၁:၁၂ အပူၤ စီၤယိၤဟၣ်ကွဲးဝဲ “ဘၣ်ဆၣ်ဒီး ဖဲဒၣ်ပှၤလၢ အတူၢ်လိာ်အီၤ”န့ၣ် “ဟ့ၣ်ဝဲလၢ အစိကမီၤ, ဒ်သိးအကကဲထီၣ် ယွၤအဖိတဖၣ်လီၤ”န့ၣ်လီၤ. ပတၢ်မ့ၢ်တၢ်အံၤ မ့ၢ်ယွၤအတၢ်ဟ့ၣ် ကဆှီဒီဖိန့ၣ်လီၤ. ပဘၣ်တၢ်အဲၣ်ပှၤလၢကစၢ်ယွၤ ဒ်အဆၢဖိ ၁၃ ပာ်ဖျါဝဲ “အိၣ်ဖျဲၣ်လၢတၢ်သွံၣ်တမ့ၢ်ဘၣ်, လၢတၢ်ညၣ်အသးတမ့ၢ်ဘၣ်, လၢပှၤကညီအသး တမ့ၢ်ဘၣ်, မ့ၢ်ဝဲလၢယွၤလီၤ”န့ၣ်လီၤ.
ခီဖျိလၢကစၢ်ယ့ၣ်ရှူးခရံာ်န့ၣ် ယွၤဟ့ၣ်ပှၤ ပမံၤပသၣ်ဒီး ပတၢ်မ့ၢ်တၢ်န့ၣ်လီၤ. ပမ့ၢ်မတၤမတၤလဲၣ်န့ၣ် ယွၤစံးဘၣ်ဝံၤလံအဃိန့ၣ်ဒီး ပကဆိကတီၢ်ကွံာ် ပတၢ်ဂဲၤပျုၢ်ထိၣ်သတြီၤလိာ်သးဒီး ပှၤဂုၤပှၤဂၤ သ့ဝဲဒၣ်န့ၣ်လီၤ.
