တၢ်ဂီၤမူဖုၣ်ကိာ်ဖိလၢ ပှၤအဲၣ်ကွၢ်ကီအါမးတမံၤလၢ အဒုးနဲၣ်တၤသူမိၢ်ပှၢ်တဒုကျဲးစၢၤ စိာ်ခီဂာ်အဖိလွံၢ်ဒု လၢကျဲမုၢ်တဘိလၢ သိလ့ၣ်လဲၤတၢ်အါဒိၣ်မးအလီၢ်န့ၣ် ဒီးလၢတၢ်နၢ်ပၢၢ် တၢ်မၤအသးအံၤအပူၤန့ၣ် ယနံၤကမှံထီၣ်ဝဲန့ၣ်လီၤ. တၢ်ခိးကွၢ်တၤသူမိၢ် စိာ်ခီအဖိဆံး တဒုဘၣ်တဒုဆူ ကျဲဝာ်ဘးခီ, ဘၣ်ဆၣ် တၤသူဖိတဖၣ် ဟဲက့ၤကဒါက့ၤဆူကျဲအတခီပၤအံၤန့ၣ် မ့ၢ်ဝဲ တၢ်လီၤသးခုတမံၤန့ၣ်လီၤ. လၢမိၢ်တၤသူအဂီၢ် တၢ်စိာ်ခီအဖိတဖၣ်ဆူ ကျဲဝာ်ဘးခီန့ၣ် အဖျါလီၤသးတံာ်တာ်ဘၣ်ဆၣ် အကတၢၢ်န့ၣ် မိၢ်တၤသူအံၤ ပာ်ဖှိၣ်ထီၣ် ဖိလွံၢ်ဒုလိာ်ဒီး နီၣ်ခီဂာ်ကျဲဂ့ၤဂ့ၤဘၣ်ဘၣ်န့ၣ်လီၤ.
တၢ်ပၢဆှၢရဲၣ်ကျဲၤတၢ် အတၢ်မၤလၢလီၤဘှံးလီၤတီၤ တသ့တန့ၢ် တမံၤအံၤ လၢအဖျါလၢ တၢ်ဂီၤမူဖိအပူၤအံၤန့ၣ် လဲၤလီၤပလိာ်သး ဒီးစီၤပီလူး စူးကါက့ၢ်ဂီၤဒိ ဒ်သိးကပာ်ဖျါ အတၢ်သူၣ်အိၣ်သးအိၣ် ပၢဆှၢကဟုကယာ် ပှၤသ့းစၤလနံၤအတၢ်အိၣ်ဖှိၣ်ဖိတဖၣ်န့ၣ်လီၤ. လၢတၢ်ပာ်ဒိၣ်တၢ်စိတၢ်ကမီၤအလီၢ်န့ၣ် ၁ သ့း ၂:၇ ဒီး ၁၁ အပူၤ တၢ်မၢဖိ စီၤပီလူး ထိၣ်သတြီၤဝဲ အတၢ်မၤပှၤသ့းစၤလနံၤဖိတဖၣ်အကျါ, ဒ်အမ့ၢ် မိၢ်ပၢ် ကွၢ်ထွဲကဟုကယာ်ဖိဆံးတဖၣ်အသိးန့ၣ်လီၤ. အဆၢဖိ ပာ်ဖျါဝဲ တၢ်မၤအံၤ မ့ၢ်တၢ်အဲၣ်အဒိၣ်အယိာ်လၢ ပှၤသ့းစၤလနံၤဖိတဖၣ်အဂီၢ် ဒီးအဆၢဖိ ၁၂ အပူၤ ပာ်ဖျါဝဲ တၢ်မၤအံၤ မ့ၢ်တၢ်လၢ အသဆၣ်ထီၣ် စီၤပီလူး ဒ်သိးကမၤတၢ်ခါဆူညါလၢ တၢ်ဟ့ၣ်ဂံၢ်ဟ့ၣ်ဘါ, တၢ်မၤမုာ်ထီၣ်ပှၤအသးဒီး တၢ်ဟ့ၣ်ဆူၣ်ထီၣ်သးအဂံၢ်အဘါလၢ ပှၤသ့းစၤလနံၤတဖၣ် “ဒ်သိးကအိၣ်မူအကြၢးဒီးယွၤ”အဂီၢ် န့ၣ်လီၤ. စီၤပီလူးသဆၣ်ထီၣ် ပှၤသ့းစၤလနံၤဖိတဖၣ် သပှၢ်ပှၢ် ဘၣ်ထွဲဒီး တၢ်အိၣ်မူအကြၢးဒီးယွၤအံၤ အိၣ်ဟဲခီဖျိလၢ စီၤပီလူးအတၢ်အဲၣ် သူၣ်အိၣ်သးအိၣ်ထံၣ်ဘၣ်ဝဲ ပှၤသ့းစၤလနံဖိတဖၣ် ကအိၣ်မူ မၤလၤကပီၤယွၤလၢ တၢ်အိၣ်မူအိၣ်ဂဲၤကိးကပၤဒဲးအဂီၢ်န့ၣ်လီၤ.
စီၤပီလူးအတၢ်ဟ့ၣ်ဒိအံၤ ကဲထီၣ် တၢ်နဲၣ်ကျဲသ့ဝဲဒၣ် ဖဲလၢပဒိးန့ၢ် ကယဲၢ်တၢ်ခွဲးယာ်လၢ တၢ်ကဲခိၣ်နၢ်အတၢ်မၤခဲလၢာ်အပူၤ, လီၤလီၤဆီဆီ ဖဲပလီၤဘှံးလီၤတီၤလၢ မူဒါ တၢ်ဖံးတၢ်မၤအကတီၢ်န့ၣ်လီၤ. ခီဖျိလၢ ကစၢ်ယွၤအသးစီဆှံ မၤဆူၣ်ထီၣ် ပဂံၢ်ပဘါအဃိ, ဖဲပကွၢ်ထွဲကဟုကယာ်ပှၤအိၣ်လၢ ပတၢ်ပၢဆှၢတၢ်အဖီလာ်တဖၣ်အဂီၢ် လၢတၢ်အဲၣ်သူၣ်အိၣ်သးအိၣ်အပူၤ ဒ်လၢပဟ့ၣ်ဂံၢ်ဟ့ၣ်ဘါဒီးနဲၣ်ဆှၢ အဝဲသ့ၣ်ဆူ ကစၢ်ယ့ၣ်ရှူးအအိၣ်န့ၣ်လီၤ.
