တၢ်ဃ့ၢ် မၣ်ရသိၣ်(marathon)န့ၣ် မ့ၢ်တၢ်ဆီၣ်သဆၣ်ထီၣ် ပနီၢ်ခိ, နီၢ်သး အတၢ်မၤန့ၣ်လီၤ. ဘၣ်ဆၣ် လၢတီၤထီကၠိဖိတဂၤအဂီၢ် တၢ်ဃ့ၢ်သတြီၤ ပှၢ်လၢ်ကျါတၢ်ဃ့ၢ်သတြီၤအဆူၣ်အကီတမံၤ စံးတၢ်န့ၣ် မ့ၢ်တၢ်ဆီၣ်သဆၣ်ထီၣ် ပှၤဂၤန့ၣ်လီၤ. ပိာ်မုၣ် ၁၄ နံၣ်ဖိ စူစဲၣ် ဘၣ်ကမဲၣ်(Susan Bergeman)န့ၣ် ဖဲအဃ့ၢ်လိအသး ဒီးနုာ်လီၤ ဃ့ၢ်သတြီၤတၢ်တဘျီလၢ်လၢ်, အဝဲဆီၣ်အဝဲၢ်ခွါ ကၠဲးဖရံၣ်(Jaffrey)လၢ ဘၣ်ဆ့ၣ်နီၤလၢ ခးလ့ၣ်လိၤတဂၤန့ၣ်လီၤ. ကၠဲးဖရံၣ် အသးအိၣ်တနံၣ်ဒီး ၉ လါအဆၢကတီၢ်, ဒိးန့ၢ်ဝဲ သးဖျၢၣ်အတၢ်ဂ့ၢ်ကီ ဒီး ခိၣ်နူာ်အထူၣ်အပျၢ်တနီၤ ဟးဂီၤနးနးဒိၣ်ဒိၣ်အဃိ အချၢဃံအထူၣ်တဖၣ် သံဝဲဒၣ်န့ၣ်လီၤ. ခဲကနံၣ်အံၤ စူစဲၣ်စူးကွံာ်ညိကွံာ်ဝဲအတၢ်ပညိၣ်လၢ တၢ်နုာ်လီၤဃ့ၢ်သတြီၤတၢ်တဖၣ် ဒ်သိးအဝဲၢ်ကၠဲးဖရံၣ် စ့ၢ်ကီး ကနုာ်လီၤဃ့ၢ်သတြီၤပြၢတၢ်ဒီးအီၤအဂီၢ်န့ၣ်လီၤ. တၢ်မၤအံၤမ့ၢ်တၢ်အဲၣ်ဒီး တၢ်ဟ့ၣ်လီၤသးစူးကွံာ်ညိကွံာ်သးတမံၤန့ၣ်လီၤ.
ပှၤတၢ်မၢဖိစီၤပီလူး အသးပူၤစ့ၢ်ကီး အိၣ်ဒီး တၢ်အဲၣ်ဒီး တၢ်စူးကွံာ်ညိကွံာ်သးန့ၣ် ဖျါလၢ ရိမ့ၤ ၁၂:၁၀ အပူၤ ဖဲကွဲးဟ့ၣ်ဂံၢ်ဟ့ၣ်ဘါဝဲ အပှၤဖးလံာ်ဖိတဖၣ် ဒ်သိး က “အဲၣ်လိာ်ကွံလိာ်သး ကဒဲကဒဲ” အဂီၢ်န့ၣ်လီၤ. အဝဲသ့ၣ်ညါတ့ၢ်ဝဲလၢ ရိမ့ၤ ပှၤစူၢ်က့ၤနာ်က့ၤ တၢ်ဖိတဖၣ် ဘၣ်ဂဲၤလိာ်ဝဲအသး ဒီးတၢ်သးက့ၢ်သးကါတၢ်, တၢ်သူၣ်ဒိၣ်သးဖျိးတၢ်ဒီး တၢ်ပာ်သူၣ်ပာ်သး တလီၤပလိာ်တၢ်ဒိၣ်ဒိၣ်မုၢ်မုၢ်န့ၣ် ဖျါလၢအဆၢဖိ ၁၈ အပူၤန့ၣ်လီၤ. လၢတၢ်န့ၣ်အဃိ စီၤပီလူး ဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကပျဲယွၤအတၢ်အဲၣ်ကပၢဆှၢ အဝဲသ့ၣ်အသးပူၤအဂီၢ်န့ၣ်လီၤ. တၢ်အဲၣ်ဒ်သိးအံၤ အိၣ်သူၣ်လီၤအသးလၢကစၢ်ခရံာ်အတၢ်အဲၣ်လၢ ကမၤဝဲ ပှၤဂၤအတၢ်ဂ့ၤအဒိၣ်အထီကတၢၢ်အဂီၢ်န့ၣ်လီၤ. အဆၢဖိ ၁၃ ပာ်ဖျါဝဲ တၢ်အဲၣ်အံၤ မ့ၢ်ဝဲတီဝဲ ကဆှီဝဲ ဒီးကနဲၣ်ဆှၢဆူ တၢ်သးအိၣ်ဟ့ၣ်နီၤလီၤတၢ်န့ၣ်လီၤ. အဆၢဖိ ၁၆ စံးဘၣ်ပှၤန့ၣ် “ပှၤလၢအအဲၣ်ကျိၤကျဲ ဒ်သိးအံၤတဖၣ်န့ၣ် ဆိကမိၣ်တၢ်လၢ ပှၤဂၤအဂီၢ် အါန့ၢ်ဒိၣ်န့ၢ်ဝဲ ဒီး ကြၢးဘၣ်တၢ်မၤလၤကပီၤ အါန့ၢ် အကစၢ်ဒၣ်ဝဲအဂီၢ်န့ၣ်လီၤ.”
ဒ်ပမ့ၢ် ပှၤစူၢ်က့ၤနာ်က့ၤ ကစၢ်ယ့ၣ်ရှူးသ့ၣ်တဖၣ်အသိး, ပဃ့ၢ်သတြီၤတၢ်အဲၣ်အတၢ်ဃ့ၢ်ပြၢဃုာ်ဒီး တၢ်မၤစၢၤ ပှၤဂၤလၢ ကတုၤဃီၤ တၢ်ဃ့ၢ်သတြီၤ အဖီတၢၣ်အဂီၢ်န့ၣ်လီၤ. တၢ်မၤအံၤ ကီခဲသ့ဘၣ်ဆၣ်, ကဟဲစိာ်န့ၢ်တၢ်မၤလၤကပီၤကစၢ်ယ့ၣ်ရှူးန့ၣ်လီၤ. ပမ့ၢ်စံးဒ်န့ၣ်ဘၣ်ဒီး လၢတၢ်အဲၣ်အဃိ, မ်ပကသန့ၤထီၣ်ၤပသးလၢ ကစၢ်ယ့ၣ်ရှူးအလိၤ, ဒ်သိး ကမၤဆူၣ်ထီၣ် ပဂံၢ်ပဘါလၢ ပကအဲၣ်ဒီး မၤတၢ်လၢပှၤဂုၤပှၤဂၤအဂီၢ်န့ၣ်တက့ၢ်.
