“အၣ်လါ” တၢ်ကတိၤ ဟးထီၣ်လၢယထးခိၣ် ဖဲလၢ သိလ့ၣ် ထြး(truck)တခိၣ် ဟဲနုာ်လီၤ သတူၢ်ကလာ်လၢယမဲာ်ညါအဃိန့ၣ်လီၤ. လၢသိလ့ၣ်လိၤ ယထံၣ်တၢ်ကွဲးအသး “ယနီၣ်သိလ့ၣ်န့ၣ် မၤသးဒ်လဲၣ်” ဒီးကွဲၤဒီနၢ်နီၢ်ဂံၢ်တခါလီၤ. ယဟံးထီၣ် ယကွဲၤဒီနၢ်ဒီး ကိးနီၢ်ဂံၢ်အံၤန့ၣ်လီၤ. ပိာ်မုၣ်တဂၤစံးဆၢဝဲ ဒီးသံကွၢ်တၢ်ဂ့ၢ်မနုၤလဲၣ်န့ၣ်ဒီး ယပာ်ဖျါထီၣ် ယတၢ်သးတံာ်တာ်န့ၣ်လီၤ. ပိာ်မုၣ်အံၤ ကွဲးနီၣ်ဝဲသိလ့ၣ် ထြးနီၢ်ဂံၢ် ဒီးစံးဘၣ်ယၤလၢ တၢ်သးဟးဂီၤအပူၤ “ခဲကနံၣ်အံၤ နမ့ၢ်အဲၣ်ဒိးပာ်ဖျါထီၣ် တၢ်လၢပှၤတဂၤဂၤ နီၣ်သိလ့ၣ်ဂ့ၤဂ့ၤဘၣ်ဘၣ်လီၤန့ၣ် နကိးတဲဖျါထီၣ်သ့ထီဘိန့ၣ်လီၤ”.

လၢတၢ်လီၤဘှံးလီၤတီၤအပူၤ စံးဆၢ တၢ်ဒီးယၤန့ၣ် ကဲထီၣ် တၢ်သးတမုာ်လၢ ယဂီၢ် လၢယတၢ်ပာ်တီပာ်လိၤ ယသးအဂီၢ်န့ၣ်လီၤ. တၢ်မဲာ်ဆှး လုာ်ဘၢကွံာ်ယသးပူၤန့ၣ်လီၤ. လၢတၢ်တီတၢ်လိၤအဂီၢ် ယတၢ်သူၣ်ဆူၣ်သးဆူၣ်အပူၤ ယစံးကတိၤဘၣ် တၢ်ကတိၤအဆူၣ်အကိၤ လၢတၢ်သးဒိၣ်သးဖျိးအံၤန့ၣ် ကလဲၤဘၣ်ဒိ ပိာ်မုၣ်တဂၤအံၤလၢ ဘၣ်မၤတၢ်မၤအကီအခဲတဂၤဒ်လဲၣ်န့ၣ် မ့ၢ်လၢ ယတဆိကမိၣ်တၢ်လၢ အဂီၢ်အဃိန့ၣ်လီၤ. အကတီၢ်ဖိအံၤ ယသ့ၣ်ညါထွဲလၢ ယတၢ်စူၢ်တၢ်နာ်ဒီး ယတၢ်အိၣ်မူဟူးဂဲၤ ပာ်ဖျါထီၣ်တၢ်န့ၣ် တလီၤပလိာ်သးအဃိ လီၤသးဟးဂီၤဝဲ ဒိၣ်မးန့ၣ်လီၤ.

တၢ်လီၤဟိလၢ ပတၢ်အိၣ်မူအိၣ်ဂဲၤ ဒီးပတၢ်နာ်တဖၣ် အဘၢၣ်စၢၤတဖၣ်န့ၣ် မ့ၢ်တၢ်လၢ လံာ်ယၤကိာ် ပာ်ဖျါမၤလီၤတံၢ်ဝဲဒၣ်န့ၣ်လီၤ. လံာ်ယၤကိာ် ၁:၁၉-၂၀ အပူၤ ပကဖးဘၣ်, “ယဒီပုဲၢ်ဝဲၢ်လၢ တၢ်အဲၣ်အီၤသ့ၣ်ဧၢ, မ်ပှၤနၢ်ဟူတၢ်ချ့သဒံး, ကတိၤတၢ်နီၢ်ကတုၤ, သးထီၣ်နီၢ်ကတုၤကိးဂၤဒဲးတက့ၢ်. အဂ့ၢ်ဒ်အံၤ ပှၤကညီအသးဒိၣ်ထီၣ်န့ၣ် တမၤဘၣ် ယွၤအတၢ်တီတၢ်လိၤဘၣ်” န့ၣ်လီၤ. လၢခံ အဆၢဖိ ၂၂ အပူၤ စီၤယၤကိာ် မၤပှဲၤအတၢ်ကတိၤလၢ “ဒီးကဲထီၣ် ပှၤမၤတၢ်အကလုၢ်တက့ၢ်, ဒီးတမ့ၢ်ဘၣ် ပှၤလီလီၤအသး ဒီးကဲထီၣ် ပှၤထဲအနၢ်ဟူတၢ်ဧိၤန့ၣ်တဂ့ၤ”န့ၣ်လီၤ.

ပဝဲကိးဂၤ ပအိၣ်ဒီး တၢ်လီၤတူၢ်လီၤကာ်န့ၣ်လီၤ. ဘၣ်တဘျီဘျီ, ပနီၣ်လဲၤ တၢ်အိၣ်မူ အသိလ့ၣ်န့ၣ် ပလိၣ်ဘၣ် တၢ်မၤစၢၤန့ၣ်လီၤ. လၢအမ့ၢ် ပကပီၢ်ယၢ်အၢၣ်လီၤ တၢ်ဒဲးဘး ဒီးဃ့တၢ်မၤစၢၤလၢကစၢ်ယွၤ ဒ်သိးကမၤဂ့ၤဘှီဘၣ်က့ၤ ပတၢ်အိၣ်မူသကဲာ်ပဝး လၢအလီၤရၢၢ်လီၤစၢၢ်တၢ်အဂီၢ်န့ၣ်လီၤ.