သ့ၣ်တၢ်ဂီၤတၢ်ဖီၣ် လၢပှၤပာ်ဘါအီၤလၢဟံၣ်တခါန့ၣ် ဘၣ်တၢ်ဟုၣ်န့ၢ်အီၤလၢ ပိာ်မုၣ်တဂၤ အံၣ်ကူဝၣ်(Ekuwa)အအိၣ်အဃိဒီး ပိာ်မုၣ်အံၤ လဲၤပာ်ဖျါထီၣ် တၢ်ဂ့ၢ်န့ၣ်ဆူ ပှၤဘၣ်မူဘၣ်ဒါတဖၣ်န့ၣ်လီၤ. ဖဲပၢၤကီၢ်တဖၣ်နာ်ဝဲလၢ ဃုထံၣ်န့ၢ်က့ၤ တၢ်ဂီၤတၢ်ဖီၣ်န့ၣ်ဒီး ကိးဝဲ ပိာ်မုၣ်အံၤ ဒ်သိးကမၤဂၢၢ်မၤကျၢၤ အတၢ်ဂီၤတၢ်ဖီၣ်ဧါန့ၣ်လီၤ. အဝဲသ့ၣ်သံကွၢ် ပိာ်မုၣ်လၢ “တၢ်အံၤ မ့ၢ်နကစၢ်တၢ်ဂီၤတၢ်ဖီၣ်ဧါ”န့ၣ်လီၤ. ပိာ်မုၣ်န့ၣ် စံးဆၢလၢ တၢ်သးအုးအပူၤ “တမ့ၢ်ဘၣ် ယကစၢ်တၢ်ဂီၤတၢ်ဖီၣ်ဘၣ်. ယကစၢ်တၢ်ဂီၤတၢ်ဖီၣ်န့ၣ် ဒိၣ်န့ၢ် တၢ်အံၤဒီး ဃံလၤဒိၣ်န့ၢ်တၢ်အံၤန့ၣ်လီၤ”.
ပှၤဟီၣ်ခိၣ်ဖိတဖၣ် ကျဲးစၢးပာ်ဖျါထီၣ် ယွၤအက့ၢ်အဂီၤ ဒ်အတၢ်ဆိကမိၣ်ထီၣ်ဘးဝဲအသိးဒီး မုၢ်လၢ်ဝဲလၢ ပှၤကညီစုအတၢ်မၤ, တၢ်ဂီၤတၢ်ဖှီၣ်တဖၣ်အံၤ ကဒီဒၣ် အဝဲသ့ၣ်န့ၣ်လီၤ. ဘၣ်သ့ၣ်သ့ၣ် ဒ် ၁ မိၤ ၃၁:၁၉ ပာ်ဖျါဝဲအသိး စီၤယၤကိာ်အမါ နီၢ်ရၤဃ့လး “ဟုၣ်န့ၢ်အပၢ်အတၢ်ဂီၤတရၤဖး” ဖဲအဝဲဃ့ၢ်ဟးထီၣ်လၢ အပၢ်စီၤလၤဘၣ် အဆၢကတီၢ်န့ၣ်လီၤ. ဘၣ်ဆၣ် အဆၢဖိ ၃၄ စံးဘၣ်ပှၤ လၢတၢ်ဂီၤတၢ်ဖီၣ်တဖၣ် ဘၣ်တၢ်ပာ်ခူသူၣ်လၢ အဒဲပူၤဘၣ်ဆၣ် ကစၢ်ယွၤအစုအိၣ်လၢ စီၤယၤကိာ်အလိၤန့ၣ်လီၤ.
တၢ်မၤအသးအံၤ ဝံၤဒီး ဖဲတၢ်လဲၤအံၤ တကတီၢ်အပူၤ ၁ မိၤ ၃၂:၂၄ ပာ်ဖျါဝဲ စီၤယၤကိာ်ကနိလိာ်သးဒီး ပှၤကညီၤတဂၤ ဒီတနၤကျၢၤန့ၣ်လီၤ. ပှၤလၢအကနိလိာ်သးဒီးအီၤန့ၣ် တမ့ၢ်ပှၤကညီတဂၤဘၣ်န့ၣ် စီၤယၤကိာ် ကသ့ၣ်ညါဝဲအဃိ တုၤလၢ မုၢ်ဆ့ၣ်ဝါထီၣ် အဆၢကတီၢ်န့ၣ် အဆၢဖိ ၂၆ ပာ်ဖျါဝဲ စီၤယၤကိာ်စံးဘၣ်ပှၤတဂၤန့ၣ်“ နမ့ၢ်တဆိၣ်ဂ့ၤဘၣ်ယၤဘၣ်ဒီး ယတပျၢ်ဘၣ်နၤဘၣ်”န့ၣ်လီၤ. အဆၢဖိ ၂၈-၂၉ ပာ်ဖျါဝဲ ပှၤကညီၤအံၤ ယုၢ်က့ၤစီၤယၤကိာ်အမံၤလၢ အံၣ်စရ့လး (ယွၤဒုးတၢ်) ဒီးဆိၣ်ဂ့ၤအီၤလီၤ. အဆၢဖိ ၃၀ အပူၤ ပာ်ဖျါဝဲ စီၤယၤကိာ်ကိးဝဲတၢ်လီၢ်အံၤလၢ လပနံၤအ့လး (ယွၤအမဲာ်သၣ်), ဒီးစံးဝဲ “အဂ့ၢ်ဒ်အံၤ, ယကွၢ်ဆၢညါယွၤအမဲာ်, ဒီးယသးသမူပူၤဖျဲးလီၤ”န့ၣ်လီၤ.
ကစၢ်ယွၤအံၤ မ့ၢ်ကစၢ်အမ့ၢ်အတီ အိၣ်ဒၣ်ထဲ တဂၤဧိၤန့ၣ် ဒိၣ်န့ၢ်ထီန့ၢ်ဝဲ ဒီးဃံလၤဒိၣ်န့ၢ်အါန့ၢ် ဒ်ကယဲၢ်တၢ်ဂီၤတၢ်ဖီၣ်လၢ အံၣ်ကူဝၣ်အတၢ်ဆိကမိၣ်ထီၣ်ဘးတၢ်န့ၣ်လီၤ. ကစၢ်ယွၤအံၤ တၢ်ဘှီအီၤတ့အီၤလၢ ပှၤကညီအစုတန့ၢ်တသ့ဘၣ်. တၢ်ဟုၣ်န့ၢ်အီၤ ပာ်ခူသူၣ်အီၤတန့ၢ်တသ့ဘၣ်. ဘၣ်ဆၣ် ဒ်စီၤယၤကိာ်မၤလိန့ၢ် ဘၣ်တၢ်လၢမုၢ်နၤအံၤအသိး, ပသုးဘူးပသးဆူ ကစၢ်ယွၤအိၣ်သ့ဝဲဒၣ်န့ၣ်လီၤ. မး ၆:၉ အပူၤ ကစၢ်ယ့ၣ်ရှူး သိၣ်လိဝဲ အပျဲၢ်အဘီၣ်တဖၣ် လၢကကိးကစၢ်ယွၤအံၤ “ပပၢ်အိၣ်လၢမူခိၣ်”န့ၣ်လီၤ.
