တၢ်မၤကမၣ်တၢ်န့ၣ် ကဲထီၣ် တၢ်လီၤပျံၤလီၤဖုးအဃိ ပှၤလၢအမၤကမၣ်တၢ်တဂၤအံၤ ဘၣ်တၢ်စံၣ်ညီၣ်အီၤ လၢကဘၣ်လီၤဃိာ် တုၤအသံတစုန့ၣ်လီၤ. ပှၤတဂၤအံၤ လီၤဘၣ်ဃိာ် တဘျုးနံၣ်ဝံၤအတီၢ်ပူၤ လၢတၢ်ဒုးဃာ်အီၤထဲတဂၤဧိၤအံၤန့ၣ် ဘၣ်တၢ်စးထီၣ် ကူစါယါဘျါအီၤလၢ သးအတၢ်ဆါဒီး နီၢ်သးတကပၤန့ၣ်လီၤ. တၢ်ယါဘျါအတၢ်မၤအံၤ ဒုးအိၣ်ထီၣ် တၢ်ပီၢ်ယၢ်လီၤက့ၤသးဒီး တၢ်မၤဘၣ်လိာ်က့ၤ တၢ်ရ့လိာ်ဘၣ်ထွဲလိာ်သးဒီး ကစၢ်ယ့ၣ်ရှူးန့ၣ်လီၤ. လၢမုၢ်နံၤတဖၣ်အံၤအပူၤ ဃိာ်အပှၤဘၣ်မူဘၣ်ဒါတဖၣ် ဟ့ၣ်အီၤတၢ်ခွဲးလၢ ကရ့လိာ်သးဒီး ပှၤလီၤဃိာ်ဖိအဂၤတဖၣ် လၢတၢ်ဆၢကတီၢ် တအါတစှၤအပူၤန့ၣ်လီၤ. မ့ၢ်လၢယွၤအဘျုးအဖှိၣ်ဒီး ပှၤလီၤဃိာ်ဖိတနီၤ လၢနၢ်ဟူဘၣ် အနီၢ်ကစၢ် အုၣ်အသးအဂ့ၢ်အဃိ ပှၤတဖၣ်စ့ၢ်ကီး ဃုထံၣ်န့ၢ် ကစၢ်ယ့ၣ်ရှူးအတၢ်ပျၢ်တၢ်ဒဲးဘးဒီး တူၢ်လိာ် ကစၢ်ယ့ၣ်ရှူးခရံာ် ဒ်အမ့ၢ် တၢ်အုၣ်က့ၤခီၣ်က့ၤကစၢ်တဂၤန့ၣ်လီၤ.
စီၤမိၤရှ့ မ့ၢ်ပှၤတဂၤလၢ အဘၣ်တၢ်တူၢ်လိာ်အီၤ ဒ်လၢပှၤအိၣ်ဒီး တၢ်စူၢ်တၢ်နာ်အဒိၣ်ကတၢၢ်တဂၤ ဘၣ်ဆၣ် မၤကမၣ်ဘၣ် တၢ်လၢ အလီၤပျံၤလီၤဖုးန့ၣ်လီၤ. ၂ မိၤ ၂:၁၁-၁၂ ပာ်ဖျါထီၣ် “… ဒီးထံၣ်ဘၣ် ပှၤအဲၤကူပတူးဖိ ကျီပှၤဧ့ၤဘြံၤဖိ… ဒီးဃၣ်ကွံာ်ဝဲလၢအံၤတခီ ဒီးလၢန့ၣ်တခီ, … ကျီသံပှၤအဲၤကူပတူးဖိ”န့ၣ်လီၤ. အဝဲမၤကမၣ်ဘၣ်တၢ်ဒၣ်လဲာ် ကစၢ်ယွၤအတၢ်ဘျုးတၢ်ဖှိၣ်န့ၣ် တလဲၤကပာ်ဝဲ အခ့အပှၤလၢတလၢတပှဲၤတဂၤအံၤန့ၣ်ဘၣ်. လၢခံန့ၣ် ၂ မိၤ ၃:၁၀ စံးဘၣ်ပှၤလၢ ကစၢ်ယွၤဃုထၢ စီၤမိၤရှ့ လၢကအုၣ်က့ၤခီၣ်က့ၤ အပှၤဂီၢ်မုၢ်တဖၣ်လၢ ဘၣ်တၢ်ဆီၣ်သနံးအီၤတဖၣ်န့ၣ်လီၤ. လံာ်ရိမ့ၤ ၅:၁၄ အပူၤ ပကဖးဘၣ် “စီၤအၤဒၣ်အစိၤ တုၤလီၤလၢ စီၤမိၤရှ့အစိၤန့ၣ်, ပှၤလၢအတမၤဘၣ်တၢ်ဒဲးဘး ဒ်စီၤအၤဒၣ် အတၢ်လုၢ်သ့ၣ်ခါပတာ်အသိးဒၣ်လဲာ်န့ၣ် တၢ်သံပၢဘၣ်အီၤလီၤ”န့ၣ်လီၤ. အဆၢဖိ ၁၅-၁၆ လၢအပိာ်ထွဲထီၣ်အသးပူၤ စီၤပီလူးစံးဝဲ “တၢ်လၢအပူၤကွံာ်န့ၣ် ပမ့ၢ်အိၣ်ဒီး တၢ်ကမၣ်ဘၣ်ဆၣ် လၢပဂီၢ်န့ၣ် ကစၢ်ယွၤအဘျုးအဖှိၣ်န့ၣ် ကဆီတလဲက့ၤပှၤ ဒီးမၤလိၤမၤဘၣ်လိာ်က့ၤပှၤဒီးအီၤ သ့ဝဲဒၣ်န့ၣ်လီၤ.”
ဘၣ်သ့ၣ်သ့ၣ်, မ့ၢ်ပကဆိကမိၣ်ထံၣ်လီၤပသးလၢ ပမၤကမၣ်တ့ၢ်တၢ်တဖၣ်အဃိ ပတကြၢးဒီး တၢ်သ့ၣ်ညါကစၢ်ယွၤ ပျၢ်ပတၢ်ကမၣ်ဒီး တၢ်အိၣ်မူမၤလၤကပီၤယွၤအဂီၢ် ဘၣ်န့ၣ်လီၤ. ဘၣ်ဆၣ် မ့ၢ်လၢကစၢ်ယွၤအဘျုးအဖှိၣ်အဃိ ပတဘၣ်တၢ်ဆီတလဲကွံာ် ပှၤဒီး မၤပူၤမၤဖျဲးပှၤလၢ ကစၢ်ယ့ၣ်ရှူးအပူၤသ့ဝဲဒၣ် ဒ်သိးပကမၤစၢၤပှၤဂုၤပှၤဂၤတဖၣ် ကဆီတလဲအသးဆူ တၢ်အထူအယိာ်အဂီၢ်န့ၣ်လီၤ.
