တၢ်ယီၤထီၣ်သီအဆၢကတီၢ်တဘျီအံၤ နီၣ်ဧိၤတပှီာ်ဧိၤအမုၢ်တဖၣ်(weeds) မဲထီၣ်ဝဲဒၣ်လၢ ပဟံၣ်လီၢ်ခံ တၢ်လီၢ်လၢ ဟီၣ်ခိၣ်လီၤဟိအလီၢ်န့ၣ်လီၤ. လၢအကျါတပှီာ်တမုၢ်န့ၣ် ဒိၣ်န့ၣ် တၢ်အဂၤအဃိ ယဂုာ်ကျဲးစၢးထုးထီၣ်အီၤ တုၤဒၣ်လဲၣ် ယဘၣ်ယိၣ်လၢ ကကဲထီၣ် တၢ်ဘၣ်ဒိဘၣ်ထံးလၢယၤန့ၣ်လီၤ. တချူးယဃုန့ၣ်တပူာ်ဒီး ခူၣ်ထုးထီၣ်ကွံာ် အဆၢကတီၢ် ယပာ်သူၣ်ပာ်သးလၢ ယဖိမုၣ်လူန့ၣ်အီၤထံန့ၣ်လီၤ. ယစံးယဖိမုၣ်လၢ “ဘၣ်မနုၤအဃိ နလူန့ၢ် တပှီာ်တမုၢ်အံၤန့ၣ်လဲၣ်” ဒီးအဝဲစံးဆၢက့ၤဝဲလၢ တၢ်နံၤကမှံၤ “ယအဲၣ်ဒိးထံၣ်ဘၣ်လၢ တၢ်တမုၢ်အံၤ မ့ၢ်ကဒိၣ်ထီၣ်တုၤထဲလဲၣ်”န့ၣ်လီၤ.
နီၣ်ဧိၤတပှီာ်ဧိၤတဖၣ်န့ၣ် တမ့ၢ်တၢ်လၢ ပအဲၣ်ဒိး ဒုးမဲထီၣ်အီၤလၢ တၢ်သူၣ်အိၣ်သးအိၣ်အပူၤဘၣ်. ဘၣ်ဆၣ်ဒီး ဒ်ယဆိကမိၣ်ထီၣ်အဂ့ၢ်ဒီး, ယနၢ်ပၢၢ်ထီၣ်ဝဲလၢဘၣ် တဘျီဘျီလၢ ပနီၢ်သးပူၤ ပလူဘၣ်ထံလၢ နီၣ်ဧိၤတပှီာ်ဧိၤအဂီၢ်, ဒ်ပစံးတၢ်အသိး ပလူၤ ပိာ်ထွဲ နီၢ်ခိသွံၣ်ထံဖံးညၣ်အတၢ်သးကွံလၢ ကမၤဆံးလီၤစှၤလီၤ ပနီၢ်ခိနီၢ်သးအတၢ်ဒိၣ်ထီၣ် ဂုၢ်ထီၣ်ပသီထီၣ်အဂီၢ်န့ၣ်လီၤ.
ကလၤတံ ၅:၁၃-၂၆ စီၤပီလူးကွဲးပာ်ဖျါတၢ်ဂ့ၢ်အံၤဒီး ထိၣ်သတြီၤဝဲ တၢ်အိၣ်မူအိၣ်ဂဲၤ လၢနီၢ်ခိဒီး တၢ်အိၣ်မူအိၣ်ဂဲၤလၢ နီၢ်သးန့ၣ်လီၤ. အဝဲစံးဝဲ ထဲတၢ်လူၤပိာ်ထွဲအိၣ်မူ လၢတၢ်သိၣ်တၢ်သီတၢ်ဘျၢတဖၣ်အပူၤန့ၣ် တမ့ၢ်တဒုးအိၣ်ထီၣ် တၢ်အိၣ်မူလၢအပူၤဖျဲးဒီးတပှီာ်တပှာ်, တၢ်အိၣ်မူလၢ ပမိၣ်န့ၢ်သးလီအီၤန့ၣ်ဘၣ်. အလီၢ်န့ၣ် စီၤပီလူးနဲၣ်လိပှၤ ဒ်သိးပတလူဘၣ်နီၣ်ဧိၤတပှီာ်ဧိၤလၢ ထံတဂ့ၤအဂီၢ် “ပကလဲၤတၢ်လၢသးအပူၤတက့ၢ်” န့ၣ်လီၤ. အဆၢဖိ ၁၆ အပူၤစံးကဒီးဝဲ “တၢ်ညီနုၢ်လဲၤတၢ်ဒီးကစၢ်ယွၤန့ၣ် မ့ၢ်တၢ်လၢအမၤ ပူၤဖျဲးပှၤဒီး တၢ်ဒုးအိၣ်ထီၣ်, တၢ်မၤလၢထီၣ်ပှဲၤထီၣ် နီၢ်ခိသွံၣ်ထံအတၢ်သးကွံတၢ်” တဖၣ်န့ၣ်လီၤ. ဒ်သိးပကနၢ်ပၢၢ် စီၤပီလူးအတၢ်သိၣ်လိနဲၣ်လိပှၤ အလၢအပှဲၤအဂီၢ် တၢ်ကဘၣ်မၤအသးလၢ သးသမူဒီစိၤ တပတီၢ်ဘၣ်တပတီၢ်န့ၣ်လီၤ. ဘၣ်ဆၣ် ယဘၣ်သူၣ်ဘၣ်သးလၢ အဝဲအတၢ်ဒုးနဲၣ်တၢ်လၢ အပာ်ဖျါဆှဲအဃိန့ၣ်လီၤ.
ကလၤ ၅:၂၂-၂၅ အပူၤ တၢ်လၢအဒုးအိၣ်ထီၣ် တၢ်လၢပတအဲၣ်ဒိးတဖၣ် ခီဖျိတၢ်မၤလၢမၤပှဲၤ ပနီၢ်ခိသွံၣ်ထံ အတၢ်သးကွံတၢ်အလီၢ်န့ၣ် ပမ့ၢ်သူၣ်ထီၣ် ဒုးမဲထီၣ် ပတၢ်ရ့လိာ်ဘၣ်ထွဲလိာ်သး ဒီးကစၢ်ယွၤန့ၣ်ဒီး မ့ၢ်ပသူၣ်ဘၣ်ဖျးဘၣ်တၢ်သၣ်, တၢ်အိၣ်မူလၢအဘၣ်ကစၢ်ယွၤအသးန့ၣ်လီၤ.
