ခီလ့ၣ်ကၠိ တၢ်အိၣ်ဖှိၣ်သရၣ်သးစၢ်ဖိတဂၤ အိၣ်ဒီးအတၢ်ကီတၢ်ခဲလၢ အတၢ်မၤအပူၤန့ၣ်လီၤ. ဖဲယသံကွၢ်အီၤ မ့ၢ်အဃ့ထုကဖၣ်တၢ်လၢ ကစၢ်ယွၤအတၢ်ဒုးနဲၣ်, အတၢ်မၤစၢၤအီၤ အဂီၢ်န့ၣ်ဧါ. ဒီးဖျါဒ်သိး တၢ်တလီၤတံၢ်ဘၣ်အီၤန့ၣ်လီၤ. ဒ်စီၤပီလူး ဟ့ၣ်ဂံၢ်ဟ့ၣ်ဘါဝဲလၢ ပကထုကဖၣ် ကိးဆၢကိးကတီၢ်ဒဲးအသိးအဂီၢ်န့ၣ် သရၣ်သးစၢ်အံၤ စံးဆၢအၢၣ်လီၤဝဲလၢ “မ့ၢ်ယနာ်တၢ်ဃ့ဘါထုကဖၣ်တၢ်ဒ်ဧါန့ၣ် တလီၤတံၢ်ဘၣ်ယၤဘၣ်.” ယသးဒ့ဒီလၢ “မ့ၢ်ကစၢ်ယွၤ ဒိကနၣ် ပတၢ်ထုကဖၣ်တၢ်န့ၣ်ဧါ, မ့ၢ်ကွၢ်ဝဲဒၣ် ဟီၣ်ခိၣ်အံၤ ဒ်အံၤလီၤဧၣ်” န့ၣ်လီၤ. သရၣ်သးစၢ်ဖိတဂၤအံၤ ဒုးအိၣ်ထီၣ်တၢ်သးခုကစီၣ် အတၢ်မၤအံၤ လၢအနီၣ်ကစၢ်ဒၣ်ဝဲအဂံၢ်အဘါဒၣ်ဝဲအဃိ တၢ်လၢအလီၤသးအုးဘၣ်တၢ်န့ၣ် အတၢ်မၤတကဲထီၣ်လိၣ်ထီၣ်ဝဲဘၣ်န့ၣ်လီၤ. ဘၣ်မနုၤအဃိလဲၣ်န့ၣ်, မ့ၢ်လၢအညိကွံာ် ကစၢ်ယွၤအဃိန့ၣ်လီၤ.
ကစၢ်ယ့ၣ်ၡူးန့ၣ် ဒ်အမ့ၢ်တၢ်အိၣ်ဖှိၣ်အလၢၢ်သနၢၣ်အခိၣ်အသိး ထီဘိဘၣ် တၢ်ညိကွံာ်အီၤ စးထီၣ်လၢ အပှၤဂီၢ်မုၢ်ပှၤယူဒၤဖိတဖၣ်န့ၣ် ဖျါလၢ ယိၤ ၁:၁၁ အပူၤန့ၣ်လီၤ. တုၤမုၢ်မဆါတနံၤအံၤဒၣ်လဲၣ် ပှၤအါဂၤစူးကွံာ်ညိကွံာ်အီၤလီၤ. ပှၤသ့ၣ်တဖၣ်အံၤ ဒုးအိၣ်ထီၣ် အတၢ်အိၣ်မူအိၣ်ဂဲၤ, အတၢ်ဖံးတၢ်မၤ, ခရံာ်အတၢ်အိၣ်ဖှိၣ်တဖၣ် ဒၣ်လဲၣ် ဘၣ်တၢ်သူၣ်ထီၣ်လၢ ပှၤဟီၣ်ခိၣ်ဖိအတၢ်ရဲၣ်တၢ်ကျဲၤ, တၢ်မံမီၣ်ဆိကမိၣ်တဖၣ် ဒီးတၢ်အဂၤ လၢပသန့ၤထီၣ် တသ့တဖၣ်အလိၤန့ၣ်လီၤ. ထဲပတၢ်အုၣ်က့ၤခီၣ်က့ၤတၢ် ကစၢ်တဂၤဧိၤန့ၣ် မ့ၢ်ဒၣ်ပဂံၢ်ပဘါဒီး ပတၢ်ဒီသဒၢတၢ်အလီၢ်န့ၣ်လီၤ(စံး ၁၁၈:၁၄). အဆၢဖိ ၂၂ ပာ်ဖျါဝဲ “လၢၢ်လၢပှၤမၤတၢ်ဖိညိကွံာ်ဝဲတဖျၢၣ်န့ၣ် အိၣ်ကဲထီၣ်လၢတၢ်အသနၢၣ်အခိၣ်လံ”န့ၣ်လီၤ.
ပတၢ်အိၣ်မူတဖၣ် ဘၣ်တၢ်သူၣ်ထီၣ်အီၤလၢ တၢ်အသနၢၣ် လၢအကါဒိၣ်တမံၤ အလိၤ ဒီးကစၢ်ယွၤကတဲာ်ကတီၤ ဟ့ၣ်လီၤဝဲ လၢကျဲအကျိၤအကွာ် ဂ့ၤဂ့ၤဘၣ်ဘၣ် ဆူကယဲၢ်ပှၤလၢအစူၢ်က့ၤနာ်က့ၤအီၤတဖၣ် ဃုမၤဝံၤ တၢ်ဖံးတၢ်မၤ ကသ့အဂီၢ်န့ၣ်လီၤ. လၢတၢ်န့ၣ်အဃိ, ပတၢ်ဃ့ထုကဖၣ်တၢ်ဒ် စံး ၁၁၈:၂၈ ပာ်ဖျါဝဲအသိး “အုၣ်က့ၤခီၣ်က့ၤတၢ် ခဲကနံၣ်အံၤတက့ၢ်, ယွၤဧၢ, ဒုးဘီၣ်ထီၣ်ညီထီၣ်လၢ် တၢ်ခဲကနံၣ်အံၤတက့ၢ်, ယွၤဧၢ”န့ၣ်လီၤ. ကစၢ်ယွၤအတၢ်စံးဆၢ အစဲကမ့ၢ် တၢ်မနုၤလဲၣ်. အဆၢဖိ ၂၆ ဒုးသ့ၣ်နီၣ်ပှၤ “ပှၤလၢအဟဲဝဲလၢ ကစၢ်ယွၤအမံၤန့ၣ် မ်အဘၣ်တၢ်ဆိၣ်ဂ့ၤတက့ၢ်” န့ၣ်လီၤ. မ့ၢ်လၢကစၢ်ယွၤန့ၣ် အဂံၢ်အဘါဆူၣ်ဒီး ဂ့ၤဝဲအဃိ မ်ပကစံးဘျူးစံးထီၣ်ပတြၢၤအီၤန့ၣ်တက့ၢ်.
