ပနၢ်ဟူတၢ်ကစီၣ်ပာ်ဖျါ ဖဲ၂၀၂၁နံၣ်န့ၣ် ပှၤစိာ်တၢ်သးခုကစီၣ်ဖိ (၁၇) ဂၤ ဘၣ်တၢ်ဖီၣ်စိာ်န့ၣ်ဆူၣ်လၢ ပှၤအၢပှၤသီတဖုန့ၣ်လီၤ. ကျိာ်စ့လၢအဝဲသ့ၣ်ဃ့ဝဲ မ့ၢ်တဒိးန့ၢ်ဘၣ်ဒီး စံးကတိၤ မၤပျံၤမၤဖုးဝဲ လၢကမၤသံပှၤလၢအဖီၣ်ဃာ်တဖၣ် ဃုာ်ဒီးဖိသၣ်တဖၣ်န့ၣ်လီၤ. လၢတၢ်ကမၢကမၣ်အပူၤ ပှၤမ့းရှ့ၣ်နရံၣ်ဖိတဖၣ် ပူၤဖျဲးထီၣ်က့ၤလၢ တၢ်စိာ်ဖီၣ်ဆူၣ် အဝဲသ့ၣ်န့ၣ်လီၤ. ဖဲလဲၤတုၤဆူတၢ်ဘံၣ်တၢ်ဘၢအလီၢ်န့ၣ်ဒီး ဆှၢလီၤတၢ်ကစီၣ်ဆူ ပှၤလၢအဖီၣ်စိာ်ဆူၣ် အဝဲသ့ၣ်အအိၣ်န့ၣ်လီၤ. တၢ်ကစီၣ်အပူၤစံးဝဲ “ကစၢ်ယ့ၣ်ၡူး သိၣ်လိတ့ၢ်ပှၤလၢ အတၢ်ကတိၤဒီး အနီၣ်ကစၢ်ဒၣ်ဝဲ အိၣ်မူဟ့ၣ်ဒိပှၤလၢ တၢ်အဲၣ်လၢအပျၢ် ပှၤဂၤအတၢ်ဒဲးဘး အစိကမီၤန့ၣ် အဂံၢ်ဆူၣ်အါန့ၣ် တၢ်မၤဆူၣ်မၤစိးတၢ်လၢ တၢ်သးက့ၣ်သးဟ့တၢ်အပူၤန့ၣ်လီၤ. လၢတၢ်န့ၣ်အဃိ, ပဆှၢမၤလဲၣ်ထီၣ် ပတၢ်ပျၢ်ပှၤဂၤအတၢ်ဒဲးဘးဆူ သုအိၣ်န့ၣ်လီၤ.”
ကစၢ်ယ့ၣ်ၡူးမၤလီၤတံၢ်ဝဲလၢ တၢ်ပျၢ်ပှၤဂၤအတၢ်ဒဲးဘးန့ၣ် အိၣ်ဒီးအစိကမီၤန့ၣ်လီၤ. အဝဲစံးဝဲဒၣ်လၢ မး ၆:၁၄ အပူၤ “အဂ့ၢ်ဒ်အံၤ, သုမ့ၢ်ပျၢ်ကွံာ် ပှၤကညီအလီၤကမၣ်တၢ်ဒီး,သုပၢ်အိၣ်လၢမူခိၣ်န့ၣ် ကျၢ်ကွံာ်စ့ၢ်ကီးသုလိၤကမၣ်တၢ်လီၤ”န့ၣ်လီၤ. လၢခံဒီး ကစၢ်ယ့ၣ်ၡူး စံးဆၢဝဲ စီၤပ့းတရူးအတၢ်သံကွၢ် လၢအမ့ၢ်ပကဘၣ်ပျၢ်ပှၤဂၤအတၢ်ဒဲးဘး ပှဲၤစု (ပှဲၤဘျီ)လဲၣ်န့ၣ်ဒီး “ယတစံးဘၣ် တုၤအပှဲၤထီၣ်နွံစုဘၣ်, မ့ၢ်တုၤ အပှဲၤထီၣ် နွံစုအဘျီနွံဆံလီၤ”. လူၤ၂၃:၃၄ အပူၤ ပကထံၣ်ဘၣ် ကစၢ်ယ့ၣ်ၡူး ဒုးနဲၣ်ဝဲ တၢ်ပျၢ် ပှၤဂၤအတၢ်ဒဲးဘး လၢအဘၣ်ကစၢ်ယွၤအသး ဖဲထူၣ်စုညါအလိၤ ဃ့ဘါထုကဖၣ်ဝဲ “ပၢ်ဧၢ, ပျၢ်အတၢ်ဒဲးဘးတက့ၢ်, အဂ့ၢ်ဒ်အံၤ, မ့ၢ်အမၤဝဲ ဒ်လဲၣ်ဒ်လဲၣ်န့ၣ်, တသ့ၣ်ညါဘၣ်”န့ၣ်လီၤ.
ဖဲပှၤမၤကမၣ်တၢ်ဒီး ပှၤပျၢ်အတၢ်ဒဲးဘးခံဖုလိာ် မ့ၢ်တုၤဃီၤဆူတၢ်မၤဘျါမၤဟါမၢ်ကွံာ် တၢ်သးဆါဒီး က့ၤဘၣ်လိာ်ဘၣ်စးလၢ တၢ်ရ့လိာ်ဘၣ်ထွဲသးန့ၣ်ဒီး တၢ်မၤအသးအံၤ ပသ့ၣ်ညါနၢ်ပၢၢ်သ့လၢ အမ့ၢ်တၢ်ပျၢ်ပှၤဂၤအတၢ်ဒဲးဘး အလၢပှဲၤကတၢၢ်န့ၣ်လီၤ. တၢ်ပျၢ်တၢ်ကမၣ်အံၤ တပဲာ်ထုးထီၣ်ကွံာ် တၢ်လၢ အမၤဘၣ်ဒိဆါတ့ၢ်တၢ်, မ့တမ့ၢ် ဘၣ်ဒီး တၢ်ဃုထံၣ်သ့ၣ်ညါကျိၤကျဲလၢ ကဘှါဂ့ၤထီၣ်က့ၤ တၢ်ရ့လိာ်ဘၣ်ထွဲလိာ်သးတဖၣ် လၢအအိၣ်ဒီး တၢ်သူၣ်ဆါသးဆါဒီး တၢ်ရ့လိာ်ဘၣ်ထွဲလိာ်သး လၢအတဂ့ၤတဖၣ်အဂီၢ်,တၢ်အိၣ်အသး မၤအသးအံၤ ကဆှၢပှၤခံဖုအံၤဆူ တၢ်ဘၣ်လိာ်ဘၣ်စး ဒီးကဒုးကဲထီၣ်တၢ်အုၣ်အသးလၢ ကစၢ်ယွၤအတၢ်အဲၣ်ဒီး အစိကမီၤအဂီၢ်န့ၣ်လီၤ. လၢကစၢ်ယွၤ အလၤကပီၤအဂီၢ် မ်ပကဃုသကိး ကျဲအကျိၤအကွၢ်လၢ ပကမၤလဲၣ်ထီၣ် ပတၢ်ပျၢ် ပှၤဂၤအတၢ်ဒဲးဘးဆူ ပှၤဂၤအအိၣ်န့ၣ်တက့ၢ်.
