စၤရါန့ၣ် အမိၢ်သံအခါ အိၣ်ဒ်ဒၣ် ၁၄ နံၣ်ဖိဒီး တယံၢ်ဘၣ် အဟံၣ်စ့ၢ်ကီး ဘၣ်ဆါကွံာ်ဝံၤ အဒီပုၢ်ဝဲၢ်ဖိတဖၣ် ကဲထီၣ် ပှၤဟံၣ်တအိၣ်ဃီတအိၣ်ဖိတဖၣ်န့ၣ်လီၤ. နံၣ်တဖၣ်လဲၤပူၤကွံာ်ဝံၤ စၤရါန့ၣ် အဲၣ်ဒိးကျဲၤန့ၢ်အဖိတဖၣ်အဂီၢ် တၢ်န့ၢ်သါလၢခါဆူညါအဂီၢ် ဒ်သိးအကဟ့ၣ်ခီလီၤ ဖိစိၤလံၤစိၤန့ၣ်လီၤ. အဝဲဂုာ်ကျဲးစၢၤမၤဝဲတၢ်ဖံးတၢ်မၤတဖၣ် ဒ်သိးကပှ့ၤန့ၢ်ဟံၣ်တဖျၢၣ်, ဒီးကဟ့ၣ်ဝဲအဟံၣ်ဖိဃီဖိတဖၣ် ဟံၣ်အဂၢၢ်အကျၢၢ် တဖျၢၣ် တၢ်တမံၤလၢ တန့ၢ်ဘၣ်ဝဲ နီတဘျီဘၣ် လၢအတၢ်အိၣ်မူပူၤန့ၣ်လီၤ.
တၢ်ပာ်ဖှိၣ်ပၢနုာ်လီၤ စ့လၢဟံၣ်ဃီပနံာ်တၢ်ကၤ (တၢ်ပှ့ၤ/ဆါဟံၣ်) လၢခါဆူညါ ဖိစိၤလံၤစိၤအဂီၢ်န့ၣ် မ့ၢ်ဒၣ်တၢ်စူၢ်တၢ်နာ် အတၢ်မၤတမံၤန့ၣ် မ့ၢ်နတသ့ၣ်ညါဘၣ်န့ၣ်ဧါ. ယံး၃၂:၆-၁၂အပူၤ ကစၢ်ယွၤစံးဘၣ် ဝံယံးရမံယၤလၢ အကပှ့ၤန့ၢ် ဟီၣ်ခိၣ်လီၢ် တချုးဖဲ ပှၤဘၤဘူၤလိၣ်ဖိတဖၣ် ဟဲနုာ်လီၤဒုးန့ၢ် ဝ့ၢ်ယရူၤၡလ့ၣ်လၢ တၢ်စုဆူၣ်ခီၣ်တကးအပူၤန့ၣ်လီၤ. ဝံအဂီၢ် ကစၢ်ယွၤအတၢ်ကတိၤအံၤ အခီပညီတအိၣ်အါအါဘၣ်. မ့ၢ်လၢတယံၢ်ဘၣ် အဆၢကတီၢ်န့ၣ် ကယဲၢ်တၢ်အိၣ်လၢ ယွၤအပှၤဂီၢ်မုၢ်တဖၣ် အတၢ်ခဲလၢာ်န့ၣ် ကဘၣ် တၢ်ဟံးန့ၢ်အီၤန့ၣ်လီၤ.
ဘၣ်ဆၣ် ယံး၃၂:၄၂အပူၤ ကစၢ်ယွၤအၢၣ်လီၤ ဝံယံးရမံယၤလၢ “အဂ့ၢ်ဒ်အံၤ, ယွၤစံးဒ်အံၤ, ဒ်ယဒုးဘၣ်ပှၤဂီၢ်မုၢ်အံၤ လၢတၢ်အၢဖးဒိၣ်အံၤခဲလၢာ်အသိးန့ၣ် ယကဒုးဘၣ်အီၤ လၢကယဲၢ်တၢ်ဂ့ၤ လၢယစံးဘၣ်အီၤ ဒ်န့ၣ်အသိးခဲလၢာ်လီၤ”န့ၣ်လီၤ. တၢ်လၢ ဝံပှ့ၤန့ၢ် ဟီၣ်ခိၣ်လီၢ်အံၤ မ့ၢ်နီၢ်ခိတၢ်ပနီၣ်လၢကစၢ်ယွၤအတၢ်တီတၢ်လိၤ ဒ်အမ့ၢ် မုၢ်တနံၤကစၢ်ယွၤ ကဒုးအိၣ်ဂၢၢ်ဆိးကျၢၢ် ပှၤအံၣ်စရ့လးဖိတဖၣ် လၢအတၢ်လီၢ်တၢ်ကျဲန့ၣ်လီၤ. လၢတၢ်ဟဲဒုးန့ၢ်မၤအၢမၤသီနးနးကလဲၣ် အဆၢကတီၢ်အပူၤဒၣ်လဲၣ် ယံး ၃၂:၄၃-၄၄ အပူၤ ကစၢ်ယွၤအၢၣ်လီၤ အပှၤဂီၢ်မုၢ်လၢ အကဒုးအိၣ်ထီၣ်ကဒီးက့ၤ တၢ်မုာ်တၢ်ပၢၤ – ဟံၣ်ဒီး ဟီၣ်ခိၣ်လီၢ်တဖၣ် ကဘၣ် တၢ်ပှ့ၤအီၤဆါအီၤ ကဒီးတဘျီန့ၣ်လီၤ.
မုၢ်မဆါတနံၤအံၤ, ပသန့ၤဒီးနာ် ကစၢ်ယွၤအတၢ်တီတၢ်လိၤ ဒီးဃုထၢပာ်လီၤ ပတၢ်စူၢ်တၢ်နာ်လၢ ကစၢ်ယွၤအပူၤသ့ဝဲဒၣ်န့ၣ်လီၤ. လၢဟီၣ်ခိၣ်ချၢအံၤ ကယဲၢ်တၢ်မၤအသးခဲလၢာ်န့ၣ်, ဘၣ်တၢ်ကပာ်ကဒါက့ၤအီၤ ဒ်အလီၢ်လီၢ်, ဒ်အသီအသိးတဘျီဧါန့ၣ် ပထံၣ်နၢ်ပၢၢ် တသ့သနၣ်က့, တၢ်လၢအလီၤတံၢ်လၢပဂီၢ်တမံၤ မ့ၢ်ဒၣ်မုၢ်တနံၤ ကစၢ်ယွၤ ကမၤဘၣ်လိာ် ဘၣ်စးက့ၤ တၢ်ခဲလၢာ်န့ၣ်လီၤ.
