ရှ့ယံၣ်(Shin Yi) လၢအသးအိၣ် (၂ဝ) နံၣ်တဂၤ ဖဲအခိးလၢကနုာ်လီၤဘၣ် ဖၠၣ်စိမိၤန့ၣ် အဝဲပာ်လီၤအသးလၢ တၢ်အိၣ်ဘှံးသၢလါကတီၢ် အဝဲကမၤတၢ်လၢ သးစၢ်မ့းၡၢၣ်အတၢ်ကရၢကရိတခါလီၤ. တၢ်တမံၤအံၤဖျါလၢ မ့ၢ်ဆၢကတီၢ်လီၤဆီ ဖဲကိၣ်ဘံး-၁၉ အိၣ်ဒီး အတၢ်ဘျၢတဖၣ်လၢ တၢ်ထံၣ်လိာ်သးလၢ မဲာ်သကိးမဲာ် တညီဘၣ်အဆၢကတီၢ်လီၤ. ဘၣ်ဆၣ် တယံာ်ဘၣ်န့ၣ် ရှ့ယံၣ်ထံၣ်န့ၢ်ကျဲလီၤ. အဝဲဟ့ၣ်နီၤတဲဖျါဝဲ, “ယထံၣ်လိာ်ဒီး ကၠိဖိတဖၣ် ဖဲကျဲမုၢ်တဖၣ်အလိၤ, လၢတၢ်ဆါတၢ်ပှ့ၤကျးဖးဒိၣ်တဖၣ်အပူၤ, ဒီးလၢတၢ်အီၣ်အကျးတဖၣ် ဒ်ညီနုာ်ပထံၣ်အသိးတသ့နာ်သက့, ဘၣ်ဆၣ် ပဆဲးကျိးဒီးခရံာ်ဖိကၠိဖိတဖၣ် ခီဖျိ ‘zoom’ ဒီးထုကဖၣ်န့ၢ်လိာ်သးဒီး ပှၤလၢတနာ်ဒံးတၢ်တဖၣ်ဒၣ်လဲာ် လၢကွဲၤဒီနၢ်သ့ဝဲလီၤ.”

ရှ့ယံၣ်မၤဝဲတၢ် ဒ်စီၤပီလူးတဲဝဲအသိး လၢကမၤ “ပှၤစံၣ်တဲၤတဲလီၤတၢ်သးခုကစီၣ်အတၢ်မၤ”လီၤ (၂တံၤ ၄:၅). စီၤပီလူးဟ့ၣ်ပလီၢ်ဝဲလၢ ပှၤကညီတဖၣ် ကဃုသရၣ်တဖၣ် လၢကတဲအဝဲသ့ၣ်တၢ်ဒ်အဘၣ်အဝဲသ့ၣ်အသးအသိးဒီး တမ့ၢ်ဘၣ်တၢ်လၢ အဝဲသ့ၣ်ကြၢးနၢ်ဟူဘၣ်ဝဲဒၣ်န့ၣ်လီၤ (:၃-၄). ဘၣ်ဆၣ် စီၤတံၤမသ့း ဘၣ်တၢ်ကိးအီၤ ဒ်သိးကပာ်ဆူၣ်သးဒီး “ကျဲးစၢးလၢတၢ်အကတီၢ်ဘၣ် ဒီးလၢတဘၣ်ဘၣ်”လီၤ. အဝဲ ကဘၣ်, “မၤဖျါပှၤအတၢ်ကမၣ်, သိၣ်ဃီၣ်တၢ်ဒီးသဆၣ်ထီၣ်တၢ်” – အိၣ်ဒီးတၢ်ဝံသးစူၤခဲလၢာ် ဒီးသိၣ်သီတၢ်လၢ တၢ်ပလီၢ်သးအပူၤလီၤ (:၂).

ပဝဲကိးဂၤ တဘၣ်တၢ်ကိးပှၤ ဒ်သိးပကကဲထီၣ် ပှၤမၤတၢ်သးခုကစီၣ်ဒီး ပှၤစံၣ်တဲၤတဲလီၤတၢ် နာ်သက့ ပဝဲတဂၤစုာ်စုာ် ပမၤသကိးပဝဲဒ်လၢ တၢ်ဟ့ၣ်ခီဟ့ၣ်နီၤ ပတၢ်နာ်ဒီးပှၤလၢပဃၢၤတဖၣ်သ့လီၤ. ပှၤတနာ်တၢ်တဖၣ် ဟးဂီၤကွံာ် မ့ၢ်လၢတအိၣ်ဒီးခရံာ်အဃိလီၤ. ပှၤနာ်တၢ်တဖၣ်တခီ လိၣ်တၢ်မၤဆူၣ်ထီၣ်က့ၤဒီး တၢ်ဟ့ၣ်ဂံၢ်ဟ့ၣ်ဘါအဝဲသ့ၣ်လီၤ. ခီဖျိယွၤအတၢ်မၤစၢၤန့ၣ် မ်ပတဲဖျါထီၣ် အတၢ်သးခုကစီၣ် တဘျီလၢ်လၢ် ဒီးတပူၤလၢ်လၢ် ဖဲပလဲၤသ့တက့ၢ်.