ခရ့းရှဲၣ် ဖူလံးစံး(Christian Pulisic) မ့ၢ်ပှၤလိာ်ကွဲဖျၢၣ်ထူတဂၤ ဒီးဘၣ်ကွၢ်ဆၢၣ်မဲာ်ဝဲ နီၢ်ခိတၢ်ဘၣ်ဒိဘၣ်ထံးအါဘျီအဃိ ကဲထီၣ် တၢ်ကီတၢ်ခဲ လၢတၢ်လုၢ်အီၣ်အသးသမူ အတၢ်ဖံးတၢ်မၤန့ၣ်လီၤ. ဖဲအသ့ၣ်ညါဝဲဒၣ်လၢ ပှၤကလိာ်ကွဲဝဲ “Champions League semifinals”အဂီၢ် ပှၤကဘၣ်စးထီၣ်လိာ်ကွဲတၢ်ဖိတဖၣ်အကျါ အမံၤတပာ်အဃိ အသးဟးဂီၤဘၣ်ဆၣ် အဝဲစံးကတိၤပာ်ဖျါထီၣ်ကစၢ်ယွၤ နဲၣ်ဖျါထီၣ်ဆူအအိၣ်ဒ်လဲၣ်အဂ့ၢ်န့ၣ်လီၤ. အဝဲစံးဝဲဒၣ် ဒ်ညီနုာ်အသိး “ယယူာ်ထီၣ်ယသးဆူကစၢ်ယွၤအအိၣ် ဒီးထီဘိန့ၣ် ယွၤဟ့ၣ်ဆူၣ်ထီၣ် ယဂံၢ်ယဘါအဃိ ဒီးယပလၢၢ်ဘၣ် ဒ်သိးပှၤတဂၤဂၤ အိၣ်ဒီးယၤထီဘိန့ၣ်လီၤ. ယမ့ၢ်တပလၢၢ်ဘၣ်ဒ်သိးအံၤန့ၣ်ဒီး ယကဘၣ်မၤဒ်လဲၣ်န့ၣ် ယဆိကမိၣ်တထီၣ်ဘးလၢၤဘၣ်န့ၣ်လီၤ. လၢခံဘၣ်နုာ်လီၤလိာ်ကွဲဝဲဒၣ်လၢ ပှၤဂၤအလီၢ်အဆၢကတီၢ်န့ၣ် အဝဲလိာ်ကွဲဝဲ အဂ့ၤကတၢၢ် ဒီးမၤစၢၤအပှၤလိာ်ကွဲသကိးတၢ် ဒ်သိးကထူနုာ်ဖျၢၣ်ထူ လၢတၢ်မၤနၢၤတၢ်လိာ်ကွဲအဂီၢ်န့ၣ်လီၤ. ဒီးအဝဲသ့ၣ်ဒိးန့ၢ်ဝဲ တၢ်လီၢ်တလီၢ် လၢကဘၣ်လိာ်ကွဲ final အဂီၢ်န့ၣ်လီၤ. တၢ်လဲၤခီဖျိအံၤ သိၣ်လိအီၤလၢ တၢ်မၤလိလုၢ်ဒိၣ်ပှ့ၤဒိၣ်တမံၤန့ၣ်လီၤ. ပတၢ်ဂံၢ်စၢ်ဘါစၢ်တဖၣ်န့ၣ် ပကွၢ်ထံဆိကမိၣ်အီၤသ့ဝဲဒၣ် ဒ်အမ့ၢ် အတၢ်ခွဲးတၢ်ယာ်တဖၣ်လၢ ကစၢ်ယွၤ ကပာ်ဖျါထီၣ်အစိအကမီၤ လၢပထိၣ်တဲာ်ထိၣ်ဒွး တသ့ဘၣ်န့ၣ်လီၤ.

ဖဲပဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲအဆၢကတီၢ် ဟီၣ်ခိၣ်အံၤ သိၣ်လိပှၤလၢ ပကဘၣ်သန့ၤလီၤ ပသးလၢ ပနီၢ်ကစၢ် ပဂံၢ်ပဘါဒၣ်ပဝဲန့ၣ်လီၤ. ဘၣ်ဆၣ်, (၂ကရံၣ် ၁၂:၉) အပူၤ ကစၢ်ယွၤကလုၢ်ကထါတၢ်ကူၣ်သ့ သိၣ်လိပှၤလၢ ယွၤတၢ်ဆိၣ်ဂ့ၤဒီး အစိကမီၤဟ့ၣ်ပှၤ တၢ်ဂံၢ်တၢ်ဘါလၢ ပတၢ်ဂုာ်ကျဲးစၢးလဲၤလၢ တၢ်ဒိၣ်ဒိၣ်မုာ်မုာ်အဂီၢ်န့ၣ်လီၤ. လၢတၢ်န့ၣ်အဃိ, ပကဘၣ်သ့ၣ်ညါတ့ၢ်တၢ်လၢ ပတဘၣ်ကွၢ်ဆၢၣ်မဲာ် တၢ်မၤကွၢ်တဖၣ် ထဲတဂၤဧိၤ နီတဘျီဘၣ်. ဒီးပကလဲၤတၢ်ဆူညါလၢ တၢ်နာ်န့ၢ်လီၤသးအပူၤ သ့ဝဲဒၣ်န့ၣ်လီၤ. အဆၢဖိ ၉-၁၀ စံးဘၣ်ပှၤလၢ ပ“တၢ်ဂံၢ်စၢ်ဘါစၢ်တဖၣ်” ကဲထီၣ်တၢ်ခွဲးတၢ်ယာ် လၢကစၢ်ယွၤကလီၣ်ဖျါထီၣ် အစိကမီၤ အတၢ်ဟ့ၣ်ဂံၢ်ဟ့ၣ်ဘါပှၤ ဒီးအတၢ်မၤဂ့ၤမၤစၢၤပှၤတဖၣ်အဂီၢ်န့ၣ်လီၤ. တၢ်မ့ၢ်မၤအသးဒ်သိးအံၤန့ၣ်ဒီး ခီဖျိလၢ ပတၢ်ဂုာ်ကျဲးစၢးတၢ်တဖၣ်အံၤအပူၤန့ၣ် ပကဟ့ၣ်ထီၣ် ပကစံးဘျုးစံးဖှိၣ် စံးထီၣ်ပတြၢၤကစၢ်ယွၤ အတၢ်မၤဂ့ၤတၢ်တဖၣ် ဒီးပကဟ့ၣ်ခီဟ့ၣ်နီၤလီၤ ပတၢ်လဲၤခီဖျိတဖၣ်လၢ ပှၤဂုာ်ပှၤဂၤ ဒ်သိးအဝဲသ့ၣ်ကလဲၤခီဖျိ ပလၢၢ်ဘၣ် ယွၤအတၢ်အဲၣ်အဂီၢ်န့ၣ်လီၤ.