ဖဲယမ့ၢ်ဖိသၣ်အကတီၢ်, ယဟံၣ်ကပၤ ကမျၢၢ်ဖီကရၢၢ်အပူၤ, ပှၤပာ်ဒုးနဲၣ်သုးသိလ့ၣ်ထဲး (Tank) လၢပှၤစူးကါအီၤလၢ ဟီၣ်ခိၣ်ဒီဘ့ၣ် တၢ်ဒုးတၢ်ယၤ ဖးဒိၣ်ခံဘျီတဘျီအပူၤတခိၣ်န့ၣ်လီၤ. တၢ်ပနီၣ်အိၣ် တဘျုးထံၣ်လၢ အဟ့ၣ်ပလီၢ် တၢ်ဘၣ်ယိၣ်လၢ ပှၤကလဲၤထီၣ်လိၣ်ကွဲ လၢသိလ့ၣ်လိၤအဂီၢ်န့ၣ်လီၤ. ဘၣ်ဆၣ် ယတံၤသကိးခံဂၤန့ၣ် စွါထီၣ်ဝဲဆူ သိလ့ၣ်ထဲးလိၤ တကီၢ်ခါန့ၣ်လီၤ. ပဝဲတနီၤ ပသးတဆူၣ်လဲၤထီၣ် ဘၣ်ဆၣ် အကတၢၢ်န့ၣ် ပလဲၤထီၣ်လိၣ်ကွဲဃုာ်ဒီး အဝဲသ့ၣ်န့ၣ်လီၤ. ပိာ်ခွါဖိတဂၤ နဲၣ်အစုဆူ တၢ်ပနီၣ် ဘ့ၣ်ဘၣ်လိၤ ဒီးတလဲၤထီၣ်ဝဲဒၣ်ဘၣ်, ဖိသၣ်တဂၤန့ၣ် ဖဲပှၤသးပှၢ်တဂၤ ဟဲဘူးထီၣ်လၢ တၢ်လီၢ်အံၤ အဆၢကတီၢ် စံၣ်လီၤဝဲဒၣ်ချ့ချ့န့ၣ်လီၤ. တၢ်လ့ပစီလၢ အမၤမုာ်မၤဖှံပသးန့ၣ်, ဒိၣ်န့ၣ်အါန့ၣ် ပတၢ်သးအိၣ်လူၤထွဲပိာ်ထွဲ တၢ်သိၣ်တၢ်သီတၢ်ဘျၢန့ၣ်လီၤ.
သးတဖျၢၣ်လၢ အဲၣ်ဒိးထီဒါတၢ်ဒ်ဖိသၣ်အသိးန့ၣ်, လၢတၢ်ခူသူၣ်အပူၤ အိၣ်ဝဲဒၣ်လၢ ပပူၤကိးဂၤဒဲးန့ၣ်လီၤ. ပတအဲၣ်ဒိးတူၢ်လိာ် ပှၤကဟဲစံးဘၣ်ပှၤလၢ နကဘၣ် မၤတၢ်မနုၤ, မ့တမ့ၢ်ဘၣ်ဒီး နတဘၣ် မၤတၢ်မနုၤသ့ၣ်တဖၣ်န့ၣ်လီၤ. ဘၣ်ဆၣ် ဖဲပဖးဘၣ် ယၤ ၄:၁၇ စံးဘၣ်ပှၤလၢ, ဖဲပသ့ၣ်ညါတၢ်လၢ ပဂ့ၤမၤဒီး ပမ့ၢ်တမၤအီၤန့ၣ် မ့ၢ်တၢ်ဒဲးဘးလီၤန့ၣ်လီၤ. ရိ ၇:၁၉-၂၀ အပူၤန့ၣ် တၢ်မၢဖိစီၤပီလူး ကွဲးပာ်ဖျါဝဲ “တၢ်ဂ့ၤလၢယဆၢန့ၣ်, ယတမၤဘၣ်, မ့မ့ၢ်တၢ်အၢလၢ ယတဆၢဘၣ်န့ၣ်, ယမၤလီၤ, ဘၣ်ဆၣ်ဒီး တၢ်လၢယတဆၢဘၣ်န့ၣ်, ယမ့ၢ်မၤဒီး, တမ့ၢ်လၢၤဘၣ် ယမၤယဲဘၣ်, မ့ၢ်တၢ်ဒဲးဘးလၢ အအိၣ်ဝဲဆိးဝဲလၢ ယပူၤလီၤ”န့ၣ်လီၤ.
ဒ်ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ်အသိးန့ၣ်, ဘၣ်ဃးဒီး ပတၢ်ဂုာ်ကျဲးစၢၤ ဂဲၤလိာ်သး ဒီးတၢ်ဒဲးဘးန့ၣ် ကမ့ၢ်တၢ်ဂ့ၢ်ကီလၢ ပဂီၢ်န့ၣ်လီၤ. ဘၣ်ဆၣ်ဒီး အါစုအါဘျီန့ၣ် ပသန့ၤပသးထဲဒၣ်လၢ ပကစၢ်အဂံၢ်အဘါဒၣ်ဝဲအလိၤ, လၢပကမၤတၢ်လၢအဂီၢ်န့ၣ်လီၤ. မုၢ်တနံၤ ဖဲတၢ်အိၣ်မူလၢ ဟီၣ်ခိၣ်အံၤဝံၤအဆၢကတီၢ်, ပတစံးဆၢမၤဆၢက့ၤ တၢ်ဒဲးဘးအတၢ်သးဆှၢပှၤတဖၣ် အပူၤ လၢၤဘၣ်န့ၣ်လီၤ. တချုးလၢတၢ်မၤအသးတုၤလီၤဝဲ အဆၢကတီၢ်, ပသန့ၤလီၤပသးလၢ ကစၢ်ယ့ၣ်ရှူးလၢအတၢ်သံ, ဒီးအတၢ်ဂဲၤဆၢထၢၣ်သမူထီၣ်က့ၤတၢ်န့ၣ် မၤနၢၤတ့ၢ်လံ တၢ်ဒဲးဘးတဂၤ အစိကမီၤပူၤသ့ဝဲဒၣ်န့ၣ်လီၤ.
