ပှၤတသ့ၣ်ညါ အဝဲသ့ၣ်အသးအနံၣ်အလါလီၤတံၢ်လီၤဆဲးဘၣ်. တဂၤန့ၣ် ဘၣ်တၢ်ထံၣ်န့ၢ်အီၤလၢ တၢ်ဘါယွၤသရိာ်အဃီသွါတဖၣ်အလိၤဒီး အတဂၤန့ၣ် သ့ၣ်ညါဝဲဒၣ်ထဲလၢ ဘၣ်တၢ်လုၢ်ဒိၣ်ထီၣ်အီၤလၢ ဖံဝါတဖၣ်န့ၣ်လီၤ. ဟဲၣ်လံနၣ်(Halina) ဒီးခရ့းစတံနၢ် (Krystyna) ခံဂၤန့ၣ် အိၣ်ဖျဲၣ်ထီၣ်ဝဲလၢ ကီၢ်ဖိလဲၣ်(Poland) ဖဲဟီၣ်ခိၣ်ဒီဘ့ၣ် တၢ်ဒုးဖးဒိၣ် ခံဘျီတဘျီ အကတီၢ်န့ၣ်လီၤ. လၢအနံၣ် ၈၀ အတီၢ်ပူၤ တဂၤဒီး တဂၤ အဂ့ၢ်န့ၣ် အဝဲသ့ၣ် တသ့ၣ်ညါလိာ်အသးဘၣ်. လၢခံ တၢ်မၤကွၢ် ဒံၢ်အဲ(န)အ့ၣ်(DNA)အစဲတဖၣ် ဖျါလၢ အဝဲသ့ၣ်ခံဂၤ မ့ၢ်ဒီပုၢ်ဝဲၢ်မုၣ်တဖၣ် ဒီးအဝဲသ့ၣ်ပာ်ဖှိၣ်ထံၣ်လိာ်က့ၤအသးလၢ တၢ်သးခုအပူၤန့ၣ်လီၤ. တၢ်အစဲပာ်ဖျါစ့ၢ်ကီးလၢ အတၢ်ဟဲလီၤစၢၤ လၢပှၤယူဒၤဖိတဖၣ်အဃိ တၢ်ဂ့ၢ်အံၤ ဒုးနၢ်ပၢၢ် ပှၤလၢ ဘၣ်မနုၤအဃိ အဝဲသ့ၣ် ဘၣ်တၢ်စူးကွံာ်ညိကွံာ်အီၤလဲၣ်န့ၣ်လီၤ. ပှၤအၢပှၤသီတဖၣ် ပာ်ပနီၣ်ဖိသၣ်မုၣ်ဖိတဖၣ်အံၤ လၢကဘၣ်သံဝဲ, မ့ၢ်ဒၣ်ထဲလၢ အဝဲသ့ၣ်အတၢ်မ့ၢ်တၢ်အဃိ န့ၣ်လီၤ.
ဖဲပထံၣ်မှံ မိၢ်လၢအပျံၤတၢ်တဂၤအံၤ မ့ၢ်လၢဖိတဖၣ် သးသမူအတၢ်ဘၣ်ယိၣ်အိၣ်ဝဲ အဃိဘၣ်လဲၤစူးကွံာ်ဖိတဖၣ်လၢ တၢ်လီၢ်တတီၤ, ဖဲလၢတၢ်ကမၤပူၤမၤဖျဲးအသးသမူအဂ့ၢ်အံၤန့ၣ်ဒီး ဘၣ်သ့ၣ်သ့ၣ် စီၤမိၤရှ့အဂ့ၢ် ကဟဲနုာ်လီၤဆူ ပတၢ်ဆိကမိၣ်အပူၤန့ၣ်လီၤ. ဒ်အမ့ၢ် ပှၤဧ့ၤဘြံၤပိာ်ခွါဖိတဂၤအဃိ, ကဘၣ်တၢ်မၤသံအီၤအဂီၢ် ဘၣ်တၢ်ပာ်ပနီၣ်အီၤလံန့ၣ်လီၤ(ကွၢ် ၂ မိၤ ၁:၂၂). ၂ မိၤ ၂:၃ ပာ်ဖျါဝဲ လၢတၢ်ကူၣ်ကျဲၤ လီၤဆီန့ၣ် စီၤမိၤရှ့ အမိၢ်န့ၣ် လဲၤပာ်အီၤလၢ ထံမိၢ်ပှၢ် နဲ(လ) (Nile)အပူၤဒီး ဟ့ၣ်အီၤ တၢ်ခွဲးတၢ်ယာ်လၢကအိၣ်မူဘၣ်ဝဲအဂီၢ်န့ၣ်လီၤ. ယွၤအိၣ်ဒီး တၢ်တိာ်ကျဲၤတမံၤလၢ ကအုၣ်က့ၤခီၣ်က့ၤ အပှၤဂီၢ်မုၢ် ခီဖျိ လၢစီၤမိၤရှ့ အဂ့ၢ်န့ၣ် မိၢ်တဂၤအံၤ တမ့ၢ်ကဆိကမိၣ် မံမီၢ်ဝဲဒၣ်ဘၣ်န့ၣ်လီၤ.
စီၤမိၤရှ့အဂ့ၢ်န့ၣ် ဒုးနဲၣ်ပှၤဆူ ကစၢ်ယ့ၣ်ရှူးအဂ့ၢ်အကျိၤန့ၣ်လီၤ. ဒ်ဖၤရိၤဃုမၤသံ ပှၤဧ့ၤဘြံၤဖိသၣ် ပိာ်ခွါတဖၣ်အသိးန့ၣ် စီၤပၤဟ့ၤရိာ်ဟ့ၣ်လီၤ အကလုၢ်လၢတၢ်ကမၤသံကွၢ်ကယဲၢ်ဖိသၣ်ပိာ်ခွါလၢ အီနုၢ်ဖိခဲလၢာ် လၢဝ့ၢ်ဘ့ၤသလ့ဃ့ၣ်အပူၤန့ၣ်လီၤ (ကွၢ်ဖဲ မး ၂:၁၃-၁၆).
တၢ်သူၣ်ဟ့သးဟ့တၢ် ဒ်သိးအံၤခဲလၢာ်အလီၢ်ခံ – လီၤဆီဒၣ်တၢ် လၢဖိသၣ်တဖၣ်အလိၤန့ၣ် ပှၤအိၣ်ဝဲဒၣ် ပဒုၣ်ပဒါမုၣ်ကီၤလံၢ်န့ၣ်လီၤ. တၢ်စုဆူၣ်ခီၣ်တကး ဒ်သိးအံၤန့ၣ် လၢကစၢ်ယွၤအဂီၢ် တၢ်လၢအလီၤဆီ, အလီၤကမၢကမၣ်တမံၤဘၣ်. ယွၤအိၣ်ဒီးတၢ်တိာ်ကျဲၤလၢ စီၤမိၤရှ့အဂီၢ်ဒီး ပဝဲနၤယၤအဂီၢ်န့ၣ်လီၤ. ကစၢ်ယွၤဒုးနဲၣ်ဖျါထီၣ် အတၢ်တိာ်ကျဲၤအဒိၣ်ကတၢၢ်တမံၤ, လၢအမ့ၢ် တၢ်ကအုၣ်က့ၤခီၣ်က့ၤဒီး တၢ်ပာ်တီပာ်လိၤက့ၤပှၤတဖၣ်လၢ တဘျီအမ့ၢ်တ့ၢ်လံအဒုၣ်အဒါတဖၣ်အဂီၢ် ခီဖျိလၢအဖိခွါကစၢ်ယ့ၣ်ရှူးခရံာ်န့ၣ်လီၤ.
