တၢ်ဟံးစုကွၢ်မဲၥ်စံးတၢ်န့ၢ် အိၣ်ဒီးတၢ်အခီပညီအါမးန့ၣ်လီၤ. ဖဲ ၁၉၆၃ နံၣ်, လါမၢ်ရှး မုၢ်နၤတနၤန့ၣ်, ပှၤလိာ်ကွဲ ခီလ့ၣ်ကၠိဖျၢၣ်သွ့ခံဖုအကျါ, ပှၤသူဖံးဖိတဂၤ ဒီးပှၤဝါဖံးဖိတဂၤ ခီဖျိလၢ အဝဲသ့ၣ် တတူာ်လိာ်ဝဲ တၢ်နီၤဖး ပှၤကလုၢ်အဒူၣ်အဆၢ, တၢ်သးဟ့အဃိ ဒီးဟံးစုကွၢ်မဲၥ်လိၥ်သးအဂ့ၢ်န့ၣ်, ကဲထီၣ်တၢ်မးနီၣ် လၢကီၢ်စဲၢ်မ့းစ့းစပံၣ်(Mississippi) အတၢ်စံၣ်စိၤတဲစိၤအပူၤ အဆိကတၢၢ်တဘျီ ဒ်အမ့ၢ် ပှၤဝါဖံးဖိတၢ်လိၥ်ကွဲဖျၢၣ်သွ့တဖုဒီးပှၤဝါဖံး ပှၤသူဖံးဖိတဖၣ် ပာ်ဖှိၣ်ထီၣ်အသးတဖု လိာ်ကွဲပြၢလိၥ်သးန့ၣ်လီၤ. ထံလီၢ်ကီၢ်ပူၤ တၢ်ပြၢအပူၤ “တၢ်လိၣ်ကွဲလၢ တၢ်ဆီတလဲအဂီၢ်”အံၤ ကီၢ်စဲၢ်မ့းစ့းစပံၣ် ပှၤလိာ်ကွဲတၢ်ဖိတဖၣ် ကဘၣ်လိာ်ကွဲ ပြၢအသးဒီး, လိၣ်ယိၣ်လၣ်ဖၠၣ်စိမိၤ(Loyola University) လၢဝ့ၢ်ခၠံၣ်ကၣ်ကိၢ် (Chicago) န့ၣ်လီၤ. ကီၢ်စဲၢ်မ့းစ့းစပံၣ် အပှၤလိၥ်ကွဲတၢ်ဖိတဖၣ် ပဒ့ၣ် ဟးဆှဲးန့ၣ်ဝဲ ကွီၢ်ဘျီၣ် တၢ်ဟ့ၣ်လီၤအကလုၢ် ဒ်သိးပှၤလိာ်ကွဲတၢ်ဖိတဖၣ် တလိာ်ကွဲဘၣ်ဝဲလၢ တၢ်ပြၢအဂီၢ် ခီဖျိစူးကါဝဲ ပှၤလိာ်ကွဲတၢ်ဖိတနီ လၢအကလံာ်န့ၣ် တၢ်အဂီၢ်န့ၣ်လီၤ. ဒ်န့ၣ်အသိး လိၣ်ယိၣ်လၣ် ၦၤလိၣ်ကွဲတၢ်ဖိတဖၣ်အကျါ ပှၤသူဖံးဖိတဖၣ်စ့ၢ်ကီး တူၢ်ဘၣ်ခီၣ်ဘၣ်ဝဲ တၢ်ကတိၤအၢသီ ခီဖျိကလုၢ်ဒူၣ်အတၢ်သးဟ့အပူၤ ဖဲတၢ်လိာ်ကွဲ ဒီတကတီၢ်ညါဒီး, ဘၣ်တၢ်ကွံာ်အီၤလၢ ဘုခ့ချံဒီး ထံခုၣ်ကိၣ်လိၣ် ဒီးဖဲအဝဲသ့ၣ် ဘၣ်လဲၤလိာ်ကွဲ တၢ်အဆၢကတီၢ် တဒိးန့ၢ်ဘၣ်ဝဲ တၢ်တူၢ်လိာ်မုာ်ဘၣ်န့ၣ်လီၤ.

တၢ်မၤအသးဒ်အံၤဒၣ်လဲာ်န့ၣ် ပှၤသးစၢ်တဖၣ် ပြၢလိာ်ကွဲဝဲဒၣ်န့ၣ်လီၤ. လိၣ်ယိၣ်လၣ် ရဲၣ်ဘလၣ် (Loyola Ramblers) လိာ်ကွဲနၢၤဝဲ ကီၢ်စဲၢ်မ့းစ့းစပံၣ် ထွံၣ်ဖးဒိၣ် (Mississippi State Bulldogs) လၢ ၆၁ မး-၅၁ မး, ဒီးအကတၢၢ်န့ၣ် အဝဲသ့ၣ် မၤန့ၢ် ခိၣ်ဖးတၢ လၢ NCAA ထံလီၢ်ကီၢ်ပူၤတၢ်ပြၢခိၣ်န့ၣ်လီၤ. ဘၣ်ဆၣ်တၢ်လၢအမၤနၢၤတၢ်လၢ မုၢ်နၤအံၤန့ၣ် ကမ့ၢ် တၢ်မနုၤလဲၣ်. မ့ၢ်ဝဲ တၢ်သးဟ့ သုးအသးဆူ တၢ်အဲၣ်န့ၣ်လီၤ. လူၤ ၆:၂၇ အပူၤ ကစၢ်ယ့ၣ်ၡူးသိၣ်လိတ့ၢ်ပှၤအသိး, “အဲၣ်သုဒုၣ်သုဒါတက့ၢ်, ၦၤလၢအသးဟ့သုတဖၣ်န့ၣ် မၤဂ့ၤအီၤတက့ၢ်” န့ၣ်လီၤ.

ကစၢ်ယွၤ နဲၣ်လိၤတၢ်န့ၣ် မ့ၢ်တၢ်သးသမူအတၢ်ဆီတလဲအဂီၢ်န့ၣ်လီၤ. ပကအဲၣ်ပဒုၣ်ပဒါတဖၣ် ဒ်ကစၢ်ခရံၥ်သိၣ်လိပှၤအသိးအဂီၢ်န့ၣ်, ပကဘၣ်ဒိကနၣ် အတၢ်ဟ့ၣ်လီၤအကလုၢ် လၢတၢ်ပာ်သူၣ်ပာ်သး ထီဒါတၢ်လၢ တၢ်ကဆီတလဲအသးအဂီၢ်န့ၣ်လီၤ. ၂ကရံၣ် ၅:၁၇ အပူၤ စီၤပီလူးကွဲးဝဲ “ၦၤတဂၤဂၤမ့ၢ်အိၣ်လၢခရံၥ်အပူၤဒီး မ့ၢ်အမ့ၢ်တၢ်တ့အသီလီၤ”န့ၣ်လီၤ. ဘၣ်ဆၣ်, ယွၤအကျဲအကျိအကွာ်အသီအံၤ ကမၤနၢၤဝဲ ကျိၤကျဲလီၢ်လံၤလၢပပူၤဒ်လဲၣ်. အကတၢၢ်န့ၢ် လၢတၢ်အဲၣ်တၢ်ကွံ ဒီးပဝဲတဂၤစုာ်စုာ်အပူၤ ပထံၣ်န့ၢ်ဘၣ် ကစၢ်ယွၤသ့ဝဲဒၣ်န့ၣ်လီၤ.