တၢ်မၤအသးတမံၤအံၤ ယကိးအီၤလၢ “ပျီလါဟ့”အတၢ်လီၤလးန့ၣ်လီၤ. ကိးနံၣ်ဒဲး တၢ်ကိၢ်ခါအကတီၢ် မ့ၢ်တုၤဒီး တၢ်အံၤမၤအသးအါန့ၣ် ၁၅ နံၣ်လံန့ၣ်လီၤ. တၢ်ခုၣ်ခါ အဆၢကတီၢ် မ့ၢ်လဲၤပူၤန့ၣ်ဒီး ယကရၢၢ်ပူၤ တပံၢ်တဖၣ် လီၤညွံးကွံာ်ဝဲအဃိ ညီနုာ် ပှၤလဲၤတၢ်က့ၤတၢ်တဖၣ် ကဆိကမိၣ်ဝဲလၢ တပံၢ်တဖၣ်အံၤ သံလံန့ၣ်လီၤ. ကီၢ်စဲၢ်ကိၣ်လိၣ်ရၣ်ဒိၣ် (Colorado) ကစၢ်ဒီခိၣ်လိၤ ဘှ့ၣ်ပစီၤတဖၣ် လီၤဝဲဘၣ်ဆၣ် မုၢ်ထီၣ်တကပၤ ကစၢ်လီၤဘံ အလီၢ်တဖၣ်န့ၣ် ဃ့ထီဝဲန့ၣ်လီၤ. တၢ်ကိၢ်အါအဆၢကတီၢ် တၢ်ယီၤဃ့အတၢ်ဟ့ၣ်ပလီၢ် တၢ်ပနီၣ်တဖၣ် အိၣ်ပှဲၤဝဲဒၣ်န့ၣ်လီၤ. ဘၣ်ဆၣ် ကိးနံၣ်ဒဲး ဖဲလါမ့ၤကလၢာ်ဘူးထီၣ်အကတီၢ်န့ၣ် ယဖှံလီၤရၤလီၤ ထံဒီး မၤဘၣ်စီၣ်ဟီၣ်လၢ တမ့ၢ်ထံအါအါဘၣ်. ထဲဒၣ် ထံစှၤစှၤဖိန့ၣ်လီၤ. ခံနွံအတီၢ်ပူၤ တၢ်လၢအဃ့ဒီးအဃး အလီၢ်န့ၣ် ကဲထီၣ်တၢ်လီၢ်လါဟ့တမံၤန့ၣ်လီၤ.

နီၢ်ဧိၤတပံာ်ဧိၤလၢ အလါဟ့ထီၣ်က့ၤဝဲဒၣ်အံၤ ဒုးသ့ၣ်နီၣ်ထီၣ်က့ၤယၤ လၢတၢ်ဟ့ၣ်ဂံၢ်ဟ့ၣ်ဘါတၢ်န့ၣ် မ့ၢ်တၢ်အကါဒိၣ်ထဲလဲၣ်န့ၣ်လီၤ. လၢပတၢ်အိၣ်မူဒီး ပတၢ်စူၢ်တၢ်နာ်အပူၤ တၢ်ဟ့ၣ်ဂံၢ်ဟ့ၣ်ဘါပှၤ မ့ၢ်တအိၣ်ဘၣ်န့ၣ် ကလီၤဂာ်ဒ်တၢ်အိၣ်မူလၢအသံန့ၣ်လီၤ. ဘၣ်ဆၣ် တၢ်သဆၣ်ထီၣ်, ဟ့ၣ်ဂံၢ်ဟ့ၣ်ဘါတၢ်န့ၣ် ကဲထီၣ် တၢ်ဘၣ်ဘျုး နီၢ်ခိနီၢ်သးအဂီၢ်န့ၣ် မ့ၢ်တၢ်လီၤကမၢကမၣ်တၢ်န့ၣ်လီၤ. စီၤပီလူးအတၢ်ကွဲးလံာ်ပရၢ အခီၣ်ထံးတဘ့ၣ် ဆူပှၤသ့စၤလနံၤဖိတဖၣ်အအိၣ်န့ၣ် ပာ်ဖျါဝဲ တၢ်သဆၣ်ထီၣ်, ဟ့ၣ်ဂံၢ်ဟ့ၣ်ဘါ တၢ်အဂ့ၢ်လီၤလီၤဆီဆီန့ၣ်လီၤ. ပှၤကညီတဖၣ် ဘၣ်ဂုာ်ကျဲးစၢး ဂဲၤလိာ်ဝဲ လၢတၢ်ပျံၤတၢ်ဖုး ဒီးတၢ်ဘၣ်ယိၣ်တဖၣ်အပူၤအဃိ ဒီးစီၤပီလူးသ့ၣ်ညါဝဲဒၣ်လၢ ကဘၣ် ဟ့ၣ်ဂံၢ်ဟ့ၣ်ဘါ, ဟ့ၣ်သဆၣ်ထီၣ် အဝဲသ့ၣ် အတၢ်စူၢ်တၢ်နာ်အဂီၢ်န့ၣ်လီၤ. ၁ သ့း ၅:၁၁ အပူၤ စီၤပီလူးဟ့ၣ်သဆၣ်ထီၣ် ပှၤသ့းစၤလနံဖိတဖၣ်လၢ “မၤမုာ်ထီၣ်လိာ်သုသး, ဒီးမၤထီၣ်မၤထီလိာ်သုသးသကိးသကိး” အဂီၢ်န့ၣ်လီၤ. စီၤပီလူးသ့ၣ်ညါဝဲလၢ တၢ်မၤမုာ်ထီၣ်လိာ်သး ဒ်သိးအံၤ မ့ၢ်တအိၣ်ဘၣ်ဒီး အဝဲသ့ၣ်အတၢ်စူၢ်တၢ်နာ် ကဆံးလီၤစှၤလီၤသ့ဝဲဒၣ်န့ၣ်လီၤ. တၢ်မၤအသးဒ်သိးအံၤန့ၣ် စီၤပီလူးအနီၢ်ကစၢ်ဒၣ်ဝဲ လဲၤခီဖျိဘၣ်ဝဲ အဆၢကတီၢ်, ပှၤသ့းစၤလနံ ပှၤစူၢ်က့ၤနာ်က့ၤတၢ်ဖိတဖၣ် ဟ့ၣ်ဂံၢ်ဟ့ၣ်ဘါအီၤအဃိန့ၣ်လီၤ. နၤဒီးယၤ ပအိၣ်ဒီးတၢ်ခွဲးတၢ်ယာ်တမံၤဃီၤလၢ ပကဟ့ၣ်ဂံၢ်ဟ့ၣ်ဘါတၢ်, ပကမၤဂ့ၤမၤစၢၤလိာ်သးကဒဲကဒဲ ဒ်သိး ပကဘိၣ်ထီၣ် ဖးထီၣ် ဒီးဒိၣ်ထီၣ်ထီထီၣ် အဂီၢ်န့ၣ်လီၤ.