စူ(Sue) အနီၢ်ကစၢ်ထံၣ်ဘၣ်ဝဲ အဟံၣ်ဖိဃီဖိ လီၤမုၢ်လီၤဖးဒၣ်ဝဲဒၣ်န့ၣ်လီၤ. လၢတၢ်သတူာ်ကလာ်အပူၤ အဝၤန့ၣ် ဟးထီၣ်ကွံၥ်လၢ ဟံၣ်အဃိ, စူဒီးအဖိတဖၣ် အသးဘၣ်တံာ်တာ် ဒီးသူၣ်ဒိၣ်သးဖျိးဝဲန့ၣ်လီၤ. စူကိးအီၤလၢ အကလဲၤသကိးတၢ်ဒီးအီၤ ဆူ တၢ်စံးကတိၤတၢၣ်ပီၣ်သကိး တၢ်ဂ့ၢ်ဘၣ်ထွဲ ဒီးဟံၣ်ဖိဃီဖိ တၢ်ဂ့ၢ်ကီအဂီၢ် ဘၣ်ဆၣ် အဝၤန့ၣ် တလဲၤဝဲဒၣ်ဘၣ်. မ့ၢ်လၢ အဝၤန့ၣ် စံးဝဲ တၢ်ဂ့ၢ်ကီတဖၣ်အံၤ မ့ၢ်ထဲဒၣ်လၢ စူအတၢ်ကမၣ်အဃိန့ၣ်လီၤ. ဖဲစူသ့ၣ်ညါဘၣ်ဝဲလၢ ဝၤတဂၤအံၤ တမ့ၢ်ကဟဲက့ၤ နီတဘျီလၢၤဘၣ် အဃိ တၢ်ပျံၤတၢ်ဘၣ်ယိၣ်တဖၣ် အိၣ်ထီၣ်ဝဲ ဒီးမၤသးဒံး တၢ်မုၢ်လၢ်လီၤမၢ်ဝဲလၢ အသးကံၢ်ပူၤန့ၣ်လီၤ. တၢ်ကအံးထွဲကွၢ်ထွဲ ကဟုကယာ် အနီၢ်ကစၢ် ဃုာ်ဒီး အဖိတဖၣ် ထဲတဂၤဧိၤန့ၣ် ဘၣ်ကသ့ကစီဒီဧါ.

နီၢ်ဟၤကၢ်လၢအမ့ၢ် စီၤအၤဘြၤဟၣ်ဒီး နီၢ်စၤရါအကုၢ်ပိၥ်မုၣ်တဂၤအံၤစ့ၢ်ကီး ဘၣ်ကွၢ်ဆၢၣ်မဲၥ်ဝဲ တၢ်ဆိကမိၣ်ဘၣ်ယိၣ်တၢ် ဒ်သိးအံၤန့ၣ်လီၤ. လံာ် ၁ မိၤရှ့ ၁၂ ဒီး ၁၅ ပာ်ဖျါဝဲ နီၢ်စၤရါ လၢတၢ်သးစူၤအပူၤ တအိၣ်ခိးဘၣ်ဝဲ ကစၢ်ယွၤ အတၢ်အၢၣ်လီၤ ဘၣ်ထွဲဒီး ကဟ့ၣ်ဖိခွါတဂၤ, အလီၢ်န့ၣ် ၁ မိၤ ၁၆:၁-၄ ဒီး ၁၅ စံးဘၣ်ပှၤလၢ နီၢ်စၤရါ ဟ့ၣ်လီၤဝဲ နီၢ်ဟၤကၣ်ဆူ စီၤအၤဘြၤဟၣ်အဃိဒီး နီၢ်ဟၤကၢ် အိၣ်ဖျဲၣ်ထီၣ်အဖိခွါ စီၤယံးရှမၤဧ့လးန့ၣ်လီၤ. ဘၣ်ဆၣ် ဖဲကစၢ်ယွၤမၤလၢပှဲၤ အတၢ်အၢၣ်လီၤဒီး နီၢ်စၤရါ အိၣ်ဖျဲၣ်ထီၣ် စီၤအံၤစဲးဝံၤန့ၣ် ဟံၣ်ဖိဃီဖိအကျါ တၢ်ဖ့ၣ်ဆၢ, တၢ်တမုာ်တလၤ အိၣ်ထီၣ်အဃိ, ဒီး ၁ မိၤ ၂၁:၈-၂၁ ပာ်ဖျါဝဲ စီၤအၤဘြၤဟၣ် ဘၣ်ဆှၢဖျိးကွံာ် နီၢ်ဟၤကၢ် ဃုာ်ဒီး အဖိခွါ စီၤယံးရှမၤဧ့လး ဆူ တၢ်လီၢ်အယံၤ ဟ့ၣ်လီၤဃုာ်ဝဲဒီး ထံဒီးကိၣ်တနီၤစ့ၢ်ကီး န့ၣ်လီၤ. နထံၣ်ဆိကမိၣ်ထီၣ် နီၢ်ဟၤကၢ် အတၢ်ကီတၢ်ခဲ ကသ့ကစီဒီဧါ. တယံာ်ဘၣ် အဝဲသ့ၣ် အတၢ်အီၣ်တၢ်အီတဖၣ် လၢာ်ကွံာ်ဝဲလၢ မံၤခိၣ်သိၣ်လာ် တၢ်လီၢ်အံၤန့ၣ်လီၤ. နီၢ်ဟၤကၢ်န့ၣ် ကဘၣ်မၤဝဲဒၣ်ဒ်လဲၣ် တသ့ၣ်ညါဝဲလၢၤဘၣ် ဒီးတအဲၣ်ဒိးထံၣ်ဘၣ်ဝဲ အဖိသံအဃိဒီး လဲၤပာ်ဝဲ အဖိခွါ စီၤယံးရှမၤဧ့လး လၢသ့ၣ်ဖိတခိၣ်အဖီလာ် လၢအအိၣ်စီၤစုၤယံၤ တခးချံၣ်ဃၣ်ဃၣ်န့ၣ်လီၤ. ဒီဖိမိၢ်ခံဂၤလိာ် စးထီၣ်ဟီၣ်ဝဲယၢၤဝဲအဃိ အဆၢဖိ ၁၇ စံးဘၣ်ပှၤလၢ “ယွၤကနၣ် ဖိသၣ်အကလုၢ်”န့ၣ်လီၤ. ယွၤနၢ်ဟူ အဝဲသ့ၣ်အတၢ်ဟီၣ်တၢ်ယၢၤ, ယွၤကတဲာ်ကတီၤ ဟ့ၣ်လီၤ တၢ်လၢ အဝဲသ့ၣ် လိၣ်ဘၣ်ဝဲဒီး ယွၤအိၣ်ဒီးအဝဲသ့ၣ်န့ၣ်လီၤ.

ဖဲပအိၣ်ထဲတဂၤဧိၤအဆၢကတီၢ် တၢ်ကိၢ်တၢ်ဂီၤ မ့ၢ်လီၤဘၣ်ပှၤဒီး တၢ်မၤအသးလၢပဂီၢ်န့ၣ် မ့ၢ်ဒၣ် ပကဘၣ် ဟီၣ်ထုထီၣ်ပကလုၢ်ဆူ ယွၤအအိၣ်န့ၣ်လီၤ. တၢ်ဆၢကတီၢ် ဒ်သိးအံၤအပူၤ ဒီးလၢပတၢ်အိၣ်မူ ဒီတစိၤဒၣ်ဝဲ ပမ့ၢ်သ့ၣ်ညါဘၣ်လၢ ကစၢ်ယွၤနၢ်ဟူပှၤ, ဒီးကတဲာ်ကတီၤ ဟ့ၣ်လီၤဘၣ်ပှၤ ဒီးအိၣ်ဘူးဒီးပှၤလီၤန့ၣ် ကမ့ၢ်တၢ်မၤမုာ်ထီၣ်က့ၤ တၢ်လၢပဂီၢ်ထဲလဲၣ်.