ဖဲအကတဲာ်ကတီၤတၢ်အီၣ်ကတီၢ်, မိၢ်သးစၢ်တဂၤ ကျီတၢ်ညၣ်ကၣ်မံခံကူၣ်, တချုး ဖဲအတ့ၢ်လီၤတၢ်အံၤဆူ သပၢၤဖးဒိၣ်အပူၤလီၤ. အဝၤသံကွၢ်အီၤလၢ ဘၣ်မနုၤဘၣ်ကျီတဲာ် တၢ်ညၣ်ခံကူၣ်လဲၣ်န့ၣ်လီၤ. အဝဲစံးဆၢက့ၤဝဲလၢ “မ့ၢ်လၢအမိၢ်မၤယုၤအီၤဒ်န့ၣ်အဃိလီၤ”.
ဘၣ်ဆၣ် အဝၤ အတၢ်သံကွၢ်အံၤ, ကဲထီၣ်တၢ်သးတံာ်တာ်လၢ ပိာ်မုၣ်အံၤန့ၣ်လီၤ. လၢတၢ်အံၤအဃိ, အဝဲသံကွၢ် အမိၢ်လၢတၢ်လၢအဘၣ်ထွဲဒီးလုၢ်လၢ်န့ၣ်လီၤ. အဝဲဖုးသံပျီၢ်သံ ဖဲအသ့ၣ်ညါဘၣ်ဝဲလၢ အမိၢ်ကျီတၢ်ညၣ်အံၤအဂ့ၢ်, မ့ၢ်လၢသပၢၤဆံးအဃိ, ဘၣ်ကျီဆံးလီၤတၢ်ညၣ်အလိၣ်ဖိန့ၣ်လီၤ. မ့ၢ်လၢဖိမုၣ်အံၤ အိၣ်ဒီးသပၢၤဖးဒိၣ်အါဖျၢၣ်အဃိ, တၢ်ဘၣ်ကျီဆံးလီၤတၢ်ညၣ်အံၤ, တမ့ၢ်တၢ်လၢ အလိၣ်ဝဲန့ၣ်ဘၣ်.
လုၢ်လၢ်ထူသနူ စံၣ်စိၤတဲၤစိၤအါမံၤ စးထီၣ်သးလၢ တၢ်လိၣ်အိၣ်ဝဲတမံၤ ဘၣ်ဆၣ်, တၢ်အံၤ ဘၣ်တၢ်စိာ်မူအီၤ, လၢတၢ်တအိၣ်ဒီးတၢ်သံကွၢ်သံဒိးတၢ် နီတမံၤ ကဲထီၣ် “တၢ်လၢပညီနုၢ်အီၤန့ၣ်လီၤ”. တၢ်အံၤ မ့ၢ်တၢ်လၢပဟံးဃာ်ပၢၤဃာ်ညီနုၢ် ဆူတၢ်လၢအဘၣ်ထွဲဒီး လုၢ်လၢ်ထူသနူတဖၣ်, ဒ်တၢ်တမံၤမံၤ လၢပှၤဖၤရံၤရှဲတဖၣ် မၤဝဲလၢအဝဲသ့ၣ်အဆၢကတီၢ်န့ၣ်လီၤ (မၢ်ကူး ၇:၁-၂). အဝဲသ့ၣ် မ့ၢ်တၢ်လၢ အတြီဃာ် တၢ်လၢ အဖျါလီၤဂာ်မးလၢ တၢ်လဲၤခီပတာ်ဘၣ် တၢ်ဘူၣ်တၢ်ဘါ အတၢ်သိၣ်တၢ်သီတဖၣ်အသိးန့ၣ်လီၤ.
တၢ်အံၤ မ့ၢ်ဒ်ကစၢ်ယ့ၣ်ရှူးစံးဘၣ် ပှၤဖၤရံၤရှဲတဖၣ် လၢ “သုပာ်ကွံာ် ယွၤအတၢ်သိၣ်တၢ်သီ ဒီးသုတိၢ်န့ၢ် ပှၤကညီအတၢ်စံၣ်စိၤတဲစိၤ”အသိးလီၤ (:၈) . အဝဲပာ်ဖျါထီၣ်ဝဲလၢ တၢ်စံၣ်စိၤတဲစိၤ, လုၢ်လၢ်ထူသနူတဖၣ်, တကြၢးတၢ်တ့ၢ်နုာ်လၢ လံာ်စီဆှံအပူၤ နီတစုဘၣ်လီၤ. ထဲတၢ်သးအိၣ်ပိာ်ယွၤအခံနီၢ်နီၢ်တမံၤ (:၆-၇), ကပညိၣ် တၢ်ပာ်သူၣ်ပာ်သးလၢပပူၤ အါန့ၢ်ဒံး တၢ်ဖျါလၢခိတၢ်ဟူးတၢ်ဂဲၤတဖၣ်န့ၣ်လီၤ.
တၢ်အံၤ မ့ၢ်တၢ်ဆိကမိၣ်လၢအဂ့ၤ လၢပကခံကွၢ်စီၤကွၢ်က့ၤ လုၢ်လၢ်ထူသနူ တၢ်စံၣ်စိၤတဲစိၤတဖၣ်, လၢအမ့ၢ် တၢ်တမံၤမံၤလၢ ပဟံးဃာ်အီၤကျၢၤကျၢၤ လၢပသးပူၤ ဒီးပိာ်ထွဲအီၤန့ၣ်လီၤ. တၢ်ဂ့ၢ်တဖၣ်လၢ ကစၢ်ယွၤပာ်ဖျါထီၣ်ဆူ တၢ်လိၣ်ဝဲနီၢ်နီၢ်, ထီဘိ ကဘၣ်မ့ၢ် တၢ်လၢ အလဲၤတလၢကွံာ် လုၢ်လၢ်ထူသနူ အတၢ်စံၣ်စိၤတဲစိၤတဖၣ်န့ၣ်လီၤ.
