တၢ်လၢတယံာ်ဒံးဘၣ်န့ၣ် ယတံၤသကိးတဂၤ ဟ့ၣ်ယၤ တၢ်ဟ့ၣ်တခါအဃိ ဒီး ယကမၢကမၣ်ဘၣ် ယသးန့ၣ်လီၤ. ယဆိကမိၣ်ထီၣ်လၢ ယတကြၢးဝဲဘၣ်ဝဲဒီး တၢ်ဟ့ၣ်အဂ့ၤ ဒ်သိးအံၤ လၢအဟ့ၣ်ယၤန့ၣ်ဘၣ်. အဝဲနၢ်ဟူဘၣ်ဝဲလၢ ယဘၣ်လဲၤခီဖျိတၢ်သးတံာ်တာ်, သးလီၤဘှါနးနးကျံးကျံးလၢ ယတၢ်ဖံးတၢ်မၤအပူၤအဃိ အဝဲဆှၢလီၤတၢ်ဟ့ၣ်ဖိအံၤန့ၣ်လီၤ. ယတံၤသကိး အနီၢ်ကစၢ်ဒၣ်ဝဲ အသးဘၣ်ဆီၣ်သနံး, ဘၣ်တံာ်တာ် တၢ်န့ၣ် ဘၣ်သ့ၣ်သ့ၣ် ကအါန့ၣ်ယၤလီၤ. ခီဖျိ ဘၣ်ကွၢ် မိၢ်ပၢ်သးပှၢ်, ဖိတဖၣ် လၢအစူၢ်အ့န့, အတၢ်တၤတၢ်, တၢ်ဖံးတၢ်မၤအပူၤ တၢ်သဘံၣ်ဘူၣ်, တၢ်ဂၢၢ်တၢ်ကျၢၤတအိၣ်, ဒီးတၢ်ဖ့ၣ်ဆၢလၢ အတၢ်ဆီဟံၣ်ဆီဃီအပူၤတဖၣ်န့ၣ်လီၤ. အဝဲဆိကမိၣ်ဆိတၢ်လၢယဂီၢ်အါန့ၣ် အနီၢ်ကစၢ်ဒၣ်ဝဲ အတၢ်ကီတၢ်ခဲ ဒီးဟ့ၣ်ယၤတၢ်ဟ့ၣ်ယိယိၤဖိအံၤန့ၣ် မ့ၢ်ယကဘၣ်နာ်ဝဲဒ်လဲၣ်န့ၣ် ယဆိကမိၣ်တထီၣ်ဘးအဃိ ယမဲာ်ထံမဲာ်နိဘၣ်လီၤဝဲန့ၣ်လီၤ.
နီၢ်နီၢ်တခီ, ပဝဲကိးဂၤဒဲး ပဒိးန့ၢ်ဘၣ် တၢ်ဟ့ၣ်တဂၤစုာ်စုာ် လၢအတကြၢး တဘၣ်ဒီး ပှၤနီတစုန့ၣ်ဘၣ်လီၤ. ၁ တံၤ ၁:၁၅ အပူၤ စီၤပီလူးပာ်ဖျါထီၣ်တၢ်အံၤ ဒ် “ယ့ၣ်ရှူးခရံာ်ဟဲလီၤလၢဟီၣ်ခိၣ်ချၢ, ဒ်သိးအကအုၣ်က့ၤခီၣ်က့ၤ ပှၤတၢ်ဒဲးဘးဖိလၢ ယမ့ၢ်အဒိၣ်ကတၢၢ်တဂၤလီၤ”န့ၣ်လီၤ. အဆၢဖိ ၁၃-၁၄ ပာ်ဖျါဝဲ “ယဲဒၣ်အံၤ လၢအခီၣ်ထံးန့ၣ်, ယမ့ၢ်ပှၤဒုၣ်ဒွဲၣ်တၢ်, ဒီးပှၤမၤအၢမၤသီတၢ်, ဒီးပှၤအဒူလီၤ… ဒီးပကစၢ်အဘျုးအဖှိၣ်အါထီၣ်အါအါကလဲာ်, ” လၢအဂီၢ်န့ၣ်လီၤ. ကစၢ်ယ့ၣ်ရှူး လၢအဂဲၤဆၢထၢၣ်သမူထီၣ်က့ၤတဂၤန့ၣ် ဟ့ၣ်စီၤပီလူးလၢ တၢ်သ့ၣ်ညါနၢ်ပၢၢ်အဒိၣ်အယိာ်တမံၤလၢ အမ့ၢ် တၢ်ဘျုးတၢ်ဖှိၣ် လၢကစၢ်ယွၤအတၢ်ဟ့ၣ်ကလီအီၤန့ၣ်လီၤ. လၢတၢ်န့ၣ်အဃိ, အဝဲမၤလိန့ၢ်ဘၣ်တၢ်လၢ, ဒ်အမ့ၢ်ပှၤလၢ အဒိးန့ၢ်ဘၣ်တၢ်ဟ့ၣ်လၢ တကြၢးဝဲဘၣ်ဝဲဒၣ်ဒီးအီၤအဃိ, စီၤပီလူး ကဲထီၣ်ဝဲ တၢ်ပီးတၢ်လီလၢ အဘၣ်ထွဲဒီး ယွၤအတၢ်အဲၣ်အိၣ်ပှဲၤဒီးအစိကမီၤ ဒီးစံၣ်တဲၤတဲလီၤ ပှၤကလုာ်တဖၣ် တၢ်လၢယွၤမၤတၢ်လၢအဂီၢ်န့ၣ်လီၤ.
ခီဖျိလၢ ယွၤအတၢ်ဘျုးတၢ်ဖှိၣ်အဃိ လၢတၢ်ပာ်ဒ့ၣ်ပာ်ကမၣ်ပှၤအလီၢ်န့ၣ် ပဒိးန့ၢ်ဘၣ် ယွၤအတၢ်အဲၣ်, ဒီးလၢ ဘၣ်စံၣ်ညီၣ် ပှၤအလီၢ်န့ၣ် ပဒိးန့ၢ်ဘၣ်ယွၤအတၢ်အဲၣ်, ဒီးလၢဘၣ်စံၣ်ညီၣ်ပှၤအလီၢ်န့ၣ် ပဒိးန့ၢ်ဘၣ် ယွၤအတၢ်သူၣ်ကညီၤသးကညီၤန့ၣ်လီၤ. တနံၤအံၤ ပကမၤလၤကပီၤသကိး… တၢ်ဘျုးတၢ်ဖှိၣ်လၢ တကြၢးတဘၣ်ဒီးပှၤဘၣ်ဆၣ် ပဒိးန့ၢ်ဘၣ်ဝဲအဃိ, ဝံၤန့ၣ်ဒီး ပကဃုကျဲအကျိၤအကွၢ်တဖၣ် ဒ်သိးပကပာ်ဖျါထီၣ် တၢ်ဘျုးတၢ်ဖှိၣ်အံၤဆူ ပှၤဂုၤပှၤဂၤအိၣ်န့ၣ်တက့ၢ်.
