ဖဲ ၁၉၁၉ နံၣ် လါယနူၤအါရံၤ(၁၅)သီ ဖဲဝ့ၢ်ဘီးစတၢၣ်န့ၣ် ထံပိာ်သကၤထးဒၢဖးဒိၣ် တဖၣ် လၢပှၤဃ့ၣ်ထံပိာ်ထံန့ၣ် ပိၢ်ဖးထီၣ်ဒီးယွၤလီၤလၢကျဲမုၢ်ခိၣ်န့ၣ် အတီၣ်အိၣ် (၁၅)ခီၣ်ယီၢ်ဒီး အိၣ်ဝဲအကဲလၢၣ် ခံကကွဲၢ်ဒီး ယွၤဝဲတနၣ်ရံၣ် သၢဆံမံၤလာ် တၢ်လဲၤလီၤ. တၢ်မၤအသးအံၤ တွံၢ်တရူာ်စီကွံာ်သိလ့ၣ်တဖၣ်, တၢ်သူၣ်ထီၣ်တဖၣ် ပှၤကညီဒီးဆၣ်ဖိကီၢ်ဖိတဖၣ်လီၤ. ထံပိာ်သကၤထံတဖၣ်အံၤ ဖျါလၢမၤဘၣ်ဒိဆါ တၢ်တသ့ဘၣ်ဆၣ်, တၢ်ကဲထီၣ်အသးအံၤန့ၣ် မၤလီၤမၢ်ကွံာ် သးသမူခံဆံတဖျၢၣ်ဒီး ပှၤတစှၤန့ၢ် (၁၅ဝ) ဂၤဘၣ်ဒိဝဲန့ၣ်လီၤ.
တဘျီဘျီတၢ်အဂ့ၤ ဒ်ထံပိာ်သကၤထံတဖၣ်အံၤ လၢတၢ်တမုၢ်လၢ်ဘၣ်တၢ်အပူၤ မၤဟးဂီၤပှၤသ့ဝဲဒၣ်န့ၣ်လီၤ. တချုးဖဲအံၣ်စရ့လးဖိတဖၣ် နုာ်လီၤဆူကီၢ်တၢ်စံးပာ်န့ၣ် စီၤမိၤရှ့ဟ့ၣ်ပလီၢ် ပှၤဂီၢ်မုၢ်လၢ မ်အသုတပာ်ထီၣ်ထီအသး ဒီးကယဲၢ်တၢ်လၢအဒိးန့ၢ် ဘၣ်တဖၣ်အဂီၢ်န့ၣ်လီၤ. လံာ် ၅ မိၤရှ့ ၈:၁၂-၁၄ အပူၤ “တုၤနအီၣ်တၢ်ဒီးဘျဲးအီၣ်, ဒီးသူၣ်ဟံၣ်အဂ့ၤဒီးအိၣ်လၢအပူၤ, ဒီးနဂီၤဘုၣ်ဂီၤဖံး, ဒီးနသိ, မဲာ်တဲးလဲးအါထီၣ်, ဒီးနကျိၣ်ဧိၤစ့ဧိၤ ဒီးနထူနလွဲအါထီၣ် … နကပာ်ထီၣ်ထီသးဒီး သးပ့ၤနီၣ်ဘၣ်ဖုး ယွၤ နကစၢ်”န့ၣ်လီၤ. ဒီးဒ်သိးအဝဲသ့ၣ် သုတစံးဒီးနာ်ဝဲလၢ မၤန့ၢ်တၢ်ထူးတီၤတဖၣ်လၢအဂံၢ်ဘါဒၣ်ဝဲ မ့တမ့ၢ် အတၢ်သ့တၢ်ဘၣ်ဒၣ်ဝဲန့ၣ် စီၤမိၤရှ့စံးဘၣ်ပှၤဂီၢ်မုၢ်လၢ အဆၢဖိ ၁၇-၁၈ အပူၤ, “နဘၣ်သ့ၣ်နီၣ်ထီၣ် ယွၤနကစၢ်လီၤ. အဂ့ၢ်ဒ်အံၤ မ့ၢ်အဝဲဒၣ်လၢ အဟ့ၣ်လီၤနၤလၢ တၢ်အစိအကမီၤလၢ နကန့ၢ်ဘၣ်နစုလီၢ် နခီၣ်ခိၣ်လၢအီၤ…” န့ၣ်လီၤ.
တၢ်အဂ့ၤခဲလၢာ် – အိၣ်ဃုာ်ဒီးနီၢ်ခိတၢ်အိၣ်ဆူၣ်အိၣ်ချ့ဒီး တၢ်သ့လီၤဆီ ဒ်သိး ပကလုၢ်အီၣ် ပသးသမူတဖၣ် – မ့ၢ်တၢ်ဆိၣ်ဂ့ၤတဖၣ်အအိၣ် ဟဲလၢတၢ်အဲၣ်ပၢ်ယွၤအစုလီၤ. ပမ့မ့ၢ်ပှၤမၤတၢ်ဆူၣ်ဆူၣ်သနာ်က့ ယွၤမ့ၢ်ပှၤလၢအဟ့ၣ်လီၤပှၤတၢ်န့ၣ်လီၤ. အိ, မ်ပယူာ်ထီၣ်ပစုတဖၣ်လၢ ပကတူၢ်လိာ်တၢ်ဆိၣ်ဂ့ၤအဂီၢ်ဒီး ပကစံးထီၣ်ပတြၢၤယွၤ ပှဲၤဒီးတၢ်စံးဘျုးဖးဒိၣ်လၢ အတၢ်သးကညီၤလၢပဖီခိၣ်အဃိန့ၣ်တက့ၢ်.
