ဖဲ ၂ဝ၂၁ လါမ့ၤ (၃၁) သီန့ၣ် ယဝၤအဖါတံၢ်ဖးဒိၣ် ဖံး(ထ)(Pete) ဒီးအမါမၢ်ဖးဒိၣ် ရူး(သ)(Ruth)မၤတၢ်ဖျီ ဃိးဆံဝီတဝီလီၤ. လၢအပူၤကွံာ် ၁၉၄၁ နံၣ် ဖဲအဝဲသ့ၣ်န့ၢ်တၢ်ထံၣ်လိာ်အသး အဆၢကတီၢ်န့ၣ် ရူး(သ) မ့ၢ်ဒံးဒၣ် တီၤထီကၠိဖိမုၣ်တဂၤလီၤ. ပှၤသးစၢ် ခံဂၤအံၤ သးဆူၣ်ဖျီအသးမးအဃိ ဖဲရူးသ် ဖျိထီၣ်ခီလ့ၣ်ကၠိဝံၤန့ၣ် ဃ့ၢ်စိာ်လိာ်အသးလီၤ. ဖံး(ထ) ဒီးရူး(သ) နာ်ဝဲ လၢယွၤပာ်ဃုာ်အဝဲသ့ၣ် ဒီးနဲၣ်အဝဲသ့ၣ်အကျဲ လၢနံၣ်တဖၣ် အံၤအပူၤန့ၣ်လီၤ.
ဖဲအဝဲသ့ၣ်ကွၢ်ကဒါက့ၤအနံၣ်ဃိးဆံ အတၢ်လဲၤခီဖျိန့ၣ် အဝဲသ့ၣ်ခံဂၤအၢၣ်လီၤဝဲဒၣ် တၢ်လၢဟ့ၣ်ဂံၢ်ဟ့ၣ်ဘါဒုးမူဒုးဂဲၤ အတၢ်ရ့လိာ်သးန့ၣ် မ့ၢ်အဝဲသ့ၣ်အတၢ်ဆၢတဲာ်လၢ ဃုထၢတၢ်ပျၢ်တၢ်ကမၣ်လီၤ. မ့ၢ်လၢပမၤဆါလိာ်ဘၣ်ပသး ခီဖျိလၢ တၢ်စံးကတိၤတမုာ်တလၤအပူၤမ့ၢ်ဂ့ၤ, ပတမၤလၢပှဲၤဘၣ် ပတၢ်အၢၣ်လီၤတ့ၢ်လံတဖၣ်မ့ၢ်ဂ့ၤ, သးပ့ၤနီၣ်မၤ ပမူဒါတၢ်မၤတဖၣ်မ့ၢ်ဂ့ၤ, အလီၢ်အိၣ်လၢ ပကမၤညီနုာ် တၢ်ပျၢ်လိာ်သးတၢ်ကမၣ် ကဒဲကဒဲအဂီၢ်န့ၣ် ကယဲၢ်ပှၤလၢ အအိၣ်ဒီးတၢ်ရ့လိာ်ဘၣ်ထွဲလိာ်သး အဂ့ၤတဖၣ် ကသ့ၣ်ညါနၢ်ပၢၢ်ဝဲဒၣ်န့ၣ်လီၤ.
ဒ်သိးတၢ်မၤစၢၤကကဲထီၣ် လၢပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် ဒ်သိးကအိၣ်ဝဲဆိးဝဲလၢ တၢ်ဃူတၢ်ဖိးအဂီၢ် တၢ်ပျၢ်လိာ်သးတၢ်ကမၣ်န့ၣ် မ့ၢ်တၢ်အကါဒိၣ်လီၤ န့ၣ် ကလီး ၃:၁၂ အပူၤ စီၤပီလူး ကွဲးသဆၣ်ထီၣ် ပှၤဖးတၢ်ဖိတဖၣ် လၢကဃုထၢ “တၢ်သးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်သးစူၤ, တၢ်ဝံသးစူၤသ့ၣ်တဖၣ်” အဂ့ၢ်န့ၣ်လီၤ. အဆၢဖိ ၁၃ အပူၤ အဝဲကွဲးအါထီၣ် တၢ်ဟ့ၣ်ဂံၢ်ဟ့ၣ်ဘါ လၢ “ပှၤအတၢ်ကမၣ် မ့ၢ်အိၣ်ဒီးပျၢ်လိာ်သုသး”န့ၣ်လီၤ. အဆၢဖိ ၁၄ အပူၤ ပကထံၣ်ဘၣ် “တၢ်ရ့လိာ်ဘၣ်ထွဲလိာ်သး တဂၤဒီးတဂၤန့ၣ် ကဘၣ်တၢ်ဒုးနဲၣ်ပၢဆှၢအဝဲသ့ၣ် လၢတၢ်အဲၣ်တၢ်ကွံအပူၤ” မ့ၢ်တၢ်အကါဒိၣ်ကတၢၢ်န့ၣ်လီၤ.
တၢ်ရ့လိာ်ဘၣ်ထွဲလၢ ကကဲထီၣ်ဒိဂ့ၤတဲာ်ဘၣ် အိၣ်ဒီးအသူးအသ့ၣ်အကံၢ်အစီ ဒ်ဘၣ်တၢ်ပာ်လီၤအီၤ လၢစီၤပီလူးအံၤ မ့ၢ်တၢ်ဆိၣ်ဂ့ၤလီၤ. မ်ယွၤမၤစၢၤပဝဲကိးဂၤ, ဒ်သိးပကဒုးအိၣ်ထီၣ် တၢ်ရ့လိာ်ဘၣ်ထွဲလၢ အဘၣ်တၢ်ပာ်ပနီၣ်အီၤ ခီဖျိတၢ်အဲၣ်ဒီးတၢ်ပျၢ်တၢ်ကမၣ်အဂီၢ်န့ၣ်တက့ၢ်.
နအိၣ်မူလဲၤခီဖျိဘၣ် တၢ်မၤဘျါခီဖျိ နပျၢ်ပှၤဂၤအတၢ်ကမၣ် မ့တမ့ၢ် နဘၣ်တၢ်ပျၢ်နတၢ်ကမၣ်ဒ်လဲၣ်. ခီဖျိ ပအိၣ်မူအိၣ်ဂဲၤလၢတၢ်ပျၢ် ပှၤဂၤအတၢ်ကမၣ်ဒီးတၢ်ဟံးန့ၢ်မူဒါလၢ ပတၢ်ကမၣ်အဂီၢ်အဃိဒီး, တၢ်အံၤမၤဂ့ၤမၤဂၢၢ်ကျၢၤထီၣ် ပတၢ်အိၣ်မူအိၣ်ဂဲၤဒ်လဲၣ်.
ယ့ၣ်ၡူးသးဘိဧၢ, မၤစၢၤယၤ ဒ်သိးယကပျၢ်ပှၤဂၤတဖၣ် အတၢ်ကမၣ်
ဒ်နပျၢ်ယတၢ်ကမၣ်အသိးန့ၣ်တက့ၢ်.
တၢ်အဲၣ်သူၣ်ကညီၤသးကညီၤတၢ်န့ၣ် မ့ၢ်တၢ်သူၣ်အိၣ်သးအိၣ် ပှၤလၢအလိၣ်ဘၣ်တၢ်တဖၣ်န့ၣ်လီၤ. တၢ်ပာ်သူၣ်ပာ်သးအံၤ အါန့ၢ်ဂ့ၤန့ၢ် တၢ်သးကညီၤတၢ်အဃိ ပတၢ်အဲၣ်သူၣ်ကညီၤသးကညီၤတၢ်န့ၣ် ဒုးကဲထီၣ်ပှၤလၢ အမၤဘျါမၤဂ့ၤထီၣ်က့ၤ ပှၤလၢဘၣ်ကီဘၣ်ခဲတဂၤန့ၣ်လီၤ.
လူၤကၣ်၁၀း၃၃ ပာ်ဖျါဝဲ ပူကတိၤဟ့ၣ်ဒိလၢအမ့ၢ် “ပှၤၡၤမရံဖိလၢ အဂ့ၤတဂၤ” အဂ့ၢ်န့ၣ်လီၤ. ပှၤၡၤမရံဖိအတၢ်သးကညီၤလၢ ပှၤဘၣ်ဒိတီၢ်အီၤလၢ တမျိးတမျာ်တဂၤအဖီခိၣ်န့ၣ် ဒုးအိၣ်ထီၣ်သးလၢ အကမၤဂ့ၤမၤစၢၤ ပှၤဘၣ်ဒိဘၣ်ထံးတဂၤန့ၣ်လီၤ. ပှၤဟ့းလ့းဖိဒီး ပှၤရိမ့ၤဖိတဖၣ် ပာ်လုၢ်ပာ်ပှ့ၤဝဲ တၢ်သူၣ်ဒူသးဒူ, တၢ်ဂံၢ်တၢ်ဘါ, တၢ်ကူၣ်သ့, တၢ်စိတၢ်ကမီၤဒီး တၢ်မၤကၣ်ဆၢတၢ်န့ၣ်လီၤ. အဝဲသ့ၣ်အဂီၢ် တၢ်အဲၣ်သူၣ်ကညီၤသးကညီၤ စံးတၢ်န့ၣ် မ့ၢ်နီၢ်သးတၢ်ဂံၢ်စၢ်ဒီး တမ့ၢ်တၢ်ပာ်သူၣ်ပာ်သးအပတီၢ်ထီန့ၣ်ဘၣ်. ဘၣ်ဆၣ်ပှၤလၢစူၢ်က့ၤနာ်က့ၤ ကစၢ်ယ့ၣ်ၡူးခရံာ်တဖၣ်အဂီၢ်န့ၣ် မ့ၢ်တၢ်ပနီၣ်လၢအမၤနီၣ်ပှၤ ဒ်ပမ့ၢ်ကစၢ်ယွၤ အဖိအလံၤတဖၣ်န့ၣ်လီၤ.
လူၤကၣ် ၆း၃၆အပူၤ ကစၢ်ယ့ၣ်ၡူးစံးဘၣ်ပှၤလၢ ပကအိၣ်မူဟံးန့ၢ်ဒိ ဒ်သိးပၢ်အိၣ်လၢမူခိၣ်အသိးအဂီၢ် “ဒ်သုပၢ်သးကညီၤအသိးန့ၣ်, သးကညီၤတၢ်သုဝဲစ့ၢ်ကီးတက့ၢ်”န့ၣ်လီၤ. တၢ်သးကညီၤတၢ်န့ၣ် မ့ၢ်ကစၢ်ယွၤအနီၢ်ကစၢ်ဒၣ်ဝဲန့ၣ်လီၤ. လံာ်စီဆှံအပူၤ ကစၢ်ယွၤဒုးနဲၣ်လီၢ်ဖျါထီၣ် အသးအဒိၣ်ကတၢၢ်တဖၣ်အကျါ တမံၤန့ၣ် ဖဲ
၂မိၤၡ့ ၃၄း၆အပူၤ ယွၤပာ်ဖျါထီၣ်အနီၢ်ကစၢ် ဒ်အမ့ၢ် “ကစၢ်ယွၤလၢအသးအိၣ်တၢ်, ဒီးသးကညီၤတၢ်... ဒီးအဘျူးအဖှိၣ်ဒီး အမ့ၢ်အတီအိၣ်ဝဲအါမးလီၤ”န့ၣ်လီၤ. ပမ့ၢ်အိၣ်ဒီး တၢ်အဲၣ်သူၣ်ကညီၤသးကညီၤတၢ်ဒီး ပမ့ၢ်မၤဂ့ၤမၤဘျူးပှၤဂၤန့ၣ် ဒီးပကလီၤဂာ်အါထီၣ် ဒ်သိးကစၢ်ယွၤန့ၣ်လီၤ.
Sim Kay Tee
